Mae myfyrwyr Perfformio israddedig ym Mhrifysgol Bangor wedi ennill profiad gwerthfawr o ddatblygu a llwyfannu theatr mewn amgylchedd cynhyrchu proffesiynol trwy broject saith mis a gefnogir gan Gronfa Bangor.
Yn ystod blwyddyn academaidd 2025-26, datblygodd a chyflwynodd myfyrwyr gynhyrchiad ar raddfa lawn o Earthquakes in London gan y dramodydd clodwiw Mike Bartlett. Wedi'i llwyfannu yn Theatr Stiwdio Pontio ar 8 Mai 2026, roedd y cynhyrchiad yn arddangos sgiliau creadigol, technegol a chydweithredol y myfyrwyr wrth ddarparu profiad ymarferol o greu theatr gyfoes.
Dan arweiniad Uwch Ddarlithydd mewn Perfformio, Mrs Ffion Haf Evans, daeth y project â myfyrwyr, cydweithwyr o Adran y Celfyddydau Creadigol, timau creadigol a thechnegol Pontio, yr ymarferydd theatr Siwan Llynor, a'r cwmni theatr lleol Fran Wen ynghyd. Drwy gydweithio’n agos â gweithwyr proffesiynol y theatr, cafodd myfyrwyr brofiad uniongyrchol o fod yn rhan o broses gynhyrchu safonol y diwydiant, gan wella eu datblygiad artistig a’u sgiliau cyflogadwyedd.
Mae'r ddrama'n dilyn tair chwaer yn llywio perthnasoedd teuluol cymhleth tra bod eu tad, sy’n wyddonydd ac wedi ymddieithrio oddi wrthynt, yn rhagweld trychineb amgylcheddol. Drwy ei archwiliad o bryder am yr hinsawdd, cyfrifoldeb a bywyd cyfoes, heriodd y cynhyrchiad y myfyrwyr yn greadigol ac yn ddeallusol.
Tynnodd y myfyrwyr sylw at effaith y profiad ar eu datblygiad fel gwneuthurwyr theatr. Dywedodd un myfyriwr:
Gwnaeth fy ymchwil i theatr gyfoes a theatr ôl-ddramatig ddylanwadu ar y ffordd yr es ati i ymdrin â'r strwythur tameidiog, y trawsnewidiadau cyflym a symudiad yr ensemble o fewn y cynhyrchiad.
Gwnaeth myfyriwr arall sylw bod y project wedi eu helpu i feithrin hyder wrth arwain, cydweithio, cyfathrebu a gwneud penderfyniadau creadigol. Bydd y garfan nawr yn adeiladu ar y profiad hwn trwy ymweld â lleoliad newydd Theatr Clwyd yn yr Wyddgrug, lle byddant yn ymgysylltu ymhellach â gweithwyr proffesiynol y theatr a phrosesau cynhyrchu ledled gogledd Cymru.
Mae'r project hwn yn adlewyrchu ymrwymiad Prifysgol Bangor i addysg drawsnewidiol, gan roi cyfleoedd i fyfyrwyr weithio ochr yn ochr ag ymarferwyr proffesiynol wrth ddatblygu'r sgiliau artistig, y sgiliau technegol a’r sgiliau trosglwyddadwy a fydd yn cefnogi eu gyrfaoedd yn y dyfodol.
Dywedodd Ffion:
Diolch i'r cyn-fyfyrwyr y gwnaeth eu rhoddion a’u cefnogaeth i Gronfa Bangor y cyfle hwn yn bosibl.
Uchafbwyntiau o'r Arddangosfa Perfformiadau Theatr yn Pontio
Mae Cronfa Bangor, a weinyddir gan y Swyddfa Datblygu a Chysylltiadau Cyn-fyfyrwyr, yn gwella profiad myfyrwyr drwy gefnogi projectau sy'n darparu cyfleoedd dysgu eithriadol y tu hwnt i'r cwricwlwm.
Dysgwch ragor am gronfa Bangor
