PGCert – Trosolwg

Dyfyniadau gan gydweithwyr sydd wedi cwblhau/astudio’r cwrs yn ddiweddar:

”Mae’r rhaglen PGCertTHE wedi rhoi’r hyder i mi addysgu ar wahanol lefelau gan ddefnyddio gwahanol ddulliau addysgu ac asesu; gan roi cyfleoedd gwerthfawr i roi theori ac adfyfyrio ar waith yn yr ystafell ddosbarth. Mae’n cyfrannu’n sylweddol at fy natblygiad proffesiynol ac yn fy ngalluogi i wella profiad myfyrwyr a’u sgiliau dysgu.” (Dr.Rasha Alsakka, Uwch Ddarlithydd, Ysgol Busnes Bangor)

”Roedd y cwrs PGCertTHE yn rhoi’r cyfle i mi feddwl am fy ffordd o ddysgu. Gwnaeth y cwrs fy helpu i ystyried sut i ryngweithio gyda myfyrwyr ac yn arbennig pa addasiadau i wneud i fyfyrwyr gyda gwahanol anghenion. (Dr. Sophie Williams, Cysylltai Dysgu, Ysgol yr Amgylchedd, Adnoddau Naturiol a Daearyddiaeth)

”Mae’r PGCertTHE wedi rhoi gwerthfawrogiad llawer gwell imi o’r problemau sydd ynghlwm ag addysgu a dysgu mewn addysg uwch ar hyn o bryd ac wedi rhoi cyfleoedd imi adfyfyrio ar fy addysgu fy hun a’i ddatblygu.” (Dr. John Mulley, Darlithydd mewn Gwyddorau Biolegol)

”O’r cwrs cynefino i gyflwyno fy nghanlyniadau ymchwil, mae’r PGCertTHE wedi bod yn amhrisiadwy i’m hymchwil bersonol ac i’m gyrfa academaidd. Rydw i wedi gwneud ffrindiau gydag amrywiaeth eang o fyfyrwyr ac athrawon y tu mewn a’r tu allan i’m hadran fy hun sydd wedi fy helpu i ddatblygu dulliau addysgu ac ymchwil sy’n hawdd ac yn arloesol. Rydw i wedi bod mewn sawl gweithdy addysgu sydd wedi helpu i egluro popeth o sut i ddal sylw grwpiau mawr o fyfyrwyr, at sut i gynnwys Facebook yn fy narlithoedd.” K. DeAnn Bell, Myfyriwr Ôl-radd, Saesneg)

Cofrestru

  • Staff: cwblhewch y ffurflen gais ar-lein i staff (cliciwch ar y cyswllt o dan ‘Staff PB’) a phan ofynnir i chi uwchlwytho dogfennau ategol, dim ond dogfen wag sydd angen i chi ei huwchlwytho gan nad oes arnom angen tystiolaeth o gymwysterau
  • Ôl-raddedigion: cwblhewch y ffurflen gais ar gyfer Ôl-raddedigion a’i hanfon drwy e-bost at PGCertTHE@bangor.ac.uk. Rhaid i fyfyrwyr ôl-raddedig hefyd ddarparu llythyr gan eu Pennaeth Ysgol yn cadarnhau o leiaf 100 awr o weithgaredd cysylltiedig ag addysgu ar fodiwlau SA er mwyn eu hystyried ar gyfer cam 1 y cwrs.

Y dyddiad cau ar gyfer derbyn ceisiadau yw 25 Medi 2020, ac eithrio yn achos staff newydd sydd dan reidrwydd cytundebol i ymgymryd â’r PGCertTHE.

Cynefino

Amserlen

Bydd cwrs y flwyddyn academaidd hon yn gyfan gwbl ar-lein. Bydd deunyddiau ar gael ar Blackboard o 7 Hydref. Ar gyfer cam 1 (modiwl XVE-4008), bydd adnoddau a gweithgareddau’n cael eu rhyddhau’n wythnosol ar gyfer astudio hunan-gyfeiriedig, a chynhelir gweithdai byw ar-lein bob ychydig wythnosau. Ymhellach, bydd un o arweinwyr y rhaglen ar gael trwy drefniant i ddarparu cefnogaeth diwtorial 1:1 trwy gydol y cwrs. Ar gyfer cam 2 (XVE-4009) darperir arweiniad ar lunio’r portffolio, sydd i’w gwblhau dros y flwyddyn academaidd. Bydd cefnogaeth diwtorial 1:1 unwaith eto ar gael trwy drefniant.

Strwythur

Bydd y cyrsiau newydd yn gyfan gwbl ar-lein, a bydd y deunyddiau’n dechrau cael eu rhyddhau ar safleoedd Blackboard o ddydd Mercher 30 Medi. Cynhelir y sesiwn gydamserol gyntaf ar gyfer cam 1 ddydd Mercher 7 Hydref 1–3pm, trwy TEAMS.
Mae’r PGCertTHE wedi’i gynllunio’n bennaf ar gyfer staff academaidd newydd sydd dan reidrwydd cytundebol i gwblhau’r cwrs. Dim ond i staff sydd â chyfrifoldeb sylweddol dros addysgu neu gefnogi dysgu y mae’n addas. Ei nod yw meithrin gwybodaeth a sgiliau ym meysydd addysgu, dysgu ac asesu, a helpu unigolion i ddatblygu yn ymarferwyr adfyfyriol.
Mae dau gam i gwblhau’r cymhwyster llawn, sy’n cynnwys dau fodiwl 30 credyd:
Mae cwblhau’r PGCertTHE yn rhoi cyfle i gael statws Cymrodoriaeth Gyswllt (Cam 1) a Chymrodoriaeth (Cam 2) gyda’r Academi Addysg Uwch. Mae’n cyd-fynd yn agos â Fframwaith Safonau Proffesiynol y Deyrnas Unedig. Mae Cam 1 a 2 yn orfodol i staff ar gontractau addysgu academaidd ym Mangor sydd â llai na 3 blynedd o brofiad addysgu di-dor mewn addysg uwch neu nad ydynt eisoes yn Gymrodyr yr Academi Addysg Uwch. Mae’r cymhwyster wedi’i achredu gyda’r Cyngor Nyrsio a Bydwreigiaeth a’r Academi Addysg Uwch.
Gan weithio ochr yn ochr ag Ymgynghorydd Addysgu profiadol, mae’r rhai sy’n dilyn y rhaglen yn tynnu ac yn adeiladu ar brofiadau a enillir yn ystod eu dyletswyddau addysgu arferol i baratoi portffolio sy’n dangos ymarfer proffesiynol arloesol ac adfyfyriol sy’n seiliedig ar gysyniadau damcaniaethol.
Mae’r cymhwyster yn rhoi cyfle i ddatblygu eich addysgu a gwella profiad myfyrwyr, ac mae wedi’i seilio ar fodel o ymarfer adfyfyriol.

Ffeithiau sydyn:

  • Cynigir y rhaglen PGCertTHE i unrhyw rai sy’n dymuno datblygu eu gwybodaeth a’u sgiliau ym meysydd addysgu, dysgu ac asesu. Mae hyn yn cynnwys staff academaidd, cynorthwywyr ymchwil ac ôl-raddedigion. Serch hynny, bydd y nifer o leoedd yn gyfyngedig a rhoddir blaenoriaeth i staff sydd dan reidrwydd cytundebol i gwblhau’r cwrs.
  • Mae dau gam i gwblhau’r cymhwyster llawn, sy’n cynnwys dau fodiwl 30 credyd