Cylchlythyr Deiliaid Cynnig

Croeso i Ysgol Feddygol Gogledd Cymru

Llongyfarchiadau ar dderbyn cynnig gan Ysgol Feddygol Gogledd Cymru, Prifysgol Bangor! Fel Pennaeth yr Ysgol, rwyf eisiau cydnabod y garreg filltir arwyddocaol hon yn eich taith academaidd wrth ichi wneud dewisiadau fydd yn effeithio ar eich dyfodol.

Mae eich taith gyda ni yn arwydd o ymrwymiad i ddeall, darganfod a thrawsnewid gofal iechyd a meddygaeth. P'un a ydych yn cychwyn ar daith tuag at ymchwil feddygol, datblygiadau biofeddygol, datblygiadau fferyllol neu fod yn feddyg yn y dyfodol, bydd pob un ohonoch yn chwarae rhan ganolog mewn gofal iechyd.

Yn Ysgol Feddygol Gogledd Cymru, rydym yn ymfalchïo yn ein hymrwymiad i’n myfyrwyr a’u dysgu gan sicrhau eu bod yn cael eu cefnogi i ragori nid yn unig yn eu gweithgareddau academaidd ond yn eu bywyd yn y brifysgol hefyd. Bydd y cyfnod cyffrous hwn pan fyddwn yn cyflwyno meddygaeth yn ffurfiol i’n portffolio gyda’n carfan gyntaf yn dechrau ym Mangor ym mis Medi 2024 yn cryfhau ein sefyllfa ac yn rhoi mwy o gyfleoedd cyffrous i fyfyrwyr ar ein rhaglenni.

Edrychwn ymlaen at y posibilrwydd o'ch croesawu i'n cymuned academaidd, lle gallwch astudio, dysgu a chyfrannu at y meysydd sydd o’r diddordeb mwyaf i chi.

Dymuniadau gorau

Yr Athro Mike Larvin.

Ymunwch â ni mewn digwyddiad

Hyd yn oed os ydych wedi mynychu Diwrnod Agored ym Mhrifysgol Bangor o’r blaen, mae croeso i chi ymweld eto. Mae’r digwyddiadau yn yn gyfle i chi ddysgu mwy amdanom ni, cael gwell dealltwriaeth o’ch cwrs a dod i wybod mwy am eich opsiynau llety.

Mwy o wybodaeth

Sut i dderbyn eich cynnig

Os nad ydych yn siŵr beth yw’r camau nesaf ar ôl derbyn eich cynnig am le i astudio ym Mhrifysgol Bangor - cymerwch olwg ar ein canllaw cam wrth gam.

Camau Nesaf

Gwneud Cais am Lety Myfyrwyr

Mae pob ymgeisydd o’r DU ac Iwerddon sydd wedi dewis Prifysgol Bangor fel eu dewis Cadarn UCAS, yn sicr o gael ystafell ar gyfer blwyddyn gyntaf eich gradd israddedig. Os nad ydych wedi gwneud cais am lety yn barod, byddwn yn anfon e-bost atoch pan ddaw'r amser i wneud cais.

Llety Myfyrwyr

Newyddion Diweddaraf o'r Ysgol Feddygol Gogledd Cymru

Fel rhan o'n hymrwymiad i addysg ryngbroffesiynol, daeth myfyrwyr o feysydd y Gyfraith a Meddygaeth ym Mhrifysgol Bangor ynghyd ym mis Tachwedd er mwyn cynnal ffug-gwest crwner. Roedd Kate Robertson, crwner gogledd Cymru (Gorllewin) yn bresennol a gwnaeth yn siŵr bod y myfyrwyr yn cael y profiad mwyaf realistig posibl, gan roi pryd o dafod i rai darlithwyr am beidio â bod yn dawel yn y llys!

Roedd dau actor yn bresennol hefyd, yn chwarae aelodau o deulu’r ymadawedig, a chawsant eu holi gan fyfyrwyr y gyfraith a oedd yn gweithredu fel timau cyfreithiol dros ymddiriedolaeth yr ysbyty a’r teulu. Cafodd ein myfyrwyr meddygaeth hefyd eu holi gan y timau cyfreithiol, a chawsant gyfle i ddangos eu gwybodaeth feddygol mewn perthynas â’r achos a chyfle i ddeall sut i ateb cwestiynau yn y math hwn o gwest.

Roedd hwn yn brofiad gwych i'r myfyrwyr meddygaeth a fydd efallai’n cael eu galw i Lys y Crwner ar ryw adeg yn ystod eu gyrfa. Mae addysg ryngbroffesiynol yn bwysig oherwydd nid dim ond yn eu bydoedd bach eu hunain y bydd y myfyrwyr yn dysgu. Mae dysgu oddi wrth ei gilydd, ac ennill persbectif ehangach o sut y byddant yn gweithio gyda phroffesiynau eraill yn y dyfodol yn golygu y byddant yn teimlo'n hyderus ac yn barod i fynd i’r afael â sefyllfaoedd o’r fath os byddant yn codi yn eu gyrfaoedd yn y dyfodol.

