Gwasanaethau Cefnogi Myfyrwyr

Cronfa Caledi

Dewislen

Beth yw'r Gronfa Galedi?

Mae'r Gronfa Galedi yn darparu cymorth ariannol i fyfyrwyr 'cartref' sy'n cael anhawster wrth gwrdd â'u costau byw am ba bynnag reswm, boed oherwydd eu hamgylchiadau personol (e.e. myfyrwyr hyn, neu fyfyrwyr anabl), neu oherwydd eu bod yn disgyn i galedi yn annisgwyl. Rhoddir cymorth ar ffurf grant nad yw'n ad-daladwy.

Yn unol â'r rheoliadau a osodwyd gan y Cyngor Cyllido Addysg Uwch, mae'n rhaid i fyfyriwr gwrdd â'r meini prawf canlynol i fod yn gymwys i roi cais i'r Gronfa Galedi;

Mae'n rhaid iddo/iddi fod yn fyfyriwr cartref* (neu'n fyfyriwr gyda statws ffoadur) sydd wedi cofrestru ar gwrs amser llawn neu ran-amser (yn hafal I 50% neu fwy o gwrs llawn-amser) ar lefel israddedig neu uwchradd. Mae'n rhaid i fyfyriwr hefyd fod wedi byw yn y DU am dair blynedd cyn dechrau'r cwrs.

* Myfyriwr cartref yw myfyriwr sy'n cwrdd ag amodau penodol cymhwyster am fenthyciad myfyrwyr fel y nodwyd yn Rheoliadau Cefnogi Myfyrwyr 2011/12.

Bwriedir Cronfeydd Caledi ar gyfer helpu â chostau byw ac ni ellir eu dyrannu i gynorthwyo â thalu Ffioedd Hyfforddi, ac eithrio pan fo myfyriwr cymwys rhan-amser wedi dod yn ddi-waith ar ôl dechrau'r cwrs.

Grwpiau Blaenoriaeth; Oherwydd natur gyfyngedig y cronfeydd, rhoddir blaenoriaeth i'r myfyrwyr canlynol:

Myfyrwyr gyda phlant, yn arbennig rhieni sengl
Myfyrwyr eraill, yn arbennig myfyrwyr sydd âg ymrwymiadau ariannol, gan gynnwys dyledion blaenoriaethol
Myfyrwyr sydd angen cymorth â chostau gofal plant.
Myfyrwyr anabl, yn arbennig rhai nad ydynt yn gymwys i dderbyn y Lwfans Myfyrwyr Anabl
Myfyrwyr Blwyddyn Olaf sydd mewn trafferth ariannol (gan gynnwys rhai sydd methu gweithio oherwydd pwysau academaidd)
Rhai sy'n gadael gofal
Myfyrwyr mewn gofal a myfyrwyr digartref eraill

Sut ydw i'n gwneud cais, a phryd?

Gall myfyrwyr wneud cais unrhyw bryd yn ystod y flwyddyn academaidd. Rhaid i'r holl geisiadau fod ar ffurflen ddilys gyda'r holl ddogfennau perthnasol wedi'u llungopïo. Unwaith yn unig y mae'n rhaid i fyfyrwyr wneud cais am y flwyddyn academaidd gyfredol, oni bai bod newid mewn amgylchiadau.

Sut y telir yr arian?

Bydd eich arian o'r Gronfa Galedi fel arfer yn cael ei gyfrifo ar gyfer y flwyddyn academaidd gyfan a byddwch yn derbyn dau randaliad yn uniongyrchol yn eich cyfrif banc; un yn y semester cyntaf ac un arall yng nghanol yr ail semester (cadarnheir yr union ddyddiad drwy lythyr). Mae'n hanfodol rhoi'r manylion cywir ar y ffurflen gais hon, gan na all Brifysgol dderbyn cyfrifoldeb dros unrhyw daliadau a wneir i fyfyrwyr sy'n methu â rhoi manylion banc cywir. Mae'n rhaid rhoi gwybod am unrhyw newidiadau i fanylion cyfrif a roddir ar y ffurflen gais hon yn ysgrifenedig o leiaf bedwar diwrnod a ddeg cyn y dyddiad y mae i'w dalu. Fe roddir gwybod ichi os yw eich taliad yn un unwaith-yn-unig. Hysbysir yr holl ymgeiswyr o'r penderfyniadau drwy lythyr, p'un a fyddant yn llwyddiannus ai peidio.

Sylwch: Bydd yn bosibl trefnu taliad siec trydydd parti, er enghraifft, i'r Feithrinfa neu eich Landlord, os gofynnwch am hynny. Fodd bynnag, dim ond ar ffurf siec yn unig y gellir gwneud taliad. Siaradwch â'ch Cynghorwr Ariannol os ydych yn dymuno ystyried y dewis hwn.

Y Ffurflen Gais

Ar gyfer dibenion dyrannu grantiau o'r Gronfa Galedi, asesir myfyrwyr ar dystiolaeth diffyg yn eu hincwm a'u gwariant. Mae felly'n hanfodol eich bod yn rhoi dadansoddiad clir a chywir o'ch holl ffynonellau incwm ac ymrwymiadau cyllidol cyfreithlon. Mae'n bwysig eich bod yn llenwi'r ffurflen mor drwyadl ag y bo modd ac yn rhoi'r holl dystiolaeth ddogfennol angenrheidiol y gofynnwyd amdani i'n galluogi i brosesu'ch cais yn llwyddiannus.

Er mwyn cael ffurflen gais, dewch i’r Uned Cymorth.

Apeliadau

Mae gan bob ymgeisydd hawl i apelio os nad ydynt yn hollol fodlon â chanlyniad eu cais i'r Gronfa Galedi. Fodd bynnag, ystyrir apeliadau ond yn unig lle mae tystiolaeth bellach o amgylchiadau personol myfyriwr.

Gall myfyrwyr geisio am adolygiad yn y lle cyntaf, a dylent drefnu i gyfarfod â'r Cynghorwr Ariannol i drafod tystiolaeth bellach o amgylchiadau personol. Os yw'n briodol, bydd cais adolygedig yn cael ei ystyried gan Grwp Dyrannu yn eu cyfarfod nesaf. Rhoddir gwybod penderfyniad y Grwp Dyrannu i fyfyrwyr trwy lythyr.

Dylid gwneud unrhyw apêl bellach trwy lythyr at Bennaeth y Gwasanaethau Cefnogi Myfyrwyr, a fydd yn ei anfon ymlaen at Uwch Swyddog annibynnol yn y Brifysgol i'w ystyried. Rhoddir gwybod y penderfyniad i fyfyrwyr cyn gynted ag y bo modd.

Mae pob croeso i chi alw heibio i'r Uned Cymorth Ariannol os oes gennych unrhyw ymholiadau, neu os ydych angen cymorth gydag unrhyw ran o'r ffurflen.