Asesydd Arbenigol: Asesu Dysgwyr ag Anawsterau Llythrennedd a Dyslecsia yn Ymarferol Cyrsiau Byr a DPP - Mynediad yn

Mae Asesydd Arbenigol: Asesu Dysgwyr ag Anawsterau Llythrennedd a Dyslecsia yn Ymarferol yn gwrs datblygiad proffesiynol parhaus (DPP) asesedig, nad yw’n cynnwys credydau academaidd, a gyflwynir gan Brifysgol Bangor drwy Ganolfan Dyslecsia Miles.

Mae’r cwrs yn datblygu sgiliau asesu arbenigol, gan gynnwys asesu llythrennedd, profion seicometrig, asesu diagnostig ac ysgrifennu adroddiadau proffesiynol. Byddwch yn dysgu sut i weinyddu a dehongli asesiadau, gwerthuso’r canfyddiadau a gwneud argymhellion gwybodus sy’n seiliedig ar dystiolaeth.

Nid yw’r cwrs yn cynnwys credydau academaidd Prifysgol Bangor ac nid yw ei gwblhau’n llwyddiannus yn arwain at gymhwyster academaidd gan Brifysgol Bangor.

Gallwch ddilyn y cwrs hwn yn unigol neu fel rhan o’r Llwybr Hyfforddiant Proffesiynol Athro ac Asesydd Arbenigol.

Gweld y Llwybr Hyfforddiant Proffesiynol Athro ac Asesydd Arbenigol

Ar gyfer pwy mae’r cwrs hwn?

Gall y cwrs fod yn addas ar gyfer gweithwyr proffesiynol profiadol, gan gynnwys:

• athrawon
• tiwtoriaid llythrennedd arbenigol
• ymarferwyr Anghenion Dysgu Ychwanegol
• therapyddion lleferydd ac iaith
• gweithwyr proffesiynol eraill sy’n ymwneud ag asesu llythrennedd neu gefnogi dysgwyr ag anawsterau llythrennedd a dyslecsia.

Cyn dechrau’r cwrs hwn, rhaid i ymgeiswyr fod wedi cwblhau’n llwyddiannus Gwyddor Anawsterau Llythrennedd ar gyfer Ymyrryd ac Asesu a’r cwrs Ymarferydd Arbenigol, oni bai bod Canolfan Dyslecsia Miles wedi derbyn dysgu blaenorol cyfwerth yn ffurfiol.

Cysylltwch â Chanolfan Dyslecsia Miles os ydych wedi cwblhau hyfforddiant perthnasol gyda darparwr arall neu os nad ydych yn siŵr a ydych yn bodloni’r gofynion.

Beth fyddwch yn ei ddysgu?

Drwy’r cwrs, byddwch yn datblygu eich gallu i:

• ddewis a gweinyddu asesiadau llythrennedd ac asesiadau seicometrig priodol
• sgorio a dehongli canlyniadau asesiadau yn gywir
• gwerthuso cryfderau gwybyddol a meysydd lle ceir anhawster gan ddefnyddio data asesu
• integreiddio tystiolaeth o wahanol ffynonellau wrth ddod i gasgliadau diagnostig
• deall egwyddorion seicometreg a phrofion addysgol
• cynnal asesiadau yn foesegol ac yn broffesiynol
• llunio adroddiadau asesu diagnostig clir sy’n bodloni safonau proffesiynol cyfredol
• gwneud argymhellion gwybodus sy’n seiliedig ar dystiolaeth ar gyfer cymorth, ymyriadau ac addasiadau rhesymol
• myfyrio’n feirniadol ar eich ymarfer asesu.

Cydnabyddiaeth broffesiynol

Yn amodol ar ofynion cyfredol y sefydliad proffesiynol perthnasol, bydd cwblhau’r tri chwrs yn y llwybr yn llwyddiannus yn galluogi dysgwyr cymwys i wneud cais ar wahân am gydnabyddiaeth broffesiynol fel athro-asesydd arbenigol ac am Dystysgrif Ymarfer Asesu drwy gymdeithas broffesiynol sydd wedi’i chymeradwyo gan SASC, megis BDA, Patoss neu Dyslexia Action.

Nid yw cydnabyddiaeth broffesiynol, aelodaeth na Thystysgrif Ymarfer Asesu yn cael eu dyfarnu’n awtomatig gan Brifysgol Bangor. Rhaid i ddysgwyr wneud cais ar wahân a bodloni gofynion cyfredol y sefydliad perthnasol o ran cymhwystra, aelodaeth, y broses ymgeisio a ffioedd.

Hyd y cwrs a’r ymrwymiad astudio

Cyflwynir y cwrs dros chwe mis, gyda thri mis ychwanegol ar gael i gwblhau’r gwaith asesedig. Dylech felly ganiatáu hyd at naw mis i gwblhau’r cwrs.

Dylech gynllunio ar gyfer tua 12 awr o astudio annibynnol bob wythnos ochr yn ochr â’r addysgu, y gweithgareddau asesu ymarferol a’r hyfforddiant sy’n canolbwyntio ar asesu a drefnwyd.

Disgwylir i’r cwrs nesaf ddechrau ym mis Medi 2027.

Asesu

Gall y dulliau asesu gynnwys:

• aseiniadau ysgrifenedig sy’n archwilio’r ymchwil a’r fframweithiau damcaniaethol sy’n sail i asesu arbenigol
• asesiadau a gweithgareddau ar-lein
• adroddiadau myfyriol sy’n cefnogi arferion moesegol a phroffesiynol
• tystiolaeth wedi’i recordio sy’n dangos sgiliau asesu a rhyngweithio proffesiynol
• adroddiadau asesu diagnostig a luniwyd fel ymarfer
• tasgau asesu seicometrig ymarferol, gan gynnwys gweinyddu, sgorio a dehongli.

