Dychwelyd i Ymarfer

Ydych chi'n ystyried dychwelyd i Nyrsio?

Mae'r cwrs Dychwelyd i Ymarfer yn cynnig cyfle gwych i wneud hynny os buoch unwaith yn gweithio fel nyrs gofrestredig.

Mae hefyd yn ffordd o gefnogi'r rhai hynny sy'n methu gwneud nifer yr oriau ymarfer sy'n ofynnol i fodloni gofynion y Cyngor Nyrsio a Bydwreigiaeth (NMC) ar gyfer ailddilysu er mwyn parhau ar y gofrestr.

Bydd y cwrs yn eich galluogi i ddatblygu, adnewyddu a gwella'r wybodaeth, y sgiliau a’r gwerthoedd proffesiynol y mae'n ofynnol i Nyrs Gofrestredig eu cael ac i ddarparu gofal diogel, effeithiol a thosturiol sy'n canolbwyntio ar yr unigolyn yn eich maes ymarfer. Mae'r sgiliau allweddol hyn yn adlewyrchu safonau cymhwysedd newydd yr NMC i nyrsys cofrestredig (2018).

Bydd y rhaglen rhan-amser yn eich arfogi i ddychwelyd i nyrsio gyda'r sgiliau cywir yn yr unfed ganrif ar hugain, er mwyn darparu gofal diogel o ansawdd uchel sy'n canolbwyntio ar y claf. Byddwch yn rhan o grŵp bach o fyfyrwyr dysgu ar-lein o bob maes nyrsio. Bydd staff addysgu, mentoriaid ac ymarferwyr cymwys wrth law i hwyluso dysgu ac i roi anogaeth i chi trwy gydol eich astudiaethau a'ch ymarfer clinigol. Bydd eich cwrs wedi'i rannu'n gyfartal rhwng 50% theori a 50% ymarfer, gyda’r theori yn cael ei gwblhau mewn blod pedair wythnos ar ddechrau’r rhaglen.

Byddwch yn ymuno ag amgylchedd dysgu lle cewch eich meithrin gan dîm cryf a chefnogol ar hyd y ffordd. Cynhelir y diwrnodau theori rhwng 10am a 3pm ac maent wedi'u cynllunio i roi'r wybodaeth ddiweddaraf i chi am yr hyn sy'n digwydd yn y proffesiwn nyrsio.
Cyflwynir y cwrs Dychwelyd i Ymarfer ar Lefel 6, sy'n cyfateb i drydedd flwyddyn cwrs gradd israddedig. I'r rhai hynny ohonoch sy'n dychwelyd i astudio ar ôl seibiant hir neu sy'n nerfus ynghylch gofynion academaidd y cwrs, ceir digon o gefnogaeth o ran sgiliau astudio ochr yn ochr â sesiynau tiwtorial ar –lein. Bydd yr amser ar leoliad yn dibynnu ar sawl blwyddyn sydd ers i chi roi'r gorau i weithio, er enghraifft byddai bwlch o rhwng 3 a 5 mlynedd yn cyfateb i 120 awr mewn ymarfer clinigol.

"Dwi wir yn teimlo'n barod i fynd yn ôl allan i ymarfer eto ar ôl gwneud y rhaglen yma. Mae'r cwrs wedi rhoi lot o bethau i fi eu defnyddio, efo ffyrdd newydd o asesu cleifion a digon o bethau i feddwl amdanyn nhw.  Rwyf wedi mwynhau yn onest ac yn awr mewn ymarfer clinigol fel nyrs staff amser llawn ar uned asesu meddygol acíwt brysur. Diolch am y gefnogaeth hyblyg ac am bob dim dwi wedi ei ddysgu trwy gydol y cwrs."
Susanne Pook 2019.

Ymgeisiwch Nawr

I wneud cais am y cwrs, llenwch y ffurflen gais hon cyn gynted â phosibl a'i dychwelyd i s.jeffreys@bangor.ac.uk. Bydd pob ymgeisydd yn cael ei gyfweld ar-lein trwy Microsoft Teams a bydd yn cael ei drefnu cyn gynted â phosibl. Bydd angen tystiolaeth o gofrestriad blaenorol NMC a llun adnabod ar bob ymgeisydd.

