I Claire Lober, myfyrwraig ddoethurol ym Mhrifysgol Bangor, mae ei brwdfrydedd dros lenyddiaeth ganoloesol Cymru wedi agor drysau ymhell y tu hwnt i ogledd Cymru.
Yn wreiddiol o Ohio, symudodd Claire i Fangor bedair blynedd yn ôl i wneud doethuriaeth Astudiaethau Celtaidd yn Ysgol y Gymraeg. Mae ei hymchwil yn edrych ar ddarogan ganoloesol fel math o ysgrifennu hanesyddol, wedi ei ysbrydoli gan ddiddordeb hirhoedlog yn y ffigur chwedlonol Myrddin a'i ddylanwad ar ganfyddiadau am orffennol Cymru.
Y tu hwnt i'w hymchwil, mae Claire wedi ymgolli yn iaith a diwylliant Cymru, gan astudio Cymraeg modern a chanoloesol ac astudio'r tirweddau, y cestyll a'r cymunedau sy'n ymddangos yn y llawysgrifau y mae'n eu hastudio.
Gyda chefnogaeth gan Fwrsariaeth Teithio Ryngwladol Wartski, teithiodd Claire i Nova Scotia, Canada, i gyflwyno ei hymchwil yng nghynhadledd 2026 y Celtic Studies Association of North America (CSANA). Galluogodd y fwrsariaeth iddi rannu ei gwaith gydag ysgolheigion blaenllaw ym maes llenyddiaeth ganoloesol Cymru ac ymgysylltu â'r datblygiadau diweddaraf ar draws maes ehangach Astudiaethau Celtaidd.
Galluogodd y gynhadledd Claire i feithrin cysylltiadau rhyngwladol ac astudio safbwyntiau newydd ar ieithoedd lleiafrifol ac ysgolheictod Celtaidd. Wedi hynny, cafodd ei gwahodd i ymuno â Bwrdd CSANA fel Rheolwr Cyfryngau Cymdeithasol, swydd sydd wedi caniatáu iddi gryfhau’r cysylltiadau rhwng Prifysgol Bangor, gogledd Cymru ac academyddion ledled gogledd America.
Meddai Claire:
Galluogodd Cronfa Wartski fi i gymryd rhan mewn cynhadledd ryngwladol a chyflwyno fy ymchwil i arbenigwyr blaenllaw ym maes Astudiaethau Celtaidd. Oherwydd y gronfa hon, roeddwn yn gallu cael trafodaethau manwl gyda chyd-fyfyrwyr ac academyddion o bob cwr o'r byd. Mae hyn wedi cael effaith enfawr ar fy ngwaith ac ni fyddai wedi bod yn bosib heb y fwrsariaeth hon.
Gwnaed y cyfle hwn yn bosib trwy Ymddiriedolaeth Wartski, a sefydlwyd er anrhydedd i Winifred ac Isidore Wartski. Mae eu hetifeddiaeth yn parhau i greu cyfleoedd i fyfyrwyr Prifysgol Bangor, gan eu galluogi i rannu eu harbenigedd ar y llwyfan byd-eang a meithrin cysylltiadau sy'n cyfoethogi eu gyrfa academaidd a chymuned ehangach y brifysgol.
Gweinyddir Cronfa Wartski gan y Swyddfa Datblygu a Chysylltiadau Cyn-fyfyrwyr, gyda'r Ysgol Ddoethurol yn cydlynu'r broses ymgeisio a dyfarnu i dderbynwyr Bwrsariaeth Teithio Rhyngwladol Wartski.