Ym Mhrifysgol Bangor, rydym yn addysgu ein myfyrwyr meddygaeth yn defnyddio dull dysgu ar sail achosion, lle mae myfyrwyr yn cymhwyso eu gwybodaeth i senarios meddygol go iawn. Fel rhan o’r dull hwn, rydym yn cynnal Diwrnod Iechyd Gwledig ar gyfer ein myfyrwyr Blwyddyn 2 – profiad ymarferol yw hwn sy’n dod â’r hyn y maent wedi’i ddysgu ar sail achosion yn fyw. Yn achos 17, sy'n canolbwyntio ar iechyd gwledig, bydd myfyrwyr yn cael darlithoedd, hyfforddiant cymorth cyntaf, a gweithdai cyn mynd i’r afael â diwrnod efelychu unigryw 'yn y maes' mewn cydweithrediad â phartneriaid allweddol megis y tîm Achub Mynydd a Gwasanaeth Ambiwlans Cymru.

Bydd actorion, a fydd wedi’u paentio â gwaed ffug a cholur, yn creu senarios realistig, gan herio myfyrwyr i lywio argyfyngau gwledig. Mae'r achos yn ymwneud â dysgu sut i gyrraedd lleoliad damwain yn ddiogel, asesu cleifion sydd ag anafiadau oherwydd trawma, dysgu am rôl parafeddygon a sut mae gwasanaethau brys yn mynd ati i flaenoriaethu mewn sefyllfaoedd lle mae sawl person wedi’u hanafu.

Y tu hwnt i werslyfrau a darlithoedd, mae’r Diwrnod Iechyd Gwledig hwn yn arfogi ein myfyrwyr â’r gwytnwch a’r hyder i wynebu heriau gofal iechyd gwledig a sefyllfaoedd pwysau uchel, yn ogystal â’r profiad o gydweithio â gwasanaethau allweddol megis parafeddygon.

Cafodd dau fyfyriwr meddygol yn eu trydedd flwyddyn y cyfle cyffrous i gymryd rhan mewn Clinig Tedi Bêr a gynhaliwyd mewn ysgol gynradd leol yma yng ngogledd Cymru. Cafodd y ddau fyfyriwr eu rhoi i weithio gyda grŵp o blant rhwng 4 a 6 oed, ac aethant ati i ryngweithio'n fedrus â'r plant a'u tedi bêr sâl. Ar ôl gwneud archwiliad a nodi hanes manwl y claf, dyfeisiwyd cynllun rheoli cynhwysfawr ar gyfer y tedi 'sâl', gan ddefnyddio amrywiaeth o blastrau, rhwymynnau a 'phigiadau.'

Roedd y profiad unigryw hwn yn llwyfan gwerthfawr ar gyfer mireinio eu sgiliau cyfathrebu paediatreg, gan gynnig cyfle i ymgysylltu â phlant mewn amgylchedd pleserus a chwareus. Yn ogystal â chyd-fynd â chwricwlwm Iechyd a Lles plant, roedd y Clinig Tedi Bêr yn gyfle i'n myfyrwyr meddygaeth feithrin eu sgiliau addysgu trwy weithgareddau chwarae rôl rhyngweithiol.

Ynghyd â chyfoethogi addysg feddygol ein myfyrwyr trwy fireinio eu sgiliau, roedd y Clinig Tedi Bêr hefyd yn weithgaredd allgyrsiol pleserus a oedd yn cynnig ffordd hyfryd ac effeithiol i’r myfyrwyr gysylltu â'r gymuned a chael effaith gadarnhaol ar fywydau dysgwyr ifanc a’u tedi bêrs sâl!

Myfyrwyr Meddygol a’r Gyfraith yn cymryd rhan mewn ffug-gwest crwner

Actorion yn cymryd rhan mewn diwrnod iechyd gwledig gyda myfyrwyr meddygol

Myfyriwr Meddygol yn cymryd rhan yn Ysbyty Tedi Bêr mewn ysgol gynradd leol

Llwyddiant Graddedig

Helo! Fy enw i yw Sam ac rwy’n feddyg iau yn gweithio gyda Bwrdd Iechyd Prifysgol Caerdydd a’r Fro yn fy mlwyddyn sylfaen gyntaf. Mi wnes i gymhwyso yn 2023 o raglen C21 Gogledd Cymru ym Mhrifysgol Bangor. Dechreuais fy hyfforddiant meddygol yn wreiddiol gyda gradd Ffarmacoleg Feddygol cyn dod i mewn i gynllun meddygaeth i raddedigion. Cymerais flwyddyn i ffwrdd hefyd rhwng fy nwy radd i gael profiad o ymchwil ym Mhrifysgol Caerdydd. Yn ystod fy ngradd feddygol, cefais leoliadau ar draws Bwrdd Iechyd Prifysgol Betsi Cadwaladr o Fangