Ond mae'r ymchwilwyr sy’n gyfrifol am yr astudiaeth, gan gynnwys staff allweddol o Brifysgol Bangor, yn rhybuddio bod y data sydd ar gael yn anghyflawn, gan ei gwneud hi'n amhosibl ar hyn o bryd i ddeall yn llawn y risgiau o ddewis llawdriniaeth dramor.
Mae nifer y twristiaid meddygol wedi codi'n gyson dros y degawdau diwethaf, tuedd nad yw'n dangos unrhyw arwydd o arafu.
Mae canfyddiadau adolygiad cyflym o'r data sydd ar gael, a gynhaliwyd gan y Ganolfan Dystiolaeth Iechyd a Gofal, lle mae Prifysgol Bangor yn bartner allweddol, wedi eu cyhoeddi yn y cyfnodolyn mynediad agored BMJ Open.
Canfu fod ysbytai yn gorfod talu'r bil pan fydd pethau'n mynd o chwith i nifer gynyddol o bobl o'r Deyrnas Unedig sy'n mynd dramor am driniaeth megis llawdriniaeth colli pwysau, mwyhau’r bronnau neu lawdriniaethau eraill.
Dywedodd Dr Ruth Lewis, Darllenydd yn Ysgol Feddygol Gogledd Cymru Prifysgol Bangor, a Chyfarwyddwr Cysylltiol Canolfan Dystiolaeth Ymchwil Iechyd a Gofal Cymru, “Mae’r adolygiad tystiolaeth yn tynnu sylw at effaith bosibl twristiaeth feddygol ar gostau gofal iechyd y GIG. Ond yr hyn nad ydym yn ei wybod, gan na ddaethom o hyd i unrhyw bapurau amdano, yw faint o bobl o'r Deyrnas Unedig sy'n dewis teithio dramor i gael llawdriniaeth, neu faint sy'n profi cymhlethdodau wedi hynny. Heb y wybodaeth hon, ni allwn ddeall yn llawn y risg y mae pobl sy'n ceisio llawdriniaeth dramor yn ei chymryd.”
Er na adroddwyd am unrhyw farwolaethau yn yr astudiaethau a gynhwyswyd, profodd hyd at 53% gymhlethdodau cymedrol i ddifrifol, gan gynnwys heintiau, organau’n methu a chlwyfau nad oeddent yn gwella.
I wella o driniaeth a dalwyd amdani mewn gwlad arall, roedd angen i rai pobl hyd yn oed aros yn yr uned gofal dwys, cael llawdriniaeth bellach a chymryd nifer fawr o wrthfiotigau.
Yn ôl yr astudiaethau a adroddodd am y costau cysylltiedig, roeddent yn amrywio o £1058 i £19,549 fesul claf.
At ei gilydd, adroddwyd am 29 o wledydd o bob cyfandir, ond Twrci oedd y gyrchfan fwyaf cyffredin (61%). Merched oedd y rhan fwyaf o'r cleifion (90%), a 38 oedd yr oedran cyfartalog, ond roedd yn amrywio o 14 i 69.
Roedd hyd cyfartalog cyfunol yr arhosiad yn yr ysbyty er mwyn trin cymhlethdodau ychydig dros 17 diwrnod; yr hiraf oedd 45 diwrnod.
Roedd hyd cyfartalog cyfunol yr arhosiad yn yr ysbyty er mwyn trin cymhlethdodau ar ôl llawdriniaeth gosmetig ychydig o dan 6 diwrnod; yr hiraf oedd 49 diwrnod. O ran twristiaeth feddygol am lawdriniaeth ar y llygaid, adroddwyd am dros 50 o apwyntiadau cleifion allanol a 4 triniaeth lawfeddygol.
Cafodd astudiaethau a ddisgrifiodd achosion o lawdriniaeth frys dramor; triniaeth ar gyfer canser, anffrwythlondeb, a deintyddiaeth; a llawdriniaeth trawsblannu eu heithrio o'r dadansoddiad.