Rydym yn ymfalchio yn y ffaith bod Prifysgol Bangor yn cael ei chydnabod yn rhyngwladol am ragoriaeth ei hymchwil. Cafodd ymchwil ym Mhrifysgol Bangor sgôr uchel yn y Fframwaith Rhagoriaeth Ymchwil 2014 diwethaf, a oedd yn cydnabod bod dros dri chwarter o ymchwil Prifysgol Bangor naill ai “gyda'r gorau yn y byd” neu'n “rhagorol yn rhyngwladol”. Yn ogystal â’r gyfran uchaf o staff dwyieithog Cymraeg/Saesneg yng Nghymru, gydag arbenigedd nodedig yn hanes a diwylliant Cymru a’r Gymraeg, daw ein hymchwilwyr o dros 30 o wledydd ar draws y byd, ac maent yn gweithio â chydweithwyr o dros 120 o wledydd.
Mae'r cysyniad bod ein gwaith yn cael effaith ar fywydau pobl yng Nghymru, y DU ac yn fyd-eang wrth wraidd ein hymchwil. Mae hyn wedi bod yn ethos canolog er 1884, pan sefydlwyd y Brifysgol gan gymuned Bangor i “wasanaethu anghenion cenedlaethau’r dyfodol”.
Mae diwylliant cryf o ymchwil rhyngddisgyblaethol arwyddocaol o bwys wedi tyfu yn ein hymchwil creiddiol mewn meysydd pwysig o angen cenedlaethol a byd-eang.
Mae arloesi'n seiliedig ar leoedd wrth wraidd llawer o'n hymchwil ac yn canolbwyntio ar gryfderau nodedig rhanbarth gogledd Cymru. Rydym wedi ymrwymo i gysylltu ein rhagoriaeth ymchwil ymhellach ag asedau rhanbarthol unigryw:
- Yr amgylchedd naturiol - ynni, adnoddau adnewyddol y môr, twristiaeth
- Treftadaeth - perfformio, celfyddydau creadigol, diwylliannol
- Iechyd a lles - darparwyr iechyd
Mae'r Brifysgol yn gwerthfawrogi ac yn buddsoddi yn natblygiad ymchwilwyr y dyfodol. Rydym yn cynnwys darpariaeth i fyfyrwyr ymchwil ôl-radd yn ein meysydd rhagoriaeth ymchwil unigryw wrth sicrhau profiad o ansawdd uchel wedi ei hwyluso gan Ysgol Ddoethurol y Brifysgol.
Rydym yn cymryd rhan weithredol mewn amrywiaeth o ganolfannau a rhaglenni hyfforddi doethurol cenedlaethol, ac yn rheoli rhaglen PhD/MRes KESS II sy'n canolbwyntio ar fusnes ledled Cymru ar ran holl sefydliadau addysg uwch Cymru.
Rydym wedi ymrwymo i gefnogi ein hymchwilwyr ar ddechrau eu gyrfa i ddatblygu'r sgiliau proffesiynol, technegol a rheoli project sydd eu hangen arnynt i bontio'r bwlch rhwng ymchwil ddoethurol ac ymchwil ôl-ddoethurol a thu hwnt i swyddogaethau arwain ymchwil annibynnol.