Mae'r Brifysgol yn cynnig ystod eang o adnoddau i’ch helpu i gyflawni eich amcanion ar ôl graddio. Mae’n dod yn gynyddol bwysig yn y farchnad swyddi heddiw i ddatblygu eich sgiliau personol a gwella eich cyflogadwyedd tra byddwch yn y brifysgol.
Gwobr Cyflogadwyedd Bangor (GCB)
Mae Gwobr Cyflogadwyedd Bangor yn gwrs ar-lein cynhwysfawr y gallwch ei wneud yn ôl eich cyflymder eich hun, gan fynd â chi trwy'r holl gamau y mae'n rhaid i chi eu cymryd i archwilio, paratoi a gwneud cais am eich gyrfa ddelfrydol, ac i adfyfyrio ar y profiadau y gellwch gymryd rhan ynddynt tra yn y Brifysgol i ddatblygu'ch cyflogadwyedd.
Mae'r Wobr ar agor i bawb a gall bod o fantais wrth chwilio am swydd ar ôl graddio.
Gwobrau Tîm Arwain Arloesedd ac Entrepreneuriaeth Prifysgol Bangor (BUILT)
Mewn partneriaeth â rhaglen Menter trwy Ddylunio y Brifysgol, mae BUILT yn gystadleuaeth flynyddol sy’n agored i holl fyfyrwyr Prifysgol Bangor lle mae cyfranogwyr ar draws yr holl ddisgyblaethau astudio a phob blwyddyn academaidd yn ffurfio timau o 5-10 i efelychu cwmni newydd ac i gynhyrchu syniadau a datblygu atebion ar gyfer her gymunedol benodol. Daw’r rhaglen i ben gyda’r timau’n cyflwyno eu syniadau i banel annibynnol, sy’n barnu pa dîm sydd wedi datblygu’r ateb mwyaf arloesol. Mae’r tîm buddugol yn derbyn cyllid a chefnogaeth i lansio a gweithredu eu cynnyrch neu wasanaeth, yn ogystal â mentoriaeth barhaus ac arweiniad gan arbenigwyr.
Mae mentoriaid sy’n gyn-fyfyrwyr yn cefnogi pob tîm ar hyd y ffordd i fireinio eu syniadau a’u hatebion, ac o bosib datblygu prototeip o’r cynnyrch neu wasanaeth. Mae sesiynau dysgu ar gyfer pob tîm yn cael eu hwyluso gan y Brifysgol drwy’r rhaglen Menter trwy Ddylunio – cyfres ddeg wythnos o weithdai sy’n canolbwyntio ar ysbrydoliaeth, creadigrwydd, cynaliadwyedd ac ymwybyddiaeth fasnachol – mewn meysydd fel sut i ddatblygu cynllun busnes a hanfodion cynllunio ariannol.
Mae BUILT yn ffordd wych o wella profiadau CV cyfranogwyr a chymwysterau cyflogadwyedd, gan fodloni gofynion y farchnad swyddi am feddwl arloesol a meddylfryd entrepreneuraidd. Trwy BUILT a Menter trwy Ddylunio, mae myfyrwyr yn datblygu ystod o sgiliau cyflogadwyedd, gan gynnwys gweithio mewn tîm, datrys problemau creadigol, cyfathrebu a sgiliau masnachol. Mae gweithio mewn tîm amlddisgyblaethol yn helpu cyfranogwyr i ddatblygu eu gallu i weithio gyda phobl o gefndiroedd a safbwyntiau gwahanol ac mae elfen arddangos a chyflwyno olaf yr her yn helpu i ddatblygu sgiliau siarad cyhoeddus a chyflwyno, sy’n werthfawr mewn llawer o yrfaoedd.
I gael rhagor o wybodaeth am y rhaglen, cysylltwch â Lowri Owen ar lowri.owen@bangor.ac.uk
Lleoliadau gwaith
Mae profiad gwaith yn bwysig er mewn sicrhau swydd ar ôl graddio. Ym Mhrifysgol Bangor rydym yn cynnig amrywiaeth o opsiynau i fyfyrwyr er mwyn sicrhau eu bod yn ennill sgiliau cyflogadwyedd gwerthfawr. Mae'r cymorth a ddarparwyd yn cynnwys cefnogaeth mewn unrhyw leoliad gwaith neu interniaeth hoffech eu cymryd.
