Ynglŷn â’r Cwrs Yma
Wedi'i gynllunio i roi dealltwriaeth fanwl i fyfyrwyr o'r damcaniaethau a'r arferion sy'n sail i Gefnogi Ymddygiad yn Gadarnhaol (PBS), mae'r rhaglen MSc hon wedi'i bwriadu i’r rhai sy'n ceisio cymhwyster uwch mewn PBS.
Mae'r radd feistr hon wedi ei chynllunio i gefnogi ymarferwyr i ddatblygu ymarfer effeithiol, tosturiol sy'n seiliedig ar werthoedd. Yn ystod eu hastudiaethau, bydd myfyrwyr yn ystyried sut y gall Cefnogi Ymddygiad yn Gadarnhaol rymuso pobl i wneud newidiadau cadarnhaol yn eu bywydau. Mae Cefnogi Ymddygiad yn Gadarnhaol yn faes sy'n tyfu yn y Deyrnas Unedig gyda chyfleoedd cyflogaeth rhagorol mewn addysg, iechyd a gwasanaethau cymdeithasol.
Mae gweithwyr proffesiynol yn cael eu goruchwylio gan Gymdeithas Dadansoddi Ymddygiad y Deyrnas Unedig (DU-SBA.) Mae cofrestr gweithwyr proffesiynol UK-SBA wedi ei hachredu dan raglen cofrestr achrededig yr Awdurdod Safonau Proffesiynol . Rydym yn cymeradwyo ac yn cadw at werthoedd ymarfer a Chod Ymddygiad Moesegol a Phroffesiynol yr UK-SBA.
Mae'r MSc mewn Cefnogi Ymddygiad yn Gadarnhaol ym Mhrifysgol Bangor yn darparu'r gwaith cwrs ôl-radd sy'n angenrheidiol i fyfyrwyr wneud cais i gael eu hardystio yn y Deyrnas Unedig gyda'r UK-SBA. Mae hefyd yn ofynnol i ymgeiswyr am y UKBA(cert) gwblhau safonau goruchwylio a chymhwysedd yr UK-SBA.
Mae'r rhaglen hon yn arwain at radd Meistr. Gall myfyrwyr sy'n dymuno gwneud hynny adael y rhaglen ar ôl ennill Tystysgrif Ôl-radd (60 credyd) neu Ddiploma Ôl-radd (120 credyd) os nad ydynt yn dymuno parhau â'r cwrs MSc llawn.
Addysgir y cwrs fel dysgu o bell, cyfunol. Gellir dilyn y cwrs hwn yn rhan amser yn unig, ac mae wedi'i fwriadu ar gyfer ymarferwyr sy'n gweithio wrth astudio. Gall myfyrwyr gwblhau llawer o'u hastudiaethau yn eu hamser eu hunain, fodd bynnag, rhaid i fyfyrwyr fynychu seminarau ar-lein gorfodol am hanner diwrnod, unwaith y mis o fis Hydref i fis Mehefin.
Mae'r MSc llawn yn cynnwys chwe modiwl, a thraethawd hir a addysgir dros 2 flynedd. Mae myfyrwyr yn cymryd un modiwl ar y tro. Bydd pob modiwl yn cynnwys darlithoedd wedi'u recordio ymlaen llaw y gall myfyrwyr eu cyrchu yn eu hamser eu hunain ochr yn ochr â gwaith darllen a gwaith annibynnol. Ym Mhrifysgol Bangor, credwn fod seminarau byw yn angenrheidiol i ymarferwyr ddatblygu ymarfer Cefnogi Ymddygiad yn Gadarnhaol mewn modd moesegol ac wedi’i arwain gan werthoedd.
Bydd rhai myfyrwyr ar y cwrs MSc Cefnogi Ymddygiad yn Gadarnhaol eisoes mewn gwaith cyflogedig. Rydym yn hapus iawn i gyfarfod â myfyrwyr a hwyluso cyflwyniadau i gyflogwyr ledled y Deyrnas Unedig. Nid ydym yn trefnu lleoliadau i fyfyrwyr ar y cwrs MSc Cefnogi Ymddygiad yn Gadarnhaol.
Gall myfyrwyr sy'n gweithio dan oruchwyliaeth UKBA(cert) wneud cais i gwblhau practicwm yn hytrach na thraethawd hir ymchwil. Bydd myfyrwyr sy'n cofrestru i wneud y profiad dysgu ymarferol yn derbyn goruchwyliaeth sy’n seiliedig ar Fframwaith Cymhwysedd UKBA(cert). Bydd cyfle gan fyfyrwyr ar y profiad dysgu ymarferol i gwblhau astudiaethau achos clinigol yn lle project ymchwil i gyflawni gofynion eu traethawd hir. I fod yn gymwys i gofrestru ar y profiad dysgu ymarferol, rhaid i fyfyrwyr fod yn aelodau ymarferol o'r UK-SBA.
Cynnwys y Cwrs
Beth fyddwch chi’n ei astudio ar y cwrs yma?
