Gwaddol Dr Perrin: Ysbrydoli'r Genhedlaeth Nesaf o Arweinwyr Amgylcheddol
Mae pedwar project ymchwil amgylcheddol arloesol ar y gweill ar hyn o bryd ac yn llunio dyfodol ein planed. Mae pob un yn gam ymlaen yn y gwaith o ddatblygu gwybodaeth wyddonol wrth arfogi ein myfyrwyr a'n hymchwilwyr â'r sgiliau a'r profiadau sydd eu hangen arnynt i ddod yn arweinwyr yng ngwyddorau’r amgylchedd. Mae'r daith o leoliadau israddedig i ymchwil arloesol yn dangos effaith haelioni rhoddwyr wrth feithrin doniau a sbarduno arloesedd.
Bu’r cynnydd hwn yn bosibl diolch i waddol rhyfeddol Dr Robert Perrin, y mae ei angerdd dros ddeall a diogelu'r byd naturiol yn parhau trwy ei rodd i ymchwil amgylcheddol. Mae ei ymrwymiad yn parhau i ysbrydoli a grymuso ein hymchwilwyr, gan sicrhau bod ei weledigaeth ar gyfer dyfodol cynaliadwy yn parhau.
Rydym yn falch o gadarnhau bod pob un o'r pedwar lleoliad oedd yn rhan o Ysgoloriaeth Dr Robert Perrin wedi'u cwblhau'n llwyddiannus. Yn y crynodebau canlynol, mae ymchwilwyr a myfyrwyr yn rhannu eu profiadau. Straeon o dwf, darganfyddiad ac effaith ydyn nhw, sy'n bosibl oherwydd gwaddol hael Dr Perrin.
Diogelu Morfeydd Heli
Mae ecosystemau morfeydd heli yn hanfodol ar gyfer bioamrywiaeth, lliniaru newid hinsawdd ac amddiffyn arfordirol. Gelwir y mannau hyn yn aml yn "arennau'r ddaear," ac maent yn hidlo llygryddion a maetholion gormodol, gan gynnwys nitrad o wrteithiau, a all niweidio ansawdd dŵr a bywyd dyfrol.
Dan arweiniad Dr Karina Marsden, mae'r gwaith ymchwil hwn yn archwilio sut mae'r cynefinoedd hyn yn prosesu nitrad—gan ei drosi'n nwy nitrogen diniwed yn ddelfrydol. Fodd bynnag, o dan rai amodau, gallant ryddhau ocsid nitraidd, nwy tŷ gwydr sydd 273 gwaith yn gryfach na charbon deuocsid. "Gan ddefnyddio technegau arloesol, nod y project hwn yw deall a lleihau'r allyriadau hyn, gan sicrhau bod morfeydd heli yn parhau i fod yn elfen rymus yn y frwydr yn erbyn newid hinsawdd," meddai Dr Marsden.
Rwy'n ddiolchgar iawn i Dr Marsden a Dr Wen am eu tiwtora a'u harweiniad yn ystod y lleoliad, ac i ysgoloriaeth Dr Robert Perrin am ddarparu'r cyfle amhrisiadwy hwn. Mae wedi ehangu a gwella fy nealltwriaeth o briddoedd, cylchu maetholion ac allyriadau nwyon tŷ gwydr ac wedi rhoi cipolwg difyr i mi ar y technegau sydd ar gael i'w hastudio. Mae hyn wedi dyfnhau fy niddordeb mewn gwyddor pridd ac wedi rhoi amrywiaeth o sgiliau a phrofiad gwyddonol ymarferol i mi y byddaf yn eu defnyddio yn fy astudiaethau yn y dyfodol a, gobeithio, fy ngyrfa.
