Mae Prifysgol Bangor wedi codi chwe safle, o 55 i 49 (allan o 130) yn nhabl cynghrair y Complete University Guide.
Mae'r perfformiad cryf hwn yn adlewyrchu gwelliannau ar draws nifer o fesurau allweddol a ddefnyddir yn y rhestrau. Mae sgôr gyffredinol Prifysgol Bangor wedi cynyddu 7%, wedi'i gefnogi gan well cyfraddau o ran myfyrwyr yn parhau, cymhareb staff-i-fyfyrwyr gwell, a lefelau uwch o foddhad myfyrwyr. Mae'r Brifysgol hefyd wedi gweld cynnydd sylweddol yng nghanlyniadau graddedigion, gyda chynnydd nodedig yng nghyfran y graddedigion mewn cyflogaeth broffesiynol neu’n dilyn astudiaethau pellach, a'r rhai sy'n teimlo bod eu gweithgareddau presennol yn cyd-fynd â'u cynlluniau ar gyfer y dyfodol.
Mae Prifysgol Bangor bellach yn drydydd yng Nghymru allan o wyth prifysgol, sef cynnydd o un safle. Mae’r uchafbwyntiau yma yn cynnwys cyrraedd yr ail safle yng Nghymru am gyfraddau Parhau ac am Ansawdd Ymchwil.
Astudiaethau Iechyd a Thechnoleg Feddygol a Biobeirianneg yw'r pynciau sydd â'r sgôr uchaf, y ddau yn yr ail safle yn eu tablau priodol. Mae Celf a Dylunio ac Astudiaethau Plentyndod ac Ieuenctid hefyd wedi perfformio’n gryf ac wedi cyrraedd y 25% uchaf.
Dywedodd yr Athro Nichola Callow, Dirprwy Is-ganghellor dros Addysg a Phrofiad Myfyrwyr, “Mae’r canlyniadau hyn yn gymeradwyaeth gref o’r profiad gwych y mae Prifysgol Bangor yn ei gynnig i’w myfyrwyr. Mae cyrraedd safle sydd yn y 50 uchaf yn y Deyrnas Unedig yn adlewyrchu ein hymrwymiad i addysgu o ansawdd uchel, amgylchedd dysgu cefnogol a gweithio gyda'n myfyrwyr i'w helpu i lwyddo yn eu gyrfaoedd dewisol. Rydym yn falch o weld cynnydd parhaus ar draws y meysydd allweddol sydd bwysicaf i fyfyrwyr.”
Perfformiad y meysydd pwnc
Y pynciau sydd wedi perfformio orau eleni yn y Complete University Guide (yn y 25% uchaf):
Safle cyffredinol
- Technoleg Feddygol a Biobeirianneg (2il allan o 45)
- Astudiaethau Iechyd (2il allan o 30)
- Celf a Dylunio (safle 16 allan o 82)
- Astudiaethau Plentyndod ac Ieuenctid (9fed allan o 46)
Safonau mynediad (cyfartaledd y pwyntiau tariff UCAS ar gyfer myfyrwyr israddedig newydd)
- Technoleg Feddygol a Biobeirianneg (9fed allan o 43)
Rhagolygon Graddedigion – canlyniadau (cyfran y graddedigion mewn swyddi lefel proffesiynol, ac yn dilyn astudiaethau addysg uwch pellach):
- Nyrsio a Bydwreigiaeth (4ydd allan o 79)
- Celf a Dylunio (safle 15 allan o 82)
- Polisi Cymdeithasol (6ed allan o 27)
- Ysgrifennu Creadigol (8fed allan o 38)
- Cerddoriaeth (safle 17 allan o 68)
Rhagolygon Graddedigion – ar y trywydd iawn (cyfran y graddedigion a gytunodd fod eu gweithgareddau ar ôl graddio yn cyd-fynd â’u cynlluniau ar gyfer y dyfodol):
- Astudiaethau Plentyndod ac Ieuenctid (3ydd allan o 39)
- Nyrsio a Bydwreigiaeth (7fed allan o 79)
- Hanes (8fed allan o 85)
- Technoleg Feddygol a Biobeirianneg (7fed allan o 43)
Parhau (cyfraddau dal gafael ar fyfyrwyr, cyfraddau graddio a chyfraddau trosglwyddo myfyrwyr blwyddyn gyntaf):
- Addysg (1af allan o 90)
- Cerddoriaeth (1af allan o 80)
- Technoleg Feddygol a Biobeirianneg (1af allan o 45)
- Astudiaethau Iechyd (1af allan o 28)
- Gwyddorau Biofeddygol (8fed allan o 87)
- Saesneg (10fed allan o 89)
Ansawdd ymchwil:
- Astudiaethau Iechyd (1af allan o 26)
- Amaethyddiaeth a Choedwigaeth (2il allan o 15)
- Gwyddorau Chwaraeon (3ydd allan o 80)
- Gwyddorau Biolegol (7fed allan o 82)
- Gwyddorau Biofeddygol (8fed allan o 81)
Boddhad myfyrwyr:
- Celf a Dylunio (1af allan o 82)
- Peirianneg Drydanol ac Electronig (1af allan o 71)
- Athroniaeth (2il allan o 45)
- Gwyddorau Biofeddygol (8fed allan o 86)
- Ysgrifennu Creadigol (5ed allan o 47)
Mae'r cynnydd yn safleoedd y Complete University Guide yn dilyn cyfres o berfformiadau cryf gan Brifysgol Bangor. Yn Arolwg Cenedlaethol Myfyrwyr (NSS) 2025, cynyddodd cyfradd boddhad cyffredinol myfyrwyr i 82%, tra bod cyfradd boddhad â’r addysgu wedi codi i 87%, gan osod y Brifysgol yn drydydd yng Nghymru ac yn y 50 safle uchaf yn y Deyrnas Unedig. Llwyddodd Prifysgol Bangor hefyd gyrraedd y safle uchaf yn y Deyrnas Unedig ar gyfer Busnes a Rheolaeth yn rhestr 2027 Unifresher, gan ennill marciau llawn am ansawdd yr addysgu a chefnogaeth academaidd, ochr yn ochr â'r costau byw mwyaf fforddiadwy ymhlith yr ysgolion busnes oedd wedi'u rhestru.
Ewch i www.thecompleteuniversityguide.co.uk am y manylion llawn.