Dilysu Aml-ffactor

Mae'r defnydd cynyddol o ymosodiadau “Gwe-rwydo/Phishing” ar gyfrifon e-bost wedi arwain at beryglu nifer o gyfrifon y brifysgol gyda defnyddwyr yn datgelu eu henw defnyddiwr a'u cyfrinair.  Nid yw eich enw defnyddiwr a'ch cyfrinair bellach yn ddim ond ffordd o fynd at eich e-bost  - mae hefyd yn sicrhau mynediad i holl ddarpariaethau Office365, gan gynnwys data sensitif o bosib sydd gennych ar eich safleoedd OneDrive neu Teams. Nodwyd hyn mewn archwiliad diogelwch allanol ac yn unol ag argymhellion a gafwyd, mae'r brifysgol wedi cytuno bod yn rhaid i ni gymryd camau pellach i ddiogelu ein data.  Mae hyn yn nodweddiadol yn sectorau Addysg Uwch y Deyrnas Unedig lle mae camau tebyg yn cael eu cymryd.

Cyflawnir hyn drwy ddefnyddio dulliau dilysu modern (“aml-ffactor”) yn ychwanegol at eich enw defnyddiwr/cyfrinair Bangor - pan fyddwch yn mynd at Office365 o'r tu allan i Fangor (gan gynnwys mynediad o ffôn symudol 4G). Mae'r dull mynediad hwn wedi'i orchymyn ar gyfer mynediad oddi ar y campws.

Ni fydd angen i chi gyflawni unrhyw gamau ychwanegol ar rwydwaith gwifrog ac Eduroam Bangor.

Pan fyddwch oddi ar y campws gofynnir i chi i nodi rhif cod ychwanegol ar ôl eich cyfrinair Bangor. Gwneir hyn trwy neges destun am ddim i rif ffôn symudol a bennir gennych neu alwad ffôn awtomataidd (am ddim) i rif o'ch dewis. Peidiwch â dewis eich rhif ffôn swyddfa gan mai dim ond oddi ar y campws y gofynnir i chi gyflawni'r cam hwn!  Gall defnyddwyr ffonau clyfar hefyd osod yr ap “Microsoft Authenticator” am ddim o’u siop apiau (bydd hyn yn arbed gorfod teipio'r rhif cod ac mae'n awtomeiddio'r dilysiad eilaidd).  Mae'r rhifau ffôn a ddarperir gennych i'r system yn cael eu cadw'n ddiogel ac ni all unrhyw un arall eu gweld (gan gynnwys y Gwasanaethau TG).  Nid yw'r rhifau'n cael eu rhannu na'u defnyddio at unrhyw bwrpas arall heblaw'r system awtomataidd. Mae hyn yn debyg iawn i'r dulliau diogelwch ychwanegol a ddefnyddir ar gyfer bancio ar-lein.

Unwaith y byddwch wedi cyflawni'r cam ychwanegol hwn ni chewch eich annog (ar y ddyfais unigol) am 60 diwrnod. Os ydych yn bwriadu teithio dramor, gallai fod yn ddoeth felly i fynd at eich e-bost o bell o'r DU cyn i chi adael er mwyn sicrhau mynediad rhwydd ato - er y gellir defnyddio'r neges destun a'r ap yn unrhyw le mae gwasanaeth symudol/Wi-Fi ar gael.

Gweler yr arweiniad cyffredinol ar ei osod neu cysylltwch â helpdesk@bangor.ac.uk os oes angen cymorth arnoch.