Ymarfer ystafell ddosbarth cynhwysol Short Courses and CPD - Mynediad yn

Archwilio dadleuon allweddol ar gynhwysiant ac Anghenion Dysgu Ychwanegol (ADY) ar draws ysgolion ac Addysg Bellach (AB). Mae'r modiwl hwn yn cyfuno damcaniaethau gydag arfer gorau, gan annog myfyrio beirniadol ar bolisi ADY a'i gymhwyso yn yr ystafell ddosbarth. Bydd myfyrwyr yn datblygu strategaethau cynhwysol, yn ymgysylltu mewn dysgu cydweithredol, ac yn gwerthuso dulliau byd go iawn o gefnogi anghenion amrywiol dysgwyr.

I bwy mae’r cwrs hwn yn addas? 

Ymarferwyr sy'n gweithio ar hyn o bryd yn y sector addysg. Gall hyn gynnwys, ond nid yw'n gyfyngedig i: 

• Uwch arweinwyr 
• Athrawon 
• Cynorthwywyr addysgu 
• Cydlynwyr Anghenion Dysgu Ychwanegol 
• Ymarferwyr sy'n gweithio yn yr awdurdod lleol 
• Partneriaid gwella ysgolion 
• Staff Estyn 

Pam astudio’r cwrs?

Erbyn diwedd y modiwl, dylai'r myfyriwr allu:

1. Ymgysylltu'n feirniadol â dadleuon ynghylch cynhwysiant mewn addysg, gan gynnwys y rhai sy'n ymwneud â dysgwyr mwy abl.
2. Dadansoddi cryfderau a gwendidau polisi ADY yn eu cyd-destun. 
3. Dadansoddi heriau allweddol sy'n creu rhwystrau i gefnogi anghenion dysgwyr ag ADY a sut y dylid mynd i'r afael â’r heriau yn yr ystafell ddosbarth.
4. Herio arfer cyfredol yn feirniadol ac yn greadigol, yn seiliedig ar eu gwybodaeth a'u dealltwriaeth o ffactorau sy'n effeithio ar ADY. 
5. Archwilio cydweithio effeithiol ag eraill i gefnogi dysgwyr yn yr ystafell ddosbarth 

Pa mor hir mae'n ei gymryd i gwblhau'r cwrs? 

Mae'r cwrs byr hwn yn rhedeg dros un ar ddeg wythnos. Disgwylir i fyfyrwyr weithio trwy lyfrau gwaith hunan-dywys a mynychu dau ddiwrnod addysgu ar-lein 7 awr dros y penwythnos.

Gwybodaeth am asesiadau 

Mae'r modiwl hwn yn gofyn i fyfyrwyr greu 'blwch offer' 4000 o eiriau i gefnogi arfer cynhwysol yn yr ystafell ddosbarth ac adlewyrchiad o'i effeithiolrwydd yn yr ystafell ddosbarth.

Beth fyddwch chi’n ei astudio ar y cwrs yma?

Mae'r modiwl hwn yn cynnig archwiliad beirniadol o Anghenion Dysgu Ychwanegol (ADY) ac arfer cynhwysol ar draws cyd-destunau addysgol, o ysgolion i addysg bellach. Bydd dysgwyr yn ymgysylltu â dadleuon cyfredol ac yn archwilio'r dirwedd bolisi sy'n esblygu yng Nghymru, gan ddatblygu dealltwriaeth ar sut y gellir cymhwyso strategaethau cynhwysol yn ystyrlon yn eu lleoliadau eu hunain.

Trwy astudio damcaniaethau allweddol ac ymchwil gyfoes, bydd myfyrwyr yn datblygu dealltwriaeth fanwl o ADY, gan gynnwys sut mae polisi, damcaniaeth ac arfer yn croestorri. Mae'r modiwl yn cefnogi myfyrwyr i ddadansoddi cryfderau a chyfyngiadau'r ddarpariaeth ADY gyfredol, gyda ffocws penodol ar nodi a mynd i'r afael â rhwystrau yn yr ystafell ddosbarth sy'n effeithio ar ddysgwyr ag anghenion ychwanegol - gan gynnwys dysgwyr mwy abl.

Mae cydweithio a deialog broffesiynol yn rhan ganolog o'r profiad dysgu, gan ganiatáu i fyfyrwyr rannu arferion gorau a gwerthuso dulliau byd go iawn yn feirniadol. Drwy archwilio astudiaethau achos a thynnu o safbwyntiau rhyngwladol a chenedlaethol, bydd myfyrwyr yn cael eu hannog i herio arferion cyfredol yn greadigol a datblygu strategaethau i wella addysgu cynhwysol.

Erbyn diwedd y modiwl, bydd dysgwyr wedi'u cyfarparu i fyfyrio'n feirniadol ar eu harfer eu hunain, gweithio ar y cyd i gefnogi dysgwyr amrywiol, a gweithredu dulliau gwybodus a chynhwysol sy'n ymateb i realiti cymhleth yr ystafell ddosbarth.

Gwybodaeth bellach 

Mae pob llyfr gwaith ar-lein ar gael yn ddwyieithog. Lle bo modd, cynigir sesiynau cydamserol ar-lein yn y Gymraeg a'r Saesneg. Fodd bynnag, nodwch, os nad oes digon o gyfranogwyr sy'n siarad Cymraeg i alluogi trafodaeth ystyrlon, efallai y cewch wahoddiad i ymuno â sesiwn cyfrwng Saesneg. 

Mae y cwrs hon yn £975.00

Mae angen i ymgeiswyr fod â gradd israddedig mewn unrhyw bwnc. Er mwyn cwblhau gweithgareddau myfyriol o fewn y llyfrau gwaith a'r aseiniadau, bydd rhaid i ymgeiswyr hefyd fod mewn rôl gyfredol o fewn y sector addysg.

Lefel o sgiliau iaith Saesneg 

Rhugl 

Lefel o sgiliau iaith Cymraeg 

Rhugl, os ydych chi am gymryd rhan drwy'r llwybr cyfrwng Cymraeg. 
 
Nid oes angen os ydych chi'n cwblhau'r cwrs drwy gyfrwng y Saesneg

Sut i wneud cais

Gwnewch yn siŵr eich bod yn darllen ac yn dilyn y canllaw cais cam wrth gam gan y bydd hyn yn nodi pa adrannau o'r ffurflen gais sy'n orfodol ar gyfer y math o gwrs rydych am wneud cais amdano ac arbed amser i chi.

Paratowch y wybodaeth ganlynol (mewn dogfen Word):

• Manylion cyflogaeth cyfredol;
• Blynyddoedd o brofiad, a hanes cyflogaeth (lle bo hynny'n berthnasol)
• Enw'r aelod staff a'r sefydliad sydd wedi cymeradwyo eich cyllid ar gyfer y modiwl hwn.

• Bydd hyn yn cyflymu'r broses o lenwi'r ffurflen gais.