Rhaglen Hyfforddiant Doethurol Leverhulme Rhythms of Life
Mae rhythmau biolegol yn hanfodol i fywyd. O brosesau cellog i ecosystemau a chymdeithasau dynol, mae cylchredau amgylcheddol rhagweladwy, sydd rhwng oriau a blynyddoedd o hyd, yn dylanwadu ar bryd mae pethau byw yn bwyta, symud, atgenhedlu a rhyngweithio.
Mae Rhaglen Hyfforddiant Doethurol Rhythms of Life Leverhulme yn dwyn ynghyd y gwyddorau naturiol a dynol gyda safbwyntiau cymdeithasol, diwylliannol ac iechyd, i ddatblygu dealltwriaeth integredig newydd o bwysigrwydd prosesau rhythmig. Trwy hyfforddi ymchwilwyr i weithio ar draws graddfeydd a disgyblaethau, mae'r rhaglen yn mynd i'r afael â heriau byd-eang sydd angen sylw brys trwy agenda ymchwil unigryw ac integreiddiol sydd â pherthnasedd gwyddonol, amgylcheddol a chymdeithasol parhaol.
Ynglŷn â’r rhaglen
Mae rhythmau yn hanfodol i fywyd ar y ddaear. O facteria i fodau dynol, mae organebau mewn cytgord â chylchredau amgylcheddol rhagweladwy sy'n pennu pryd maent yn bwyta, yn gorffwys, yn symud, yn atgenhedlu ac yn cyfathrebu, gan ddylanwadu ar ryngweithiadau ecolegol a llwybrau esblygiadol. Mae rhythmau circadaidd yn gwneud i ffisioleg ac ymddygiad gyd-fynd â chylchdroadau 24 awr y ddaear. Mae rhythmau circalanwol yn strwythuro bywyd arfordirol ar sail trai a llif y llanw. Mae cylchred y lleuad yn cydlynu digwyddiadau hanes bywyd mawr mewn ecosystemau daearol a dyfrol. Mae rhythmau circaflynyddol (tymhorol) yn sail i amseriad amrywiaeth eang o brosesau organebol gan gynnwys atgenhedlu, gaeafgysgu a mudo. Mae golau, sŵn a mathau eraill o lygredd, ynghyd â newidiadau mewn tymheredd a phatrymau tywydd sy'n cael eu gyrru gan newid hinsawdd, yn dad-gydamseru clociau mewnol ar sail arwyddion allanol.
Mewn byd sy'n gynyddol drefol a digidol, mae rhythmau bywydau pobl hefyd yn cael eu heffeithio'n ddirfawr. Mae golau artiffisial wedi newid pryd a sut rydym yn gweithio ac yn gorffwys, yn cynhyrchu bwyd ac yn rhyngweithio ag eraill. I bobl, mae erydiad strwythurau amserol naturiol yn arwain at ganlyniadau sy'n amrywio o amhariad ar gwsg ac iechyd meddwl gwael i gynhyrchiant amaethyddol is ac effaith andwyol ar ddiogelu’r cyflenwad bwyd. Mae deall y tarfu hyn ar y rhythmau a sut gall cymdeithasau ac ecosystemau addasu neu adfer yn hanfodol i gynnal bioamrywiaeth, swyddogaeth ecosystemau a lles dynol mewn byd sy'n newid yn gyflym.
Bydd Rhaglen Hyfforddiant Doethurol Rhythms of Life Leverhulme yn meithrin dealltwriaeth o brosesau rhythmig, o osgiliadau cellog i batrymau gweithgaredd byd-eang, sut maent yn gweithredu ac yn rhyngweithio, sut mae pethau’n tarfu arnynt a sut y gallant addasu. Trefnir yr ymchwil ar draws tair thema ganolog, gyda phob project doethurol yn ymdrin ag o leiaf dwy:
1) Sylfaen rhythmau: mecanweithiau genetig, cellog a ffisiolegol sy'n sail i rythmau naturiol, sut mae rhythmau'n esblygu a'r grymoedd ffisegol sy'n eu llywodraethu.
