Arbenigwr gwadd yn tynnu sylw at rôl strategol troseddau ariannol mewn diogelwch cenedlaethol

Mae Andrew yn ymgynghorydd a hyfforddwr annibynnol sy’n arbenigo mewn gwrth-wyngalchu arian, gwrth-ariannu terfysgaeth a chyllido lledaeniad arfau dinistr torfol. Yn gyn swyddog cudd-wybodaeth y Llynges Frenhinol, mae ganddo brofiad gweithredol yn Bosnia, Irac ac Affganistan, yn ogystal â gweithrediadau diogelwch morwrol yn y Gwlff. Bu hefyd mewn rolau uwch ym maes gwasanaethau ariannol, gan gynnwys Pennaeth Lliniaru Bygythiadau Troseddau Ariannol HSBC Malta.

Yn ystod y sesiwn, cyflwynodd Andrew ddarlith hynod ddiddorol ar Wleidyddiaeth Economaidd mewn Cydweithrediad, Cystadleuaeth, Argyfwng a Gwrthdaro, gan archwilio’r berthynas gynyddol rhwng systemau ariannol, cyllid anghyfreithlon a diogelwch cenedlaethol.

Rhoddodd y sesiwn fewnwelediad i gyfranogwyr ar sut mae offer economaidd a rhwydweithiau ariannol yn cael eu defnyddio’n gynyddol mewn cystadleuaeth geopoliticaidd a gwrthdaro. Pwysleisiodd hefyd thema greiddiol y rhaglen MBA Cyllid Anghyfreithlon: nad yw troseddau ariannol bellach yn fater cydymffurfio yn unig, ond yn her strategol sy’n effeithio ar wydnwch economaidd, sefydlogrwydd rhyngwladol a diogelu sefydliadau democrataidd.

Cyfrannodd cyfranogwyr yr MBA, sy’n weithwyr proffesiynol profiadol ar draws gwasanaethau ariannol, llywodraeth, gorfodi’r gyfraith, cudd-wybodaeth ac rheoli risg, at drafodaeth fywiog ar bynciau megis cyllid bygythiad, osgoi sancsiynau, actorion gwladwriaethol gelyniaethus a bygythiadau hybrid.

Roeddem hefyd yn falch o groesawu Alison Gregory, Prif Ddadansoddwraig yn y Swyddfa Dramor, y Gymanwlad a Datblygu, a gyfrannodd at y drafodaeth. Bydd Alison yn dychwelyd ar 6 Gorffennaf i gyflwyno darlith wadd ar ddimensiynau cudd-wybodaeth a dadansoddi troseddau ariannol a diogelwch cenedlaethol.

Mae rhaglen MBA Cyllid Anghyfreithlon Ysgol Fusnes Albert Gubay wedi’i chynllunio i arfogi gweithwyr proffesiynol â’r wybodaeth, y safbwynt strategol a’r mewnwelediad ymarferol sydd eu hangen i ymateb i’r risgiau esblygol ym maes troseddau ariannol mewn amgylchedd byd-eang cymhleth.

Dysgwch fwy am yr MBA Cyllid Anghyfreithlon a sut y gall gefnogi eich datblygiad proffesiynol.