Bydd y cwrs hwn yn cael ei addysgu dros ddwy flynedd. Gall y modiwlau gynnwys:
- Cyflwyniad i Weithdrefnau Newid Ymddygiad
- Asesu mewn Gwyddor Ymddygiad
- Cefnogi Ymddygiad yn Gadarnhaol
- Gweithdrefnau Newid Ymddygiad Uwch
- Dulliau Ymchwil mewn Gwyddor Ymddygiad
- Practicwm mewn Cefnogi Ymddygiad yn Gadarnhaol* neu Traethawd hir mewn Cefnogi Ymddygiad yn Gadarnhaol
*Gall myfyrwyr sy'n gweithio dan oruchwyliaeth UKBA(cert) wneud cais i gwblhau practicwm yn hytrach na thraethawd hir ymchwil. Rhaid i fyfyrwyr sy'n dewis yr opsiwn practicwm weithio fel ymarferydd Cefnogi Ymddygiad yn Gadarnhaol am o leiaf 15 awr yr wythnos. Rhaid i'r lleoliad gael ei oruchwylio gan rywun sy’n meddu ar dystysgrif UKBA a all ddarparu goruchwyliaeth ar y safle. Gall y myfyrwyr drefnu lleoliadau gyda chytundeb ymlaen llaw gan arweinydd y cwrs. Bydd rhaid cael contract wedi ei gytuno a’i lofnodi gyda Phrifysgol Bangor cyn cymeradwyo'r lleoliad.
Caiff y cwrs ei ddysgu trwy gyfuniad o’r isod:
- Darlithoedd
- Seminarau
- Gwaith grŵp
- Goruchwylio traethawd hir
- Hunan-astudiaeth
- Lleoliadau clinigol*
* Gall myfyrwyr sy'n gweithio dan oruchwyliaeth UKBA (cert) wneud cais i gwblhau practicwm yn hytrach na thraethawd hir ymchwil.
Bydd yr asesu’n cynnwys cymysgedd o’r canlynol:
- Arholiadau
- Cyflwyniadau
- Adroddiadau achos
- Traethodau
- Traethawd hir ymchwil
Syniad bras o gynnwys y cwrs yn unig yw’r wybodaeth yma a gall newid.
Gofynion Mynediad
Gradd israddedig 2(ii) neu gyfwerth o leiaf. Gall ymgeiswyr hŷn (25+ ar ddechrau'r cwrs) heb radd ond sydd â phrofiad perthnasol hefyd gael mynediad i'r cwrs ar lefel tystysgrif. Gall profiad clinigol perthnasol gynnwys gwaith â thâl neu waith gwirfoddol mewn ysgolion, cartrefi gofal, gwasanaethau oedolion, gwasanaethau iechyd meddwl ac ati a bydd cyfarwyddwr y cwrs yn ei adolygu fel y bo'n briodol. Ar ôl cwblhau'r cwrs tystysgrif yn llwyddiannus, bydd ymgeiswyr o'r fath yn gymwys i symud ymlaen i'r diploma a'r lefel meistr.
IELTS: Gofynnir am 6.5 (heb unrhyw elfen dan 6.0). Rhaid cyflwyno ceisiadau electronig i'r ysgol erbyn 1 Mai bob blwyddyn. Cysylltir ag ymgeiswyr posib sy'n bodloni'r holl feini prawf eraill i gael cyfweliad byr gyda chyfarwyddwr y cwrs. Bydd cyfweliadau'n cael eu cynnal naill ai'n bersonol neu trwy gyfrwng telegynadledda. Cynigir lleoedd erbyn diwedd mis Mehefin.
Nodwch: Efallai fydd cost ychwanegol am wiriad DBS Manwl (tua £65).
Gyrfaoedd
Mae'r radd MSc hon mewn Cefnogi Ymddygiad yn Gadarnhaol ym Mhrifysgol Bangor wedi'i datblygu gan UKBA(cert) mewn cydweithrediad â'r UK-SBA. Mae ymarferwyr yn aml yn gweithio ym maes addysg a gwasanaethau iechyd.
Yn ystod y radd bydd myfyrwyr yn ennill sgiliau ymarferol mewn dylunio ymchwil, dadansoddi a thechnoleg gwybodaeth ar gyfer ymchwilio i gwestiynau ymchwil mewn seicoleg a'r gwyddorau cymdeithas. Yr un mor bwysig, mae'r rhaglen meistr hon mewn Cefnogi Ymddygiad yn Gadarnhaol yn darparu hyfforddiant ar gyfathrebu canfyddiadau ymchwil i eraill.
Ym Mhrifysgol Bangor, rydym wedi bod yn hyfforddi ymarferwyr mewn Cefnogi Ymddygiad yn Gadarnhaol ers dros 20 mlynedd. Mae ein myfyrwyr wedi mynd ymlaen i sefydlu ymarfer mewn addysg, gofal iechyd a gwasanaethau cymdeithasol. Mae gennym hanes cryf o helpu graddedigion i wneud cysylltiadau i ddatblygu eu gyrfaoedd a dod o hyd i waith cyflogedig.
