Mae Nathan Abrams, sy’n Athro mewn Ffilm ac yn gyfarwyddwr arweiniol y Ganolfan Astudiaethau Ffilm, Teledu a Sgrin ym Mhrifysgol Bangor wedi cyd-ysgrifennu llyfr newydd a gyhoeddwyd gan Faber & Faber am Stanley Kubrick, y gwneuthurwr ffilmiau chwedlonol o America.
I nodi cyhoeddi’r llyfr, yn ogystal â chofio 25 mlwyddiant marwolaeth y cyfarwyddwr, bydd Gordon Stainforth ac Adam Unger, a oedd yn olygydd cynorthwyol ac yn ail olygydd cynorthwyol ar The Shining, sef un o ffilmiau mwyaf adnabyddus Kubrick, yn ymuno â Nathan Abrams mewn digwyddiad yn Pontio, Canolfan Gelfyddydau ac Arloesi Prifysgol Bangor, nos Iau, 7 Mawrth am 7pm. Bydd lansiad y llyfr yn cael ei ddilyn gan ddangosiad o The Shining (fersiwn estynedig).
Nid oes bywgraffiad cynhwysfawr newydd o Stanley Kubrick, y gwneuthurwr ffilmiau enigmatig a swil, wedi ei gyhoeddi ers dros ugain mlynedd. Mae Kubrick: An Odyssey gan Nathan Abrams a'i gyd-awdur Robert P. Kolker yn llenwi'r bwlch hwnnw. Mae’n seiliedig ar fynediad i’r ymchwil diweddaraf, yn enwedig i archif Kubrick yn yr University of the Arts yn Llundain, ac i bapurau eraill, yn ogystal â chyfweliadau newydd gydag aelodau o’i deulu a’r rhai a fu’n gweithio gydag ef. Mae'n rhoi sylw cynhwysfawr a manwl i waith Kubrick a’i fywyd personol, preifat, a chyhoeddus.
The Shining
“Mae’r llyfr wedi datblygu dros flynyddoedd o ymchwil dwys a ddechreuodd pan ddechreuais i addysgu am ffilmiau Kubrick ym Mhrifysgol Bangor yn 2007. Mae'n trafod nid yn unig y gwaith o wneud ei ffilmiau, ond hefyd y ffilmiau yr oedd yn dymuno eu gwneud ond a fethodd, megis Burning Secret, Napoleon, Aryan Papers, ac AI. Rydym hefyd yn datgelu beth roedd Kubrick yn ei wneud pan nad oedd yn gwneud ffilmiau.
“Bydd y cofiant hwn yn chwalu rhai o’r camsyniadau am y gwneuthurwr ffilmiau hwn, yr honnir ei fod yn enciliol ac a greodd rai o weithiau celf pwysicaf yr ugeinfed ganrif. Bydd y llyfr yn amhrisiadwy nid yn unig i’m myfyrwyr ym Mangor, ond i fyfyrwyr, cefnogwyr, beirniaid ac ysgolheigion sydd â diddordeb yn Stanley Kubrick, a hefyd i unrhyw un sydd â diddordeb yn un o gewri gwneud ffilmiau’r 20fed ganrif.”
