Trwy raglen sgiliau M-Sparc, Sgil Sparc, cymerodd myfyrwyr a staff o Ysgol Addysg Gogledd Cymru ran mewn cyfres o sesiynau ymarferol yn seiliedig ar ddiwydiant trwy gydol tymor y gwanwyn. Darparodd y profiadau hyn gyfleoedd dysgu trawsnewidiol i alluogi athrawon y dyfodol i gymhwyso eu dysgu i sefyllfaoedd go iawn a chydweithio â diwydiant.
Mae'r cydweithrediad hwn yn seiliedig ar arbenigedd Prifysgol Bangor mewn rhaglenni dwyieithog Addysg Gychwynnol Athrawon ac Astudiaethau Plentyndod ac Ieuenctid, ochr yn ochr ag arbenigedd M-SParc mewn ymgysylltu â diwydiant a chyflwyno sesiynau STEM ymarferol. Gyda'i gilydd, mae'r dulliau hyn yn rhoi'r sgiliau, yr ymwybyddiaeth a'r hyder i fyfyrwyr ddod â dysgu arloesol a pherthnasol i mewn i’r dosbarth a thu hwnt.
Roedd elfen allweddol o'r rhaglen yn cynnwys project ymchwil cydweithredol gyda myfyrwyr Astudiaethau Plentyndod ac Ieuenctid, a astudiodd ffyrdd o ehangu cyrhaeddiad Sgil Sparc i gynulleidfa ehangach. Rhoddodd y project gyfle i fyfyrwyr gael cysylltiad â diwydiant a gwella eu profiad fel myfyrwyr.
Mae M-SParc hefyd wedi cyfrannu at sesiynau gyda myfyrwyr TAR a BA (SAC), gan rannu dealltwriaeth o addysgu STEM, cyflwyno dwyieithog, llwybrau gyrfa mewn addysg a swyddogaeth sefydliadau y tu hwnt i'r system ysgolion wrth gefnogi dysgu. Mae'r cydweithrediad hefyd wedi sbarduno trafodaethau ynglŷn â meysydd gwaith yn y dyfodol, gan gynnwys deallusrwydd artiffisial mewn addysg, anghenion dysgu ychwanegol, dysgu meddygol a dysgu sy'n gysylltiedig ag iechyd.
Meddai Emily Roberts, Rheolwr Allgymorth a Sgiliau yn M-SParc, “Mae Sgil Sparc yn ymwneud â gwneud i STEM, sgiliau a gyrfaoedd deimlo’n real i bobl ifanc. Mae gweithio gyda myfyrwyr addysg yn caniatáu inni ddod â'r meddylfryd hwnnw'n uniongyrchol i addysg athrawon. Bydd y myfyrwyr hyn yn mynd ymlaen i ddylanwadu ar ddosbarthiadau ysgol, clybiau a mannau dysgu ar draws y rhanbarth, felly mae rhoi mynediad iddynt at ddiwydiant a llwybrau addysg amgen yn hynod werthfawr.”
Meddai Matt Evans, o dîm Sgil Sparc M-SParc, “Mae wedi bod yn bleser rhannu ein profiad gyda myfyrwyr sy’n paratoi at yrfaoedd ym myd addysg. Nid mewn ysgolion yn unig y mae addysgu'n digwydd; mae yna ecosystem addysg llawer ehangach ar draws gogledd Cymru. Trwy Sgil Sparc, rydym yn gweithio gydag ysgolion, busnesau a chymunedau, ac mae'r sesiynau hyn wedi bod yn gyfle i ddangos sut mae STEM yn gallu cael ei ddysgu mewn ffordd greadigol, ymarferol a pherthnasol.”
Meddai’r Athro Enlli Thomas, Dirprwy Is-ganghellor dros y Gymraeg, Diwylliant Cymru a’r Rhanbarth, “Mae’r bartneriaeth yn adlewyrchu’r berthynas ehangach rhwng M-SParc a Phrifysgol Bangor, gan greu cyfleoedd i fyfyrwyr ymgysylltu’n uniongyrchol â diwydiant, arloesi ac anghenion sgiliau rhanbarthol. Mae hefyd yn cryfhau swyddogaeth Sgil Sparc fel pont rhwng addysg a gweithlu’r dyfodol, gan gefnogi pobl ifanc ac addysgwyr i ddeall y cyfleoedd newydd sydd ar gael ledled gogledd Cymru.”
Gyda thrafodaethau pellach eisoes ar y gweill, bydd Prifysgol Bangor ac M-SParc yn parhau i ddatblygu cyfleoedd ymarferol sy'n cefnogi athrawon y dyfodol, yn ysbrydoli dysgwyr ifanc, ac yn cysylltu addysg ag ecosystem arloesi'r rhanbarth.