Bydwreigiaeth BM (Anrh) Israddedig - Mynediad: Medi 2023/24*

Mae'r cwrs hwn yn dechrau yn Medi 2023 a Mawrth 2024.

Swyddogaeth y fydwraig yn hyrwyddo genedigaeth ffisiolegol normal yw prif ffocws y cwrs hwn a Phrifysgol Bangor yw'r unig brifysgol yng Nghymru sydd ag achrediad Baby Friendly Initiative (BFI) UNICEF. Byddwch yn archwilio sut mae'r fydwraig yn ymdrechu i sicrhau iechyd a’r profiad geni gorau posibl i'r fam a'r newydd-anedig i bob menyw a'u teuluoedd ac rydym yn cynnig lleoliadau clinigol mewn amrywiaeth o leoliadau sy'n cynnwys lleoliadau cymunedol, unedau mamolaeth ac unedau dan arweiniad bydwragedd.

Mae’r Ysgol Gwyddorau Iechyd yn cynnig rhaglen gradd Baglor Bydwreigiaeth (Anrhydedd) tair blynedd, lawn-amser yn arwain at gofrestru fel bydwraig gyda Chyngor Nyrsio a Bydwreigiaeth y DU (NMC). Ar hyn o bryd mae'r rhaglen hon yn dechrau yn flynyddol ym mis Medi ac mae'n llawn amser dros 45 wythnos bob blwyddyn gyda 7 wythnos o wyliau blynyddol penodol. 

Ar ôl bloc cychwynnol o theori, bydd profiadau lleoliadau clinigol, sy'n ffurfio tua hanner eich dysgu, yn eich cyflwyno i swyddogaeth y fydwraig, yn y gymuned ac yn yr ysbyty, lle cewch gyfleoedd i fod yn bresennol mewn genedigaethau gartref yn ogystal â genedigaethau mewn unedau ar wahân dan arweiniad bydwragedd ac unedau mamolaeth lleol. Byddwch yn cael profiad o waith tîm amlddisgyblaethol, yn ogystal â staff academaidd yn gweithio mewn partneriaeth â darparwyr iechyd lleol, gan gynnwys Bwrdd Iechyd Prifysgol Betsi Cadwaladr, sy'n sicrhau bod eich dysgu o'r ansawdd gorau. Bydd y daearyddiaeth leol yn golygu y gallwch gael profiadau ar leoliad mewn lleoliadau gwledig ac anghysbell.  Mae gan ein staff ystod eang o brofiad clinigol yn eu meysydd proffesiynol ac maent yn arwain ym maes gofal iechyd a rhaglenni ymchwil cysylltiedig â meddygaeth sy'n trawsnewid ansawdd a darpariaeth gofal iechyd yng Nghymru ac yn rhyngwladol.

Yn ogystal, rydym yn rhagweld y bydd lleoliadau dewisol yn dal i fod ar gael i chi o fewn y rhaglen ddiwygiedig ac yn y gorffennol mae ein myfyrwyr wedi defnyddio'r cyfle hwn i arsylwi darpariaeth gofal ledled y DU ac yn rhyngwladol.

Bydd elfennau o'r cwrs ar gael trwy gyfrwng y Gymraeg a chewch gefnogaeth i gael mynediad at gymhellion ariannol y Coleg Cymraeg Cenedlaethol. Bydd cyfleoedd hefyd i gael profiad o ymarfer dwyieithog mewn rhannau o'r rhanbarth. I gael rhagor o wybodaeth am ddarpariaeth ddwyieithog yr Ysgol cliciwch yma. 

Mae'r cwrs hwn wedi ei ddilysu ar hyn o bryd yn erbyn Safonau’r Cyngor Nyrsio a Bydwreigiaeth ar gyfer Addysg Cyn-gofrestru, 2010. Bydd y rhaglen yn cael ei hadolygu a'i dilysu yn erbyn safonau bydwreigiaeth newydd y Cyngor Nyrsio a Bydwreigiaeth  (2019) yn y dyfodol, gan gynnwys Safonau Hyfedredd y Cyngor Nyrsio a Bydwreigiaeth ar gyfer Bydwragedd Cofrestredig, ar gyfer ymgeiswyr ym Medi 2022.  

Ar hyn o bryd y Rhaglen Bydwreigiaeth ym Mhrifysgol Bangor yw'r unig un yng Nghymru sydd ag achrediad Baby Friendly Initiative UNICEF (BFI). Bydd achrediad BFI y brifysgol yn sicrhau y byddwch yn cymhwyso gyda sylfaen gadarn o wybodaeth ar sail tystiolaeth mewn perthynas â bwydo ar y fron. Trwy sicrhau bod bydwragedd y dyfodol yn cymhwyso gyda gwybodaeth a sgiliau rhagorol i gefnogi merched i fwydo ar y fron, ynghyd â sgiliau ar gyfer dysgu gydol oes, gall y rhaglen fydwreigiaeth ym Mhrifysgol Bangor wneud cyfraniad pwysig i wella iechyd cyhoeddus yng Nghymru a thu hwnt.

