Overview

Mae'r modiwl yma'n archwilio'r cerryntau gwleidyddol, economaidd, cymdeithasol a diwylliannol a effeithiodd ar Gymru yn dilyn 1939. Yn greiddiol mae'n anelu i archwilio'r cysyniad o 'ail-danio'r ddraig'. I ba raddau y newidodd ac yr ail-ddyfeisiodd Cymru'i hun rhwng yr Ail Ryfel Byd a throad yr 21ain ganrif? Sut y gall cenedligrwydd Cymreig gael ei ddadansoddi yn ystod y degawdau hyn? Beth oedd ystyr go iawn y term 'Cymreig'? Bydd y gor-gyffwrdd rhwng Prydeindod a Chymreictod yn gyd-destun i'r archwiliad yma, yn arbennig mewn cyswllt â materion megis cenedlaetholdeb wleidyddol, dadwreiddiad economaidd, diwylliant poblogaidd a diwygiadau i'r wladwriaeth les. Anogir myfyrwyr i drafod cyflwr hanesyddiaeth Cymru, ac i ddehongli rôl pleidiau gwleidyddol, grwpiau pwysedd a phrotest wrth lunio'r Gymru fodern. Bydd themâu megis rhywedd, hîl, dosbarth cymdeithasol, trefoli, iaith, crefydd a therfysgaeth yn ganolog i'r dadansoddiad. Cyfarwyddir myfyrwyr sut i archwilio ffynonellau gwreiddiol, gan gynnwys erthyglau papur newydd, llenyddiaeth, ffotograffau, hysbysebion, cerddoriaeth, ffilm, hanes llafar a blogiau. Bydd y mathau o ffynonellau eilaidd a ddefnyddir ar y modiwl o natur rhyng-ddisgyblaethol, gan gyfuno hanes gyda gwyddorau cymdeithasol, anthropoleg, daearyddiaeth wleidyddol, gwyddor wleidyddol ac astudiaethau cyfryngau.

Bydd y seminarau ar y modiwl hwn ar gael yn Gymraeg a gellir cyfathrebu â'r cydlynydd modiwl yn Gymraeg. Gall myfyrwyr gyflwyno gwaith ysgrifenedig yn Gymraeg neu'n Saesneg . Bydd y darlithoedd ar y modiwl yn Saesneg.

1. Cymru a'r Ail Ryfel Byd
2. Llymder y Pedwardegau (Austerity): Eira a glo
3. O sgiffl i pync: newid cymdeithasol ac economaidd 1950-1980.
4. 'Life in a Welsh Countryside': Y Gymru Wledig
5. ' Sunny Rhyl': Twristiaeth, pasiantau a Chymreictod
6. Cymru a Llafur
7. Cymru'r Ceidwadwyr?
8. Plaid Cymru and chenedlaetholdeb wleidyddol.
9. Tafodau'r Ddraig : iaith ac hunaniaeth yng Nghymru.
10. Meibion y Fflam?: protest, milwriaeth a mewnfudo
11. Cymru'r 1980au (Streic y Glowyr, Thatcheriaeth ayyb)
12. 'Bore da i Gymru?': Datganoli
13. Bêb Blair'?: Gwleidyddiaeth, pop a chymdeithas wedi 1997.
14. Taith maes: Taith un dydd i Lyfrgell Genedlaethol Cymru yn Aberystwyth i weld casgliadau archifol perthnasol i'r modiwl.

Assessment Strategy

50% Blog 50% Traethawd

Ymylol (Categori D- i D+) Wedi cwblhau lleiafswm o ddarllen a bydd y gwaith yn seiliedig ar nodiadau dosbarth a ffynonellau arwynebol yn bennaf. Bydd dealltwriaeth o agweddau o'r maes mewn gwaith ysgrifenedig, ond bydd problemau yn aml gyda'r dadansoddi, dealltwriaeth a'r strwythur. Bydd y gwaith yn ddealladwy i'w ddarllen, ond yn aml gyda nifer o wallau gramedegol.

Canolig (Categori C- i C+) Bydd myfyrwyr sydd yn cael graddau C- i C+ yn aml yn deall eu pwnc ond bydd eu trafodaeth o'r cwestiwn yn weddol gyffredinol ac ar brydiau'n gwyro oddi ar y testun. Gwneir ymdrech i gyflwyno dadl, er y bydd yn un anghyson o bosibl. Bydd gweithiau hanesyddiaethol yn cael eu defnyddio yn ddeallus, ond bydd y dadansoddi yn weddol sylfaenol. Bydd y cyflwyniad steilistig yn dderbyniol, gyda rhai mân wallau a phroblemau cystrawen o bosibl

Da (Categori B-i B+) Bydd myfyrwyr yn y categori yma'n arddangos ffocws penodol ar y cwestiwn, gan ddatblygu dadansoddi a dadleuon gweddol soffistigedig yn seiliedig ar hyn. Gwneir defnydd effeithiol o weithiau academaidd, gydag ymdrech deg i adnabod teithi meddwl hanesyddiaethol (er y gall hyn fod i lefel gweddol sylfaenol). Bydd y cyflwyniad steilistig yn eglur a chlir.

Ardderchog (Categori A- i A) Bydd myfyrwyr yn y categori yma'n arddangos sgiliau soffistigedig ymhob maes: dadansoddi, dadl, strwythur, gan wneud defnydd unigryw (yn arbennig ar lefelau uwch y categori) o hanesyddiaeth. Fel arfer, disgwylir i ffynonellau gwreiddiol gael eu hintigreiddio i'r drafodaeth, ac i'r lefelau uwch (A+ ac A) elfennau o wreiddioldeb mewn unrhyw un o'r prif agweddau (dadl, hanesyddiaeth ayyb).

Learning Outcomes

• Arddangos dealltwriaeth o newidiadau cymdeithasol,, gwleidyddol a diwylliannol yn ystod y cyfnod yng Nghymru.

• Datblygu a chynnal dadleuon hanesyddol ac ysgolheigaidd ar nodweddion penodol o'r cyfnod.

• Deall a dilysu'r modd mae'r cyfnod wedi'i gyfleu mewn ffynonellau eilaidd penodol.

• Targedu'r cymlethdodau o ail-lunio'r gorffennol, a natur broblematig ac amrywiol astudio hanes cenedlaethol ac is-genedlaethol.

• Ymgyfarwyddo gydag ystod eang o ffynonellau gwreiddiol, gan ddeall eu harwyddocâd hanesyddiaethol.