O Fedi 2019 ymlaen, gall myfyrwyr israddedig newydd ar y rhan fwyaf o'n cyrsiau, ddewis cymryd rhan mewn lleoliad gwaith gwirfoddol ym Mlwyddyn 2, sy'n bythefnos o hyd (isafswm o 70 awr), neu gymryd rhan mewn Blwyddyn Lleoliad Gwaith sy'n flwyddyn allan rhwng Blynyddoedd 2 a 3 o'r cwrs gradd.
Byddwch yn derbyn cefnogaeth yn ystod y cyfnod yma gan aelod penodol o staff o fewn eich Ysgol Academaidd, a chaiff y profiad gwaith ei gydnabod yn briodol. Mae'r lleoliadau yma'n cynnig cyfle i chi ennill profiad gwerthfawr o weithio mewn maes sy'n gysylltiedig â'ch cwrs a byddwch hefyd yn datblygu eich sgiliau cyfathrebu wrth i chi drefnu'r lleoliad.
Bydd myfyrwyr sy'n gwneud y lleoliad bythefnos o hyd yn cael y cyfle i'w gynnwys yn eu Hadroddiad Cyflawniad Addysg Uwch (HEAR) ac fe fydd y rhai sy'n dewis gwneud y Flwyddyn Lleoliad Gwaith yn cael 'gyda lleoliad gwaith' ar eu teitl gradd.
Blwyddyn Lleoliad
Mae'r flwyddyn leoliad yn rhoi cyfle gwych i chi ehangu eich gorwelion a datblygu sgiliau a chysylltiadau gwerthfawr trwy weithio gyda sefydliad hunan-gyrchol sy'n berthnasol i'ch pwnc gradd.
Mae myfyrwyr blaenorol a phresennol wedi gweithio gydag amrywiaeth eang o ddarparwyr lleoliadau, yn amrywio o gwmnïau preifat i sefydliadau addysgol, elusennau, awdurdodau'r llywodraeth a sefydliadau anllywodraethol. Mae myfyrwyr wedi cael profiad gwaith gyda chwmniau fel Santander, Siemens Healthineers, Coutts , Venue Cymru, WRU, BBC Cymru, Zip World a Gen2.
Mae ein myfyrwyr sydd wedi ymgymryd â blwyddyn leoliad wedi tynnu sylw at sut mae'r profiad wedi eu helpu i ddatblygu rhwydweithiau amhrisiadwy, hyder a phrofiad bywyd ynghyd â gwybodaeth a sgiliau pwnc sydd wedi rhoi hwb i'w cyflogadwyedd.
Sylwch: Y ffi ar gyfer yr holl leoliadau a blynyddoedd rhyngwladol yw £1,350 (mynediad yn 2023).
Cynllun Interniaeth
Mae'r Brifysgol yn rhedeg cynllun interniaeth ddwywaith y flwyddyn, sy'n galluogi i fyfyrwyr israddedig ac ôl-raddedig weithio mewn maes proffesiynol ynghyd â dysgu sgiliau perthnasol ac ennill arian. Mae amrywiaeth o interniaethau ar gael, o ymchwil meddygol i farchnata. Mae interniaeth yn cynnig profiad gwaith gwerthfawr.
Gweithio tra'n astudio
CyswlltGyrfa ydy biwro cyflogaeth myfyrwyr y Brifysgol. Mae'n cynnig y cyfleoedd canlynol:
- Swyddi i raddedigion - Lleol, Cenedlaethol a Rhyngwladol
- Gwaith llawn a rhan-amser, parhaol a dros dro
- Lleoliadau gwaith ac interniaethau
- Cyfleoedd gwirfoddol
I weld y cyfleoedd yma ar CyswlltGyrfa mae angen i chi fewngofnodi gyda’ch cyfrif myfyriwr.
