Croeso i'r Athro Andrew Thomas, Deon Ysgol Fusnes Albert Gubay

Mae prif ddiddordebau ymchwil yr Athro Thomas yn cynnwys peirianneg fforensig, rheoli’r gadwyn gyflenwi, rheoli projectau, strategaethau gweithgynhyrchu a rheoli gweithrediadau. Mae wedi denu dros £12 miliwn mewn cyllid ymchwil a chyllid masnachol, wedi cyhoeddi dros 250 o erthyglau ymchwil, gan gynnwys; papurau mewn cynadleddau, adroddiadau i’r llywodraeth a phrif anerchiadau, ac mae ganddo brofiad helaeth o weithio gyda phartneriaid yn y maes academaidd, mewn llywodraeth ac mewn diwydiant. Mae'n Gymrawd y Sefydliad Peirianwyr Mecanyddol, y Sefydliad Peirianneg a Thechnoleg ac yn Gymrawd Cymdeithas Ddysgedig Cymru. Mae hefyd yn Beiriannydd Siartredig.

Mae'r Athro Thomas wedi goruchwylio ac arwain pump ar hugain o brojectau Partneriaeth Trosglwyddo Gwybodaeth (KTP) ac amryw o fentrau ymchwil a ariannwyd drwy ERDF, ESRC, EPSRC, EU FP7, Horizon 2020 ac Innovate UK. Yn ychwanegol at yr hyn y mae wedi ei gyflawni’n academaidd ac o ran ymchwil, ef yw Cadeirydd Consortiwm Penaethiaid Gweithgynhyrchu a Pheirianneg y Deyrnas Unedig (COMEH) ar hyn o bryd ac mae’n aelod o Gyngor yr Athrawon Peirianneg (EPC UK).

“Mae’n anrhydedd cael dechrau yn fy swydd fel Deon Ysgol Fusnes Albert Gubay a chael y cyfle i weithio ochr yn ochr â chymuned o staff sydd mor dalentog ac yn llawn ymroddiad. Rwy’n edrych ymlaen at gydweithio â chydweithwyr ar draws yr Ysgol a'r Sefydliad wrth i ni adeiladu ar ein cryfderau, croesawu cyfleoedd newydd, a gweithio’n barhaus i wella perfformiad, effaith a llwyddiant ein myfyrwyr a'n partneriaid.”