Mae gan Brifysgol Bangor Gymdeithas Myfyrwyr Bydwreigiaeth gweithgar (BUSMS) sydd wedi llwyddo i godi arian at achosion lleol ac mae hefyd wedi trefnu, rheoli a chynnal cynhadledd 'Myfyrwyr Bydwreigiaeth Cymru Gyfan'.

Rydym yn eich annog yn gryf i gyflwyno cais yn gynnar i astudio Bydwreigiaeth gan fod yr holl leoedd ar y cwrs yn cael eu llenwi fel rheol ymhell cyn diwedd y cylch derbyniadau ac ni all Bangor warantu ystyried unrhyw geisiadau a gyflwynir ar ôl dyddiad cau cychwynnol UCAS ym mis Ionawr bob blwyddyn.

Dim angen talu ffioedd dysgu

Os ystyrir chi yn fyfyriwr cartref o’r Deyrnas Unedig mewn perthynas â ffioedd dysgu, a all ymrwymo i weithio yng Nghymru am ddwy flynedd ar ôl graddio, gallech gael eich ffioedd dysgu wedi'u talu'n llawn drwy Gynllun Bwrsariaethau GIG Cymru ynghyd â gwneud cais am gyfraniad bwrsariaeth o £1,000 tuag at gostau byw. Gallwch hefyd wneud cais am y fwrsariaeth yn seiliedig ar brawf modd sy'n ddibynnol ar incwm y cartref ac unrhyw gyllid arall ac mae meini prawf cymhwysedd ar gyfer cymorth gofal plant, lwfans dibynnydd a lwfans i rieni sy’n dysgu.  Gallwch hefyd wneud cais am y cyllid cynhaliaeth ar sail incwm a benthyciad cyfradd llog isel gan Gyllid Myfyrwyr. Gan fod y cwrs hwn yn cael ei ariannu gan GIG Cymru, ni allwn dderbyn ceisiadau gan fyfyrwyr tramor.

Mae manylion llawn ar gael ar dudalen Cyllid y GIG.

Pam dewis Prifysgol Bangor ar gyfer y cwrs?

• Cyllid ar gael gan y GIG ar hyn o bryd i dalu ffioedd a chyfraniad at gostau byw.

Gwylio: Beca Dafydd, Bydwreigiaeth

Bydd gennych astudiaeth ddamcaniaethol a lleoliadau clinigol gorfodol mewn ysbytai a lleoliadau cymunedol yng ngogledd Cymru. Tra byddwch ar leoliad byddwch dan oruchwyliaeth glos a chewch arsylwi staff proffesiynol wrth eu gwaith a chyfrannu at ddarparu gofal nyrsio gan ddechrau yn gynnar yn y cwrs. Bydd cefnogaeth ar gael gan diwtor personol sy'n fydwraig gofrestredig ac yn aelod o’r staff academaidd a hefyd gan Oruchwyliwr Ymarfer ac Aseswr  sy'n fydwragedd cymwysedig ym maes lleoliad ymarfer. Caiff gwaith theori ac ymarferol eu hasesu drwy aseiniadau, arholiadau, cyflwyniadau a thrwy bortffolio ymarfer clinigol.

Beth fyddwch chi’n ei astudio ar y cwrs yma?

Bydd y rhaglen ddiwygiedig yn seiliedig ar y parthau a'r cymwyseddau a amlinellir yn Safonau Hyfedredd Bydwragedd y Cyngor Nyrsio a Bydwreigiaeth (2019), sy'n sefydlu'r athroniaeth a'r gwerthoedd sy'n sail i'r gofynion ar gyfer mynediad i ran bydwreigiaeth y gofrestr broffesiynol:

• Bod yn fydwraig atebol, annibynnol, broffesiynol
• Gofal bydwreigiaeth diogel ac effeithiol: hyrwyddo a darparu dilyniant gofal
• Gofal cyffredinol i bob merch a babanod newydd-anedig
• Gofal ychwanegol i ferched a babanod newydd-anedig sydd â chymhlethdodau
• Hyrwyddo rhagoriaeth: y fydwraig fel cydweithiwr, ysgolhaig ac arweinydd
• Y fydwraig fel ymarferydd medrus

Mae’n rhaid cwblhau elfennau theori a chlinigol pob modiwl yn llwyddiannus cyn gallu symud ymlaen i flwyddyn nesaf y rhaglen. Rhennir cyfleoedd dysgu yn gyfartal rhwng theori yn y brifysgol, ac ymarfer clinigol. Asesir gwaith damcaniaethol yn bennaf gan ddefnyddio amrywiaeth o ddulliau asesu, gan gynnwys asesiadau ymarferol, gwaith grŵp a chyflwyniadau. Bydd datblygiad sgiliau bydwreigiaeth yn cael ei asesu'n grynodol gan Oruchwylwyr Ymarfer ac Aseswyr Ymarfer ym maes ymarfer clinigol. Byddwch hefyd yn cael eich asesu ar ddatblygiad eich agwedd broffesiynol, eich ymddygiad a'ch cymhwysedd.

