Cyflwynodd Harry ymchwil sy’n edrych ar fadfall werdd brin a geir yn uchel yng nghoedwigoedd cwmwl Borneo. Gan weithio ochr yn ochr â’i oruchwyliwr, James Hicks (Staff), a’r cydweithredwr allanol Dr Evan Quah o Brifysgol Malaysia Sabah, nod y prosiect yw penderfynu a yw’r ymlusgiad anodd ei weld yn cynrychioli rhywogaeth sy’n newydd i wyddoniaeth.
Mae’r ymchwil yn adeiladu ar waith maes a wnaed yn Borneo y llynedd, pan deithiodd y tîm i goedwigoedd cwmwl hynafol y rhanbarth i ddod o hyd i’r fadfall nad oes llawer yn hysbys amdani, a’i thynnu mewn ffotograffau yn ei chynefin naturiol.
Dr James a Harry SAGE 2026
Wrth sôn am y wobr, dywedodd James Hicks (Staff):
“Rhoddodd Harry gyflwyniad rhagorol yn y gynhadledd a chynrychiolodd Fangor yn eithriadol o dda. Mae derbyn cydnabyddiaeth fel y siaradwr myfyriwr gorau yn yr holl ddigwyddiad yn gyflawniad gwych ac yn adlewyrchu safon yr ymchwil y mae wedi’i gwneud yn ystod ei MScRes.”
Mae gwaith Harry yn rhan o ymchwil ehangach Prifysgol Bangor ym meysydd bioamrywiaeth, esblygiad a chadwraeth, a disgwylir i’r canfyddiadau gael eu cyhoeddi yn ystod y misoedd nesaf.
Mae’r wobr yn tynnu sylw at y cyfleoedd sydd ar gael i fyfyrwyr Bangor gyfrannu at ymchwil sydd ag enw da yn rhyngwladol ac ennill profiad uniongyrchol o waith maes gwyddonol ledled y byd. Dechreuodd Harry ei daith academaidd ym Mangor drwy raglen Sŵoleg gydag Herpetoleg y Brifysgol, sy’n cyfuno dysgu yn yr ystafell ddosbarth â phrofiad ymarferol ym maes cadwraeth ac ymchwil.
Wrth i Harry gwblhau ei radd meistr, mae’r gydnabyddiaeth hon yn ein hatgoffa o’r hyn y gall chwilfrydedd, ymroddiad ac angerdd dros fywyd gwyllt arwain ato o goedwigoedd Borneo i lwyfan cynhadledd wyddonol ryngwladol.