Rhagor o wybodaeth

  • Fel rhan o ysgol fawr, byddwn yn eich helpu i fwynhau profiad academaidd cyfoethog a boddhaus trwy gydol eich cyfnod ym Mhrifysgol Bangor.  Rhai o nodweddion allweddol ein rhaglen:
  • Mae Addysg a Gwella Iechyd Cymru yn darparu bwrsari llawn y GIG, gan gynnwys ffioedd dysgu a bwrsariaeth nad oes angen ei had-dalu. Bydd y fwrsariaeth o £3,000 heb brawf modd ar gael i bob myfyriwr, a bydd yn cael ei dalu mewn rhandaliadau misol yn ystod y cwrs.
  • Byddai'r Rhaglen Dychwelyd i Ymarfer yn gweddu i nyrsys oedolion, pediatreg, anableddau dysgu ac iechyd meddwl sydd â’u cofrestriad gyda'r NMC wedi dod i ben neu y rhai hynny nad ydynt wedi gallu cwrdd â gofynion Ailddilysu eu corff proffesiynol er mwyn ailgofrestru.
  • Trefnir deilliannau dysgu'r modiwl i adlewyrchu deilliannau penodol yr NMC ar gyfer Dychwelyd i Ymarfer (NMC 2011).
  • Bydd yr ymgeiswyr yn astudio ar y cwrs yn rhan amser dros gyfnod dwys neu mewn modd sy'n berthnasol i anghenion unigol, gyda’r disgwyliad bod y cwrs yn cael ei gwblhau o fewn 6 mis.
  • Bydd labordai cyfrifiadurol pwrpasol, ystafelloedd astudio i fyfyrwyr, rhwydweithiau WiFi ledled y campws, cyfleusterau argraffu a llyfrgell gofal iechyd bwrpasol i gyd ar gael i chi yn ystod eich cyfnod yn astudio gyda ni.
  • Rydym yn cynnig hyblygrwydd sy'n ystyriol o deuluoedd ar gyfer y diwrnodau astudio. Rydym yn ceisio ein gorau i weithio o amgylch oriau ysgol sy'n golygu cychwyn yn hwyrach a gorffen yn gynharach ac ystyried cyfrifoldebau gofal plant.
  • Mae ein hamgylchedd dysgu rhithiol hefyd ar gael trwy ddyfeisiau bwrdd gwaith a dyfeisiau symudol. Mae hyn yn golygu y gallwch gyrchu/adolygu adnoddau electronig yn unrhyw le.
  • Cynigir ystod o leoliadau i fyfyrwyr mewn ysbytai, meddygfeydd cymunedol a/neu feddygfeydd teulu ledled ardal Bwrdd Iechyd Betsi Cadwaladr. Credwn y bydd hyn yn eich gwneud yn fwy cyflogadwy i gyflogwyr lleol (a thu hwnt), ar ôl cwblhau'r rhaglen yn llwyddiannus.
  • Bydd gennych diwtor personol pwrpasol a/neu gymorth tiwtor yn eich maes penodol a fydd yn darparu cefnogaeth fugeiliol ac arweiniad academaidd trwy gydol y rhaglen.
  • Rhoddir mentor cadarnhau profiadol i chi a fydd yn gweithio ochr yn ochr â chi yn ystod eich ymarfer clinigol.
  • Gellid sicrhau bod rhai elfennau astudio ar gael trwy gyfrwng y Gymraeg.

Am wybodaeth bellach cysylltwch â:

Taflen Dychwelyd i Ymarfer

Dychwelyd i Ymarfer Nyrsio - Gwanwyn 2022 Mynediad Mae'r Brifysgol ar hyn o bryd yn cael ei dilysu ar gwrs Nyrsio CTRh newydd y bwriedir iddo ddechrau yng ngwanwyn 2022 - cliciwch yma i gael mwy o wybodaeth ac i gofrestru'ch diddordeb yn y dyddiad cychwyn hwnnw.