Ble byddwch yn astudio?

Bydd rhan theori’r cwrs yn cael ei darparu yn bennaf trwy ddull cyfunol, dysgu o bell gyda rhai sesiynau wyneb yn wyneb yn cael eu darparu yn ein canolfannau astudio ym Mangor ac yn Wrecsam, ac o bosibl mewn mannau eraill ledled gogledd Cymru.

Bydd ymgeiswyr llwyddiannus yn cael eu rhoi mewn un neu ddau faes o fewn y bwrdd iechyd lleol, Bwrdd Iechyd Prifysgol Betsi Cadwaladr gyda'r posibilrwydd y bydd rhai lleoliadau yn cael eu darparu ym Mwrdd Iechyd Addysgu Powys. Disgwylir i ymgeiswyr a ddewisir i gael cyfweliad nodi ym mha ardal yr hoffent wneud eu lleoliad ymarfer. Os cynigir lle i chi ar y rhaglen, byddwn yn ceisio cael lle i chi yn ardal y lleoliad ymarfer a fyddai’n well gennych, ond ni ellir gwarantu hyn. Rhaid i ymgeiswyr fod yn ymwybodol y gallai rhai lleoliadau yn ystod y rhaglen fod mewn unrhyw ran o Fwrdd Iechyd Prifysgol Betsi Cadwaladr ac felly ledled gogledd Cymru.
 
Yn ystod lleoliadau ymarfer, byddwch yn dechrau trwy arsylwi bydwragedd a gweithwyr proffesiynol eraill wrth eu gwaith. Er mwyn datblygu eich sgiliau a’ch cymhwysedd bydd disgwyl i chi gymryd rhan, dan oruchwyliaeth mewn darparu gofal bydwreigiaeth yn fuan iawn yn y cwrs. Disgwylir i chi ddilyn rota dyletswydd eich Goruchwyliwr Ymarfer a/neu Aseswr Ymarfer tra ar leoliad ymarfer, gan gynnwys penwythnosau, gwyliau banc a shifftiau nos gan roi profiad i chi o batrymau gwaith go iawn bydwragedd.

Yn y rhaglen, byddwch yn cymryd rhan mewn dilyn baich achosion bychan o ferched a'u teuluoedd trwy gydol eu profiad o roi genedigaeth. Bydd hyn yn eich cefnogi i gyflawni Parth 2 o safonau hyfedredd y Cyngor Nyrsio a Bydwreigiaeth ar gyfer bydwragedd, gofal bydwreigiaeth diogel ac effeithiol: hyrwyddo a darparu dilyniant gofal  (Cyngor Nyrsio a Bydwreigiaeth, 2019). Ar ddiwedd y cwrs bydd myfyrwyr llwyddiannus wedi casglu ynghyd bortffolio i ddangos eu bod wedi cyflawni safonau medrusrwydd y NMC a'u galluogi i gofrestru fel bydwragedd ar Gofrestr y Cyngor Nyrsio a Bydwreigiaeth.

Modiwlau ar gyfer y flwyddyn academaidd gyfredol

Mae’r rhestrau modiwlau ar gyfer eich arwain yn unig ac fe allant newid. Cymerwch olwg ar yr hyn y mae ein myfyrwyr yn ei astudio ar hyn o bryd ar tudalen Modwilau Bydwreigiaeth BM (Anrh) .

Mae cynnwys y cwrs wedi'i nodi i’ch arwain yn unig ac fe all newid.

• Mae labordai efelychu sgiliau ar gael ar gyfer meithrin ac ymarfer sgiliau clinigol, gan ymgorffori'r defnydd o fodelau PROMPT efelychyddion cywair-bur (high fidelity) (Hyfforddiant Amlddisgyblaethol Obstetrig Ymarferol) a ddefnyddir hefyd mewn hyfforddiant sgiliau brys wrth ymarfer.

Costau Cyffredinol yn y Brifysgol

Myfyrwyr Cartref (DU)

• Cost cwrs israddedig llawn-amser yw £9,000 y flwyddyn (mynediad yn 2021/22 ac yn 2022/23).
• Y ffi ar gyfer yr blwyddyn ar leoliad a blwyddyn profiad rhyngwladol yw £1,350 (2021/22 a 2022/23). 
• Mwy o wybodaeth am ffioedd a chyllid i fyfyrwyr Cartref (DU).