Defnyddir gweithgareddau ffurfiannol ac adborth gan diwtoriaid drwy gydol y cwrs i gefnogi eich dysgu a datblygiad eich ymarfer asesu. Defnyddir asesiadau crynodol i benderfynu a ydych wedi bodloni gofynion y cwrs.

Tiwtor

Ruth Elliott 

Arweinydd DPP Canolfan Dyslecsia Miles

Mae Ruth Elliott yn athrawes ac asesydd arbenigol plant ac oedolion ag anawsterau llythrennedd. Mae’n athrawes gymwysedig ac yn meddu ar AMBDA gyda Chymdeithas Dyslecsia Prydain. Hi yw Arweinydd DPP Canolfan Dyslecsia Miles ac mae hefyd yn creu cynnwys ac yn gweithredu fel cynghorydd ar gyfer prosiect CA:LON.

Beth fyddwch chi’n ei astudio ar y cwrs yma?

Mae’r cwrs yn datblygu’r wybodaeth a’r sgiliau ymarferol sydd eu hangen i gynnal asesiadau arbenigol o ddysgwyr ag anawsterau llythrennedd a dyslecsia.

Gall y pynciau gynnwys:

• egwyddorion asesu llythrennedd arbenigol ac asesu diagnostig
• seicometreg a phrofion addysgol
• dewis offer asesu priodol
• gweinyddu a sgorio asesiadau yn gywir
• dehongli data asesu llythrennedd a data asesu gwybyddol
• integreiddio tystiolaeth o wahanol ffynonellau
• gwneud penderfyniadau diagnostig
• arferion asesu moesegol a phroffesiynol
• ysgrifennu adroddiadau proffesiynol
• gwneud argymhellion sy’n seiliedig ar dystiolaeth ar gyfer cymorth ac addasiadau rhesymol.

Sut caiff y cwrs ei gyflwyno?

Cyflwynir y cwrs yn hyblyg drwy gyfuniad o addysgu byw ar-lein, deunyddiau dysgu wedi’u recordio, gweithgareddau ar-lein, cymorth gan diwtoriaid a gweithgareddau asesu ymarferol.

Efallai y gall dysgwyr sydd â mynediad at y deunyddiau asesu a ddefnyddir ar y cwrs gwblhau’r cwrs yn gyfan gwbl ar-lein.

Rhaid i ddysgwyr sydd angen defnyddio deunyddiau asesu a ddarperir gan Ganolfan Dyslecsia Miles fynychu sesiynau wyneb yn wyneb ym Mhrifysgol Bangor.Codir tâl ychwanegol o £120 am bob asesiad am ddefnyddio’r deunyddiau hyn a chyfleusterau asesu’r Ganolfan. Adolygir y tâl hwn bob mis Medi.

Cyflwynir yr addysgu drwy gyfrwng y Saesneg, gyda sesiynau arbenigol ychwanegol drwy gyfrwng y Gymraeg.

Mae rhai adnoddau a pheth gwaith asesedig ar gael drwy gyfrwng y Gymraeg neu’r Saesneg, ond rhaid cyflwyno adroddiadau asesu diagnostig ffurfiol yn Saesneg er mwyn bodloni’r gofynion proffesiynol presennol.

Ar gyfer blwyddyn academaidd 2026/27, y ffi am y cwrs unigol hwn yw £1,950.

Os byddwch yn archebu’r tri chwrs fel rhan o’r Llwybr Hyfforddiant Proffesiynol Athro ac Asesydd Arbenigol, cyfanswm y ffi ostyngol yw £4,750.

Gweld y llwybr hyfforddiant proffesiynol llawn

Codir tâl ychwanegol o £120 am bob asesiad ar ddysgwyr sydd angen defnyddio deunyddiau asesu a ddarperir gan Ganolfan Dyslecsia Miles. Adolygir y tâl hwn bob mis Medi.

Nid yw ffioedd sefydliadau proffesiynol allanol ar gyfer aelodaeth, cydnabyddiaeth broffesiynol neu Dystysgrif Ymarfer Asesu wedi’u cynnwys yn ffi’r cwrs.

Cyn dechrau’r cwrs hwn, rhaid i ymgeiswyr fod wedi cwblhau’r cyrsiau canlynol yn llwyddiannus:

• Gwyddor Anawsterau Llythrennedd ar gyfer Ymyrryd ac Asesu
• Ymarferydd Arbenigol: Addysgu Dysgwyr ag Anawsterau Llythrennedd a Dyslecsia.

Gellir ystyried dysgu blaenorol cyfwerth a gwblhawyd gyda darparwr arall, ond rhaid i Ganolfan Dyslecsia Miles ei dderbyn yn ffurfiol cyn i’r cwrs ddechrau.

Dylai ymgeiswyr hefyd:

• feddu ar o leiaf ddwy flynedd o brofiad perthnasol o weithio gyda phlant a phobl ifanc mewn rôl addysgol, therapiwtig neu gymorth dysgu
• meddu ar y sgiliau academaidd, y profiad proffesiynol a’r gallu angenrheidiol i ymgymryd ag astudiaeth broffesiynol ran-amser heriol a gwaith ymarferol asesedig
• meddu ar sgiliau darllen, ysgrifennu a chyfathrebu cryf
• gallu bodloni gofynion asesu ymarferol y cwrs.

Cysylltwch â Chanolfan Dyslecsia Miles os nad ydych yn siŵr a yw eich cymwysterau, eich profiad neu eich astudiaeth flaenorol yn bodloni’r gofynion.