Chris Dennis

"Mae gennyf atgofion melys iawn o astudio yng nghorsydd Ynys Môn ac Eryri"

Bu Bangor yn amgylchedd perffaith i Chris Dennis (Ecoleg Daear a Môr Gymhwysol, 2011) ddilyn ei ddiddordeb mewn natur.

“Graddiais o Brifysgol Bangor yn 2011 gyda BSc mewn Ecoleg Daear a Môr Gymhwysol. Mae gennyf ddiddordeb mewn natur erioed ac, ar ôl mynd i ddiwrnod agored, dewisais ddod i astudio ym Mangor yn rhannol oherwydd y bywyd gwyllt anhygoel sydd gerllaw, ond hefyd oherwydd y llwybrau beicio mynydd anhygoel, sef fy ail ddiddordeb!

Gwnes fwynhau fy amser ym Mangor yn fawr ac roedd y cwrs yn rhagorol gyda theithiau maes gwych mewn amrywiaeth eang o gynefinoedd sydd yn agos iawn at y brifysgol. Astudiais yn Ysgol Gwyddorau’r Amgylchedd sydd â darlithwyr gwych, gan gynnwys gwyddonwyr byd-enwog sy'n arwain yn eu meysydd. Roedd y brifysgol yn gefnogol iawn yn ystod fy nghyfnod fel myfyriwr, yn enwedig y Gweinyddu a Gwasanaethau Myfyrwyr. Fi oedd capten y clwb beicio mynydd ac roeddwn yn byw yn neuadd Rathbone a helpodd hynny i mi ddod i adnabod grŵp gwych o bobl yn dda iawn ac mewn cyfnod byr o amser, gan fy helpu i ymgartrefu ym mywyd y brifysgol.

Ar ôl graddio es ymlaen i weithio fel warden preswyl yng ngwarchodfa RSPB Dungeness yng Nghaint, ac yn fuan wedi hynny cefais gynnig fy swydd gyntaf fel ecolegydd cynorthwyol yn gweithio i ymgynghoriaeth yn Derby.

Ar ôl blwyddyn o ddysgu am faes ymgynghoriaeth, cefais swydd debyg gydag Amec (Wood bellach) yn Llundain, yn gweithio yn eu swyddfa yn Angel Gate. Rhoddodd hyn y cyfle i mi ennill profiad mewn amrywiaeth eang o brojectau, yn cynnwys datblygiadau tai ar raddfa fach a monitro SSSIs, a darparu cefnogaeth ecoleg ar gyfer projectau seilwaith o bwysigrwydd cenedlaethol fel meysydd awyr a gorsafoedd ynni niwclear.

Rwyf wedi gweithio i'r cwmni ers dros 8 mlynedd ac rwyf bellach yn arwain tîm ecoleg Llundain yn eu swyddfa yn Canary Wharf. Fi hefyd yw'r prif acolegydd ar gyfer gorsaf niwclear Hinkley Point C yng Ngwlad yr Haf, sef y project mwyaf yn Ewrop, ac mae'n broject hynod ddiddorol i weithio arno. Mae gennyf ddiddordeb mawr mewn natur o hyd ac rwy'n defnyddio fy ngwybodaeth i sicrhau canlyniadau cadarnhaol i fioamrywiaeth yn ystod datblygiad ac wedi hynny trwy fesurau fel gwrthbwyso a chymryd rhan mewn cynlluniau enillion net bioamrywiaeth (BNG).

Rwy’n hapus iawn fy mod wedi astudio ym Mangor a rhoddodd fy nghwrs sylfaen wirioneddol wych i mi ym maes ecoleg. Yn ddiweddar, dyfarnwyd statws gwyddonydd siartredig i mi gan yr Institution of Environmental Sciences (IES), ac mae hyn yn rhannol oherwydd bod fy nghwrs prifysgol wedi ei achredu gan yr IES. Mae'r cysylltiad hwn yn hynod fuddiol o ran rhwydweithio a chyflogadwyedd.

Mae gennyf atgofion melys iawn o astudio yng nghorsydd Ynys Môn ac Eryri a byddaf yn ymweld â’r ardal pob cyfle posib.”