Myfyrwyr Rhyngwladol (yn cynnwys yr UE)

• Ffioedd Dysgu Myfyrwyr Rhyngwladol
• Costau Byw ac Ysgoloriaethau Myfyrwyr Rhyngwladol

Costau Ychwanegol
Mae yna hefyd rai costau ychwanegol cyffredin sy'n debygol o godi i fyfyrwyr ar bob cwrs, er enghraifft:

• Os dewiswch chi astudio dramor neu gymryd y Flwyddyn Profiad Rhyngwladol fel rhan o'ch cwrs.
• Os ydych chi'n mynd i'ch Seremoni Raddio, bydd cost llogi gŵn (£25- £75) a chost am docynnau i westeion ychwanegol (tua £12 yr un).

Costau ychwanegol cwrs-benodol

Yn dibynnu ar y cwrs rydych chi'n ei astudio, efallai y bydd costau ychwanegol cwrs-benodol y bydd gofyn i chi eu talu. Gellir rhoi'r costau hyn mewn tri chategori:

1. Costau Gorfodol: mae'r rhain yn gysylltiedig â modiwl craidd neu orfodol penodol y mae'n ofynnol i chi ei gwblhau i gwblhau eich cymhwyster e.e. teithiau maes gorfodol, gwisgoedd i fyfyrwyr ar leoliad, gwiriad gan y Gwasanaeth Datgelu a Gwahardd (DBS).
2. Costau Angenrheidiol: efallai na fydd pob myfyriwr yn cael y costau hyn, a bydd yn amrywio yn dibynnu ar y cwrs e.e. aelodaeth o gorff proffesiynol, teithio i leoliadau, meddalwedd arbenigol, cyfarpar diogelu personol.
3. Costau Dewisol: mae'r rhain yn dibynnu ar eich dewis o fodiwlau neu weithgaredd, ac fe'u dangosir er mwyn rhoi syniad ichi o'r costau dewisol a allai godi i sicrhau bod cymaint o wybodaeth â phosibl ar gael i chi cyn i chi wneud eich dewis. Gall y rhain gynnwys digwyddiadau graddio ar gyfer eich cwrs, teithiau maes dewisol, tripiau Wythnos Groeso.

Mae graddedigion bydwreigiaeth yn ennill cymhwyster academaidd yn ogystal â chymhwyster proffesiynol y mae Bwrdd Iechyd Prifysgol Betsi Cadwaladr, Ysbyty Bronglais, Aberystwyth, Ysbyty Countess of Chester a darparwyr lleoliadau addysgol eraill sy'n bartneriaid yng Nghymru a Lloegr yn eu parchu.  

Mae ein record cyflogadwyedd yn rhagorol gyda'n graddedigion yn llwyddo i gael swyddi ledled Cymru, y DU a thu hwnt.

Cyfleoedd ym Mangor

Mae Canolfan Sgiliau a Chyflogadwyedd y Brifysgol yn cynnig amryw o adnoddau i’ch helpu i gyflawni eich amcanion ar ôl graddio. 

Gwobr Cyflogadwyedd Bangor (GCB)

Mae Gwobr Cyflogadwyedd Bangor yn gwrs ar-lein cynhwysfawr y gallwch ei wneud yn ôl eich cyflymder eich hun, gan fynd â chi trwy'r holl gamau y mae'n rhaid i chi eu cymryd i archwilio, paratoi a gwneud cais am eich gyrfa ddelfrydol.

Rhaglen Interniaeth Prifysgol Bangor

Mae Prifysgol Bangor yn cynnal cynllun interniaeth â thâl yn adrannau academaidd a gwasanaethau’r Brifysgol.

Gwirfoddoli

Mae gwirfoddoli yn ehangu eich profiadau ac yn gwella eich cyflogadwyedd. Cewch fwy o wybodaeth am wirfoddoli ar wefan Undeb y Myfyrwyr.

Gweithio tra'n astudio

Mae TARGETconnect yn hysbysebu swyddi lleol, cenedlaethol a rhyngwladol i raddedigion, cyfleodd profiad gwaith ac  interniaethau a chyfleon gwirfoddol. 

Adroddiad Cyflawniad Addysg Uwch (HEAR)

Ceir pob myfyriwr sy’n graddio adroddiad terfynol HEAR. Mae’r adroddiad yn rhestru holl gyflawniadau academaidd ac allgyrsiol fel bod darpar gyflogwyr yn ymwybodol o’r sgiliau ychwanegol rydych wedi eu hennill tra yn y Brifysgol.