2) Rhythmau mewn byd sy'n newid: effeithiau newid amgylcheddol cyflym a achosir gan ddyn ar weithrediad, gwydnwch ac addasiad rhythmau biolegol, ar draws graddfeydd unigol, poblogaeth ac ecosystem.
3) Y gilfach rythmig ddynol: sut mae bodau dynol wedi creu cilfach unigryw sydd wedi datgysylltu ein dibyniaeth ar lawer o rythmau naturiol y ddaear, a sut mae'r anghydweddiad hwn yn effeithio ar ymddygiad dynol, lles, diogelwch bwyd, diwylliant a gweithrediad cymdeithasau.
Mae’r ysgoloriaethau’n ariannu hyd at bedair blynedd o astudiaeth ddoethurol amser llawn gyda grant cynnal ar lefelau sylfaenol UKRI ac yn cynnwys £10,000 i gefnogi anghenion ymchwil a hyfforddiant unigol. Mae 8 ysgoloriaeth ar gael bob blwyddyn.
Byddwn yn hysbysebu’r projectau doethurol cyntaf ddiwedd 2026, i fyfyrwyr gofrestru ym mis Hydref 2027. Bydd rhagor o fanylion am y projectau sydd ar gael a chyfarwyddiadau ymgeisio ar gael ar y wefan hon. Bydd myfyrwyr doethurol newydd yn dechrau ym mis Hydref 2027, 2028 a 2029.
Ein nod yw recriwtio myfyrwyr ar y llwybr Meistr + PhD i gofrestru ar eu cwrs MSc dewisol ym mis Hydref 2027 a 2028. Bydd dyddiadau cau a chyfarwyddiadau ar gyfer ceisiadau ar gael ar y wefan hon.
Mae Rhythms of Life yn cyfuno cefnogaeth oruchwyliol gynhwysfawr â model hyfforddi arloesol, sy'n seiliedig ar garfan, wedi ei gynllunio i ddatblygu arweinwyr y dyfodol sy'n gallu gweithio ar draws ffiniau disgyblaethol traddodiadol yn y byd academaidd a thu hwnt. Bydd myfyrwyr yn cael eu cefnogi gan dimau goruchwylio rhyngddisgyblaethol, mentoriaid cyfoed a mentoriaid rhaglenni a mynediad at strwythurau ymchwil a lles ôl-radd sefydledig Prifysgol Bangor. Un o gryfderau nodedig Rhythms of Life yw ei ddull integredig o hyfforddi a meithrin carfannau. Rydym yn strwythuro hyn o amgylch tri maes cydgysylltiedig: arbenigedd pwnc a rhuglder rhyngddisgyblaethol; cydweithio ac arweinyddiaeth; a chyfathrebu proffesiynol â chynulleidfaoedd arbenigol a chyhoeddus.
Bydd pob myfyriwr (gan gynnwys y rhai ar y llwybr Meistr+) yn dechrau eu hamser ym Mangor gyda chwrs preswyl deuddydd Welcome to Rhythms yng Ngwarchodfa Awyr Dywyll Parc Cenedlaethol Eryri, i gyflwyno’r myfyrwyr i'r rhaglen a'i huchelgeisiau deallusol cyffredinol. Byddwn yn darparu trosolwg ar y rhaglen hyfforddi a datblygiad proffesiynol gynhwysfawr y maent yn ymuno â hi. Bydd gweithgareddau cymdeithasol meithrin carfan yn anelu at dorri'r garw a'r rhwystrau ymhlith myfyrwyr a staff a gosod y seiliau i gymuned lewyrchus.
Bydd y gweithgareddau hyfforddi helaeth yn cynnwys seminarau rhyngddisgyblaethol, gweithdai gwyddor data amserol, ymarfer ymchwil moesegol, defnydd cyfrifol o ddeallusrwydd artiffisial, encilion arweinyddiaeth ac ysgrifennu, a chefnogaeth benodol i geisiadau llwyddiannus am grantiau, cymrodoriaethau a cheisiadau academaidd neu swyddi eraill. Cefnogir rhwydweithio proffesiynol yn fewnol (trwy gynhadledd flynyddol y myfyrwyr) ac yn allanol (trwy siaradwyr gwadd rheolaidd). Mae gweithgareddau cymdeithasol creadigol a chynhwysol, a phrojectau grŵp i ymgysylltu â'r cyhoedd yn atgyfnerthu cydlyniant y garfan wrth ddatblygu hyder a hunaniaeth broffesiynol. Gyda'i gilydd, mae'r model hyfforddiant integredig a chymunedol hwn yn sicrhau bod myfyrwyr Rhythms of Life yn graddio gyda doethuriaethau rhagorol a hefyd gyda'r sgiliau, y rhwydweithiau a'r profiad sydd eu hangen arnynt i ddylanwadu ar ddyfodol ymchwil y maes ac i fod yn llysgenhadon rhyngddisgyblaethol mewn unrhyw sector.
Ysgoloriaethau PhD
Disgwylir i ymgeiswyr llwyddiannus feddu ar o leiaf radd israddedig 2:1 mewn pwnc sy'n berthnasol i'w project dewisol. Mae cymhwyster lefel meistr yn ddymunol ond nid yw'n ofynnol.
Ysgoloriaethau Meistr+ PhD
Disgwylir i ymgeiswyr llwyddiannus feddu ar o leiaf radd israddedig 2:1 mewn pwnc sy'n berthnasol i'w rhaglen MSc dewisol. I fod yn gymwys i wneud ysgoloriaethau Meistr + PhD, rhaid i ymgeiswyr fodloni'r meini prawf canlynol:
- Bod yn fyfyriwr sy'n byw yn y Deyrnas Unedig
- Ddim yn meddu eisoes ar radd Meistr o Brifysgol Bangor
- Bod o gefndir incwm isel gyda thystiolaeth o fod wedi derbyn benthyciad cynhaliaeth llawn neu fenthyciad cymorth arbennig yn ystod eu hastudiaethau israddedig, er enghraifft.
a/neu fod yn un o'r categorïau ethnigrwydd canlynol:
- Du Affricanaidd
- Du Caribïaidd
- Du – Arall
- Cymysg – Gwyn a Du Caribïaidd
- Cymysg – Gwyn a Du Affricanaidd
- Cefndir cymysg arall (gan gynnwys Du Affricanaidd, Du Caribïaidd a Du - Arall)
Dros gyfnod y rhaglen, gellir cynnig hyd at 10 ysgoloriaeth ddoethurol i fyfyrwyr rhyngwladol. Bydd yr ysgoloriaethau rhyngwladol hyn yn cynnwys yr un gefnogaeth ariannol ag ysgoloriaethau'r Deyrnas Unedig. Yn ogystal, bydd ysgoloriaethau rhyngwladol yn cynnwys y ffioedd rhyngwladol llawn ac yn cyfrannu at gostau fisa a mewnfudo. Er mwyn cyfrannu at ymdrechion i ddad-wladychu ymchwil a datblygu partneriaethau teg gyda chydweithwyr rhyngwladol, byddwn yn anelu at recriwtio o leiaf draean o’r myfyrwyr rhyngwladol o'r De Byd-eang.
Oherwydd gofynion ariannu, nid yw myfyrwyr rhyngwladol yn gymwys i’r llwybr Meistr + PhD.
Yn ogystal â phrojectau doethurol a hysbysebir, rydym yn croesawu ymgeiswyr i weithio gyda goruchwylwyr posib i ddatblygu eu syniadau ymchwil eu hunain sy'n cyd-fynd â themâu Rhythms of Life. Bydd dyddiadau cau a chyfarwyddiadau ar gyfer ceisiadau dan arweiniad myfyrwyr ar gael ar y wefan hon. Yn y lle cyntaf, adolygwch ein rhestr o oruchwylwyr posib a chysylltwch ag aelodau staff perthnasol i drafod eich syniadau.
Bwrdd Rheoli Rhythms of Life
Dr Amy Ellison
Mae Amy yn Gyd-gyfarwyddwr Rhythms of Life. Mae hi'n fiolegydd moleciwlaidd sydd â diddordeb yng nghronobioleg iechyd a lles anifeiliaid.
Dr Alexander Georgiev
Mae Alex yn Gyd-gyfarwyddwr Rhythms of Life. Mae'n brimatolegydd sy'n ymchwilio i effeithiau newid cynefinoedd anthropogenig ar ymddygiad, ecoleg, ffisioleg ac iechyd primatiaid.
Dr Alex Sutton
Alex yw Dirprwy Gyfarwyddwr Recriwtio, Cydraddoldeb, Amrywiaeth a Chynhwysiant a Llesiant. Mae’n ecolegydd newid byd-eang sydd eisiau deall yr hyn sy'n gyrru ymatebion gwahanol i newid yn yr hinsawdd.
Yr Athro Ross Roberts
Ross yw Dirprwy Gyfarwyddwr Hyfforddiant Rhyngddisgyblaethol ac Adeiladu Carfannau. Mae'n seicolegydd chwaraeon ac ymarfer corff ac mae ei ymchwil yn cynnwys cyfraniad cwsg at berfformiad pobl.
Dr James Waggitt
James yw Dirprwy Gyfarwyddwr Datblygiad Proffesiynol, Cysylltiadau Cyn-fyfyrwyr ac Etifeddiaeth. Mae ei ymchwil yn canolbwyntio ar ddeall sut mae ffactorau ymddygiadol ac amgylcheddol yn dylanwadu ar ddosbarthiad morfilod ac adar môr.
Dr Kirsty MacLeod
Mae Kirsty yn astudio'r cysylltiadau rhwng ymddygiad anifeiliaid, hanes bywyd a ffisioleg, a sut mae unigolion yn rhyngweithio â'i gilydd a'u hamgylchedd, yn bennaf (ond nid yn gyfan gwbl!) mewn ymlusgiaid.
Yr Athro Sue Niebrzydowski
Mae Sue yn Athro Llenyddiaeth Ganoloesol, Deon Ymchwil Ôl-radd a Phennaeth Academi Ddoethurol Prifysgol Bangor.
Yr Athro Sam Oliver
Sam yw Cyfarwyddwr y Sefydliad Ffisioleg Ddynol Gymhwysol. Mae ei ymchwil yn astudio sut mae ymarfer corff, diet, cwsg a straen amgylcheddol yn effeithio ar iechyd a pherfformiad pobl.
Yr Athro Paul Mullins
Mae Paul yn Athro Niwroddelweddu ac Uwch Ffisegydd yn Uned Delweddu Bangor, ac mae’n ymchwilio i ddeinameg amserol niwrogemeg a ffisioleg yr ymennydd mewn iechyd a chlefyd.
Dr Marianna Chimienti
Mae Marianna yn ecolegydd meintiol sy'n canolbwyntio ar brosesau symud anifeiliaid, eu hymatebion i newid amgylcheddol a'u cysylltiad â dynameg poblogaeth a strategaethau cylch bywyd.
Cyfleoedd PhD
Hysbysebir projectau PhD i garfan 2027 yma yn yr hydref yn 2026.
Cyfleoedd PhD
Hysbysebir projectau PhD i garfan 2027 yma yn yr hydref yn 2026.
Tanysgrifiwch i'n rhestr bostio i gael y wybodaeth ddiweddaraf am y projectau sydd ar gael.
Mae chwe ysgoloriaeth Meistr+ (M+) ar gael i fyfyrwyr Du neu o gefndir incwm isel sy'n byw yn y Deyrnas Unedig dros gyfnod y rhaglen. Mae ysgoloriaethau M+ yn cynnig 5 mlynedd o gyllid, gan gynnwys ffioedd a grant cynhaliaeth i bob blwyddyn. Gall myfyrwyr gofrestru ar nifer o gyrsiau Meistr hyfforddedig ym Mhrifysgol Bangor.
Tanysgrifiwch i'n rhestr bostio i gael rhagor o wybodaeth ynglŷn â sut i wneud cais.
