ydd yn cystadlu yn y Gemau Paralympaidd ar 27, 28 a 29 Awst. Mae’n cystadlu yn y PR1 sgwl unigol dynion.
Fel myfyriwr, enillodd Ben un o brif wobrau chwaraeon Prifysgol Bangor, Gwobr Goffa Llew Rees, a ddyfernir i athletwr rhagorol. Yn ei drydedd flwyddyn, bu’n cynrychioli Triathlon Prydain ym Mhencampwriaethau Ewrop a Phencampwriaeth y Byd yn ôl Oedran.
Dywed bellach mai un o'i nodau yw cynnig bwrsariaeth i athletwr ym Mhrifysgol Bangor!
Tra roedd yn y brifysgol, roedd Ben yn weithgar iawn yn yr Undeb Athletau, gan ennill lliwiau yn chwarae hoci a seiclo a gleision wrth gymryd rhan mewn cystadlaethau triathlon. Rhoddodd hefyd dro ar bêl-droed Gaeleg a chafodd amser gwych!
Ond yn 2016, cafodd anaf i'w asgwrn cefn o ganlyniad i ddamwain seiclo.
Meddai Ben, sy'n dod o'r Mwmbwls, Abertawe, am y profiad:
“Roeddwn yn ddigon ffodus i fynd i Stoke Mandeville, y ganolfan anafiadau asgwrn cefn genedlaethol a man geni'r mudiad paralympaidd. Yn yr ysbyty, maen nhw'n rhoi pwyslais enfawr ar y lles y gall chwaraeon ei wneud ar ôl anaf ac roeddwn yn ffodus iawn i gael rhoi cynnig ar amrywiaeth o chwaraeon tra roeddwn yno. I ddechrau, nid oeddwn yn hoffi'r peiriant rhwyfo gan fy mod yn meddwl ei fod yn rhy anodd ac yn rhy ddiflas, ond soniodd ffrind a chyd-glaf wrthyf fod y ffisiotherapyddion yn cadw cofnod o’r rhwyfwyr gorau a dyna ni wedyn. Roeddwn eisiau mynd yn gyflymach ac yn gyflymach - y dilyniant naturiol oedd cysylltu â British Rowing a gweld beth oedd y camau nesaf.”
Ben Pritchard yn cyrraedd y Gemau Paralympaidd!
"Un o gyfnodau gorau fy mywyd"
Yn 2019, penderfynodd Ben ganolbwyntio ar y Gemau Paralympaidd, a bod yn athletwr llawn-amser. Cafodd ei brofiad cyntaf o rwyfo ar lwyfan rhyngwladol y flwyddyn honno, a daeth yn 3ydd yng Nghwpan y Byd a 4ydd ym Mhencampwriaethau’r Byd. Mae bellach wedi cyrraedd ei nod o fynd i’r Gemau Paralympaidd, a'i nod newydd yw ennill lle ar y podiwm!
Meddai:
“Ni allaf ddisgrifio pa mor hapus ydw i fy mod allan yn Tokyo ar hyn o bryd! Rwy'n teimlo fel plentyn mewn siop da-da. Mae rhannu ffreutur gydag athletwyr rwyf wedi eu gwylio ar y teledu a’u hedmygu yn brofiad swreal, a rŵan gallaf eu galw’n gyd-rwyfwyr. Mae'n brofiad anhygoel ac rwy’n mwynhau pob cyfle. ”
“Mae pob athletwr yn dod i’r Gemau Paralympaidd i ennill. Ni fyddem yn athletwyr heb y meddylfryd cystadleuol hwn. Nod realistig i mi yw lle ar y podiwm - 5ed safle, a dyna rwy’n anelu at ei gyflawni! Rwy'n credu mai'r peth mwyaf i rywun sydd yno am y tro cyntaf, yw sicrhau eich bod yn mwynhau pob cyfle oherwydd efallai mai dyma fydd y tro cyntaf neu’r tro olaf i chi fod yma. Felly rwy’n gwneud yn siŵr fy mod yn cymryd rhan o bob diwrnod i fwynhau fy hun.”
Daeth Ben i un o ddyddiau agored y brifysgol ac meddai:
“Rwy’n Gymro balch iawn, felly roedd yn bwysig i mi aros yng Nghymru i gael fy addysg uwch. Roeddwn yn eistedd mewn darlithfa yn Ysgol y Gyfraith yn ystod diwrnod agored ym Mangor pan edrychais trwy’r ffenestr a gweld yr olygfa tuag at Eryri o dan haen o eira, a dywedais wrth fy rhieni yn y fan a’r lle, mai dyma lle roeddwn eisiau mynd.”
Fel athletwr brwd, roeddwn yn gwybod y gallwn gael y cydbwysedd cywir rhwng astudio a bywyd yno gan fod Prifysgol Bangor yn cynnig addysg o safon uchel ac mae Parc Cenedlaethol Eryri o fewn tafliad carreg ac yn cynnig oriau diddiwedd o antur.”
Meddai:
“Rwy’n ddiolchgar i’r diwrnod agored hwnnw am wneud i mi ddewis Bangor. Roedd astudio ym Mangor yn un o gyfnodau gorau fy mywyd ac os gallwn wneud y cyfan eto, yna byddwn yno ar unwaith!”
Dyma ddywedodd Ben am ei gynlluniau i’r dyfodol:
“Rwy’n canolbwyntio ar Tokyo yn y tymor byr ac wedyn rwy’n bwriadu gorffwys ac ymlacio ychydig. Rwy’n siŵr y bydd fy nyweddi yn gwneud yn siŵr fy mod yn gwneud rhywfaint o’r gwaith paratoi at ein priodas, a gafodd ei ohirio, ac rwy’n edrych ymlaen at dreulio amser gyda fy ffrindiau a’m teulu. Mae Covid wedi golygu fy mod wedi gorfod blaenoriaethu fy nod o gyrraedd Tokyo dros dreulio amser gyda’m ffrindiau a’m teulu Fy nod yn y tymor hir yw darparu bwrsariaeth i athletwr chwaraeon yn y brifysgol gan fy mod yn ffodus iawn o fod wedi derbyn Gwobr Goffa Llew Rees a buaswn wrth fy modd yn rhoi cyfle i athletwr ifanc ddatblygu ei grefft fel y cefais innau’r cyfle i wneud yn y brifysgol.”
