Ysgol Gwyddorau Cymdeithas

Capten Clwb Cleddyfa yn ennill Gwobr Llew Rees

image of Chris Reid Chris Reid, myfyriwr Troseddeg a Chyfiawnder Trosedd yn ei ail flwyddyn ym Mhrifysgol Bangor yw enillydd Gwobr Goffa Llew Rees eleni. Mae Chris sy’n 22 ac o Durham wedi bod yn cleddyfa ers yr oedd yn unarddeg mlwydd oed, ac mae’n gapten ar Glwb Cleddyfa’r Brifysgol.

Mae Chris yn gyn disgybl Ysgol Gyfun Greencroft a Chanolfan Chweched Dosbarth Durham. Rhoddodd gynnig ar gleddyfa am y tro cyntaf drwy gynllun estyn allan ac mae’n aelod o glwb ffensio Lazlo yn Durham, yn ogystal â thîm yn Brifysgol.

Arbenigedd Chris yw’r epée, un o’r tair disgyblaeth cleddyfu ac mae wedi bod yn cystadlu ers oedd yn 15. Dros y ddwy flynedd diwethaf, Chris sydd wedi dod ar y brig o fyfyrwyr Cymru yng nghystadleuaeth cleddyfa BUSA. Mae hefyd wedi ennill Pencampwriaeth Prifysgolion Cymru dros y tair blynedd diwethaf ac wedi capteinio carfan Cymru eleni.

Dywedodd Chris, “Penderfynais roi cynnig ar gleddyfa am fy mod yn hoffi’r ffaith ei fod yn anghyffredin ac yn hollol wahanol i chwaraeon eraill. Rwyf wedi bod yn cystadlu ar lefel rhyngwladol ers rhai blynyddoedd bellach ac rwy’n edrych ymlaen at gystadlu yng Nghopenhagen blwyddyn nesaf.”

Yn ystod cyfnod Chris â chlwb Cleddyfa Prifysgol Bangor, mae aelodaeth y Clwb wedi cynyddu yn sylweddol gyda 50 o fyfyrwyr yn ymaelodi eleni. “Rydym wedi datblygu i un o glybiau mwyaf gweithgar yr Undeb Athletau ac enillon ni Clwb y Flwyddyn yn 2007,” ychwanegodd Chris.

“Dros y ddwy flynedd diwethaf rydym wedi amnewid holl offer y clwb, ac mae gennym ni ddau dîm Dynion a thîm Merched nawr. Un o uchafbwyntiau fy nghyfnod fel capten y clwb oedd ennill y cynnig i gynnal Pencampwriaeth Prifysgolion Cymru yma ym Mangor y llynedd.

“Rwy’n credu hefyd fod apêl ffilmiau James Bond wedi helpu i godi proffil cleddyfa, ac mae ychydig o bobl wedi ymuno â’r clwb ar ôl gweld y ffilm,” meddai Chris.

Mae Chris yn falch iawn o ennill Gwobr Goffa Llew Rees eleni, ac mae’n gobeithio bydd yr arian o gymorth iddo gymryd rhan mewn gweithgareddau clybiau cleddyfa tu allan i Fangor. Ychwanegodd, “Buaswn yn cynghori unrhyw un sydd eisiau trio rhywbeth ychydig yn wahanol i roi cynnig ar gleddyfa - dyna wnes i, a dydw i ddim wedi edrych yn ôl ers hynny!”

*Gweler uchod Chris Reid yn derbyn ei wobr gan Mike Goodwin, Cyfarwyddwr Ystadau a Chyfleusterau Prifysgol Bangor.