Dod â chymunedau ynghyd o fewn myfyrwyr Ysgol y Celfyddydau, Diwylliant a Ieithoedd

Mae project Dod â Chymunedau Ynghyd wedi trawsnewid bywyd myfyrwyr yn yr Ysgol Iaith, Diwylliant a’r Celfyddydau yn ystod blwyddyn academaidd 2024–25. Gyda chefnogaeth Cronfa Bangor, mae myfyrwyr wedi mwynhau cyfleoedd sy'n cyfoethogi eu hastudiaethau, yn cryfhau cyflogadwyedd, ac yn creu atgofion parhaol.

Yr hyn sydd wrth wraidd y fenter yw dosbarthiadau meistr proffesiynol mewn sawl maes creadigol megis gwneud ffilmiau, cyfansoddi cerddoriaeth a chyfarwyddo ar gyfer y teledu. Rhoddodd y sesiynau hyn fynediad uniongyrchol i fyfyrwyr at arbenigwyr yn y diwydiant, gan gynnig mewnwelediadau ymhell y tu hwnt i'r hyn a geir yn yr ystafell ddosbarth. Un uchafbwynt oedd gweithdy gyda'r cyfansoddwr John Metcalf, lle bu’r myfyrwyr yn trafod ei waith a chael mewnwelediad amhrisiadwy i dechnegau cyfansoddi. Sesiwn gofiadwy arall oedd sesiwn yng nghwmni’r addysgwr cerddoriaeth Berwyn Jones, a fu’n ysbrydoli’r myfyrwyr gyda dulliau ymarferol o wneud addysg gerddoriaeth yn hygyrch. Fel y dywedodd Ava, sy’n fyfyrwraig yn y drydedd flwyddyn, “Roedd cael clywed be mae o wedi ei wneud yn ystod ei yrfa yn ysbrydoli rhywun."

Aeth y rhaglen ati hefyd i feithrin ymdeimlad o gymuned wrth i fyfyrwyr a staff rannu profiadau. Daeth myfyrwyr a staff ynghyd mewn gweithdy Llythrennedd Bwyd dan arweiniad Cegin y Bobl er mwyn dysgu sut i wneud bara a dysgu am arferion bwyd cynaliadwy, gan ennyn brwdfrydedd a galwadau ar i hyn gael ei wneud yn rhan o'r cwricwlwm. Yn y cyfamser, aeth myfyrwyr llenyddiaeth Saesneg ar ymweliad â Llyfrgell John Rylands ym Manceinion, a chael ymgolli yng nghanol llawysgrifau prin a thestunau hynafol. Yn achos Hadeel, sy’n fyfyrwraig MA, roedd y profiad yn teimlo “fel teithio trwy amser,” gan greu cysylltiad pwerus â hanes.

Y tu hwnt i'r digwyddiadau hyn, bu ymchwilwyr ôl-radd ar eu hennill o gael cyfleoedd i rwydweithio sy’n hanfodol wrth sicrhau llwyddiant academaidd a phroffesiynol yn y dyfodol. Gyda'i gilydd, mae'r profiadau hyn wedi meithrin hyder, sgiliau, ac ymdeimlad o berthyn a fydd yn para ymhell wedi i’r myfyrwyr hyn raddio. Mae'r project yn dangos sut mae haelioni cyn-fyfyrwyr drwy gyfrwng Cronfa Bangor yn creu ecosystem fywiog o ddysgu ac wir yn creu cymuned. Bydd y myfyrwyr yn gadael Bangor nid yn unig gyda gradd, ond gyda rhwydweithiau proffesiynol, sgiliau ymarferol, ac atgofion annwyl — a bydd y pethau hyn yn sylfaen y gallant fanteisio arnynt yn eu gyrfaoedd ac, ymhen amser, eu trosglwyddo i genedlaethau'r dyfodol.

Dywedodd Dr Elena Hristova, arweinydd y project a darlithydd ym maes Ffilm a'r Cyfryngau: 

Fel yr un a roddodd fod i’r project Dod â Chymunedau Ynghyd, hoffwn ddiolch i Gronfa Bangor am eu harweiniad ac am wneud y project hwn yn bosibl. Mae staff yr Ysgol Iaith, Diwylliant a’r Celfyddydau wedi cynllunio profiadau gwerth chweil iawn a chyfoethogol i'n myfyrwyr, ac mae wedi bod yn fraint dod â'r profiadau hynny ynghyd o fewn un cynnig ysgol gyfan. Profiad gwerthfawr ac ysbrydoledig iawn oedd gweld y cyffro a deimlai ein myfyrwyr wrth ddod i gyswllt â’r naill a’r llall yn ogystal â dod i gyswllt â gweithwyr proffesiynol ac arbenigwyr o wahanol ddiwydiannau. Maen nhw wir wedi manteisio ar y cyfle i adeiladu cymuned oddi fewn ac oddi allan i'r Brifysgol a rhannu'r profiadau a'r cyfleoedd hynny gyda’r gymuned ehangach o gyn-fyfyrwyr.