Mae chwe ysgoloriaeth Meistr+ (M+) ar gael i fyfyrwyr Du neu o gefndir incwm isel sy'n byw yn y Deyrnas Unedig dros gyfnod y rhaglen. Mae ysgoloriaethau M+ yn cynnig 5 mlynedd o gyllid, gan gynnwys ffioedd a grant cynhaliaeth i bob blwyddyn. Gall myfyrwyr gofrestru ar nifer o gyrsiau Meistr hyfforddedig ym Mhrifysgol Bangor.
Tanysgrifiwch i'n rhestr bostio i gael rhagor o wybodaeth ynglŷn â sut i wneud cais.
Darllen am ein diddordebau ymchwil a'n harbenigedd. Mae'r aelodau staff academaidd canlynol yn oruchwylwyr posib i brojectau doethurol a thraethodau hir MSc i ymgeiswyr ar y llwybr Meistr + PhD. Nid yw'r rhestr hon yn gynhwysfawr ac os hoffech ddatblygu cynnig gydag aelodau staff eraill, cysylltwch â hwy i drafod eich diddordebau a'ch syniadau.
Mae’r meysydd ymchwil yn yr Ysgol Gwyddorau Amgylcheddol a Naturiol ym Mhrifysgol Bangor yn eithriadol o eang ac yn rhychwantu amrywiaeth helaeth o wyddorau amgylcheddol a biolegol, o fioleg foleciwlaidd i brosesau ecosystemau a phopeth rhwng y ddau begwn.
Cliciwch ymai weld y rhestr lawn o staff academaidd.
Un nodwedd o'r ymchwil yn Ysgol Gwyddorau’r Eigion ym Mhrifysgol Bangor yw'r dull rhyngddisgyblaethol o weithredu sy'n hollbwysig i fynd i'r afael â'r heriau cynyddol a chymhleth sy'n wynebu'r byd, gan gynnwys newid amgylcheddol byd-eang, colli bioamrywiaeth, dirywiad pridd a defnydd anghynaladwy o adnoddau naturiol.
Cliciwch yma i weld y rhestr lawn o staff academaidd.
Mae’r Ysgol Seicoleg a Gwyddor Chwaraeon yn dod â dwy o adrannau rhagorol Prifysgol Bangor ynghyd: Seicoleg a Gwyddorau Chwaraeon ac Ymarfer. Mae ein hymchwil, sydd gyda’r gorau yn y byd, yn cynnwys niwrowyddoniaeth wybyddol, ymyriadau clinigol, llesiant seicolegol, perfformiad elît, gweithgarwch corfforol, iechyd a ffisioleg ddynol gymhwysol, ac mae’n cael effaith sylweddol ar y byd go iawn.
Cliciwch yma i weld y rhestr lawn o staff academaidd.
Mae’r Ysgol Seicoleg a Gwyddor Chwaraeon yn dod â dwy o adrannau rhagorol Prifysgol Bangor ynghyd: Seicoleg a Gwyddorau Chwaraeon ac Ymarfer. Mae ein hymchwil, sydd gyda’r gorau yn y byd, yn cynnwys niwrowyddoniaeth wybyddol, ymyriadau clinigol, llesiant seicolegol, perfformiad elît, gweithgarwch corfforol, iechyd a ffisioleg ddynol gymhwysol, ac mae’n cael effaith sylweddol ar y byd go iawn.
Cliciwch yma i weld y rhestr lawn o staff academaidd.
Ym Mangor, ymchwil yw sylfaen ein haddysgu. Gallwch astudio amrywiaeth eang o gyrsiau, ar lefel israddedig ac ôl-raddedig, sydd wedi ei seilio ar yr ymchwil byd eang rydym yn ei wneud yn y maes hwn.
Ym Mangor, ymchwil yw sylfaen ein haddysgu. Gallwch astudio amrywiaeth eang o gyrsiau, ar lefel israddedig ac ôl-raddedig, sydd wedi ei seilio ar yr ymchwil byd eang rydym yn ei wneud yn y maes hwn.