Anthony Gunning,
Ysgolhaig Dr Perrin, myfyriwr israddedig mewn gwyddor amgylcheddol
Canfod atebion i Lygredd Plastig yn y Môr
Mae llygredd plastig yn un o'r bygythiadau mwyaf dybryd i iechyd y cefnforoedd, gyda rhagolygon y bydd y meintiau'n treblu erbyn 2060 os yw tueddiadau heddiw yn parhau. Pan ganfu plastigion eu ffordd i ddŵr y môr, cânt eu gorchuddio’n gyflym gan fioffilmiau—haenau o ficro-organebau a rhywogaethau eraill—a all gyflymu dadelfeniad plastig a chynyddu'r risg o'i lyncu gan fywyd morol sy'n camgymryd plastigion bio-lygredig am fwyd.
Dan arweiniad Dr Winnie Courtene-Jones, mae'r ymchwil hwn yn archwilio sut mae gwahanol fathau o blastigion yn rhyngweithio â'r cymunedau bio-lygru hyn a sut mae hyn yn effeithio ar eu tynged yn yr amgylchedd morol. Drwy arbrofion arloesol mewn safleoedd penodol, mae'r tîm yn cynhyrchu data hanfodol ar fioamrywiaeth, cyfraddau olyniaeth, a phrosesau diraddiad gwahanol fathau o blastigau bio-seiliedig, bioddiraddadwy, a chonfensiynol. Drwy arbrofion arloesol yn y safleoedd hyn, mae'r tîm yn cynhyrchu data hanfodol ynghylch sut mae gwahanol fathau o blastig yn rhyngweithio â chymunedau bio-lygru. Bydd yr wybodaeth hon yn llywio asesiadau risg amgylcheddol ac yn tywys rheoleiddwyr tuag at strategaethau effeithiol i reoli a lliniaru llygredd plastig.
Mae'r gwaith arloesol hwn wedi'i wneud yn bosibl gan waddol hael Dr Robert Perrin, gan sicrhau bod ei angerdd dros amddiffyn y byd naturiol yn parhau i ganfod atebion i un o heriau amgylcheddol mwyaf dybryd ein hoes.
Bu’r ysgoloriaeth hon yn amhrisiadwy wrth lunio fy nyfodol mewn gwyddor môr, diolch i Dr Perrin. Roedd gweithio ochr yn ochr ag ymchwilwyr blaenllaw yn gyfle i mi ofyn cwestiynau, dysgu gan arbenigwyr, a mireinio fy nyheadau gyrfa. Dysgodd y profiad i mi fod gwyddoniaeth yn gofyn am fod yn hyblyg—mae dulliau'n newid, gall canlyniadau synnu, ac mae meddwl agored yn allweddol.
Canolbwyntiodd fy mhroject ar lygredd plastig yn y môr, gan ymchwilio i gymunedau bio-lygru ar wahanol ddefnyddiau, gan gynnwys plastigau confensiynol a bioddiraddadwy. Roedd arsylwi sut roedd y cymunedau hyn yn amrywio dros amser a rhwng gwahanol ddeunyddiau yn ddiddorol iawn, ac rwy'n edrych ymlaen at gynnal dadansoddiad microbaidd pellach i ddyfnhau ein dealltwriaeth o effaith plastigau ar ecosystemau morol.
Arwen Wall
Ysgolhaig Dr Perrin, myfyrwraig israddedig mewn Bioleg Môr ac Eigioneg
Diogelu Carbon y Cefnfor
Mae Dr Sophie Ward yn arwain ymchwil ynghylch sut mae treillio gwely’r môr —arfer pysgota cyffredin—yn effeithio ar storio carbon yn y cefnfor. Mae'r treillrwydi hyn yn tarfu ar waddodion carbon-gyfoethog ar wely'r môr, gan ryddhau deunydd sy'n helpu i reoleiddio’n hinsawdd.
Mae'r tîm yn mapio i ble mae'r gwaddodion hyn yn teithio ar ôl tarfu arnynt, gan ddefnyddio cofnodion treillio hanesyddol a data ynghylch ceryntau cefnforol. Bydd eu canfyddiadau’n llywio polisïau i amddiffyn storfeydd carbon glas ac ymateb yn well i faterion hinsawdd byd-eang.
"Mae'r gwaith hwn yn hanfodol i ddeall sut mae gweithgarwch dynol yn effeithio ar allu'r cefnfor i storio carbon," meddai Dr Ward.
Darlun ar y chwith: Cyfanswm Dwyster Pysgota â Threillrwyd fel map gofodol sy'n amlygu’r parthau a dreilliwyd yn bennaf rhwng 2020 - 2023,
Darlun ar y dde: map cerrynt Tymhorol Cymedrig yn dangos cyflymder a chyfeiriad y ceryntau yn ystod misoedd y gwanwyn (Mawrth, Ebrill, Mai) o 2020 i 2023
Mae interniaeth haf Dr. Perrin wedi rhoi cyfle i mi wella’n sylweddol fy sgiliau ymchwil ac archwilio materion Carbon Glas a threillio gwaelod y môr. Mae'r profiad hwn wedi rhoi sylfaen gref i mi ar gyfer fy MRes sydd ar y gorwel, gan fy helpu i deimlo'n barod i wneud y gorau ohoni o’r dechrau un. Rwy'n ddyledus iawn i Dr Perrin!
Marina de Llobet
Ysgolhaig Dr Perrin, myfyrwraig israddedig mewn Bioleg Môr ac Eigioneg
Adfer Dolydd Morwellt
Mae dolydd morwellt—sy’n hanfodol ar gyfer bioamrywiaeth, storio carbon, a diogelu'r arfordir—yn dirywio ledled y byd. Mae ymdrechion adfer yn aml yn aflwyddiannus oherwydd y diffyg goroesi wedi trawsblannu, ond gallai dulliau newydd newid hynny.
Dan arweiniad Dr Katie Dubois, mae'r project hwn yn archwilio sut y gall cyd-adfer morwellt ag infertebratau morol fel cocos, cregyn bylchog a mwydod hybu llwyddiant. Mae'r rhywogaethau hyn yn cyfoethogi gwaddodion yn naturiol ag ocsigen a maetholion, gan greu amodau sy'n helpu morwellt i ffynnu.
Mae'r ymchwil yn cyfuno treialon maes yng Ngogledd Cymru ag arbrofion rheoledig mewn tanciau dŵr môr yn Ysgol Gwyddorau’r Eigion Prifysgol Bangor. Bydd canfyddiadau'n llywio strategaethau adfer sy'n cryfhau ecosystemau morol ac yn mynd i'r afael â newid hinsawdd.
Mae'r gwaith hwn wedi'i wneud yn bosibl diolch i waddol y diweddar Dr Robert Perrin, y mae ei ymrwymiad dwfn i ddiogelu'r byd naturiol yn parhau i ysbrydoli cenedlaethau'r dyfodol. Mae ei rodd yn grymuso myfyrwyr i ennill profiad ymarferol mewn gwyddor cadwraeth wrth hyrwyddo ymchwil sy'n diogelu ein hamgylchedd am flynyddoedd i ddod.
Rhoddodd Ysgoloriaeth Dr Perrin gyfle anhygoel i mi archwilio gwaith ymchwil, darganfod diddordebau newydd, ac ennill profiad ymarferol mewn ecoleg morwellt. Mae gweithio ochr yn ochr ag ymchwilwyr ysbrydoledig a chymryd rhan mewn gwaith maes ac arbrofion labordy wedi cadarnhau fy uchelgais o ddilyn gyrfa mewn gwyddor môr. Rwy'n ddiolchgar iawn am y cyfle hwn i ddechrau fy nhaith tuag at ddyfodol boddhaus.
June Waddle
ysgolhaig Dr Perrin, myfyrwraig israddedig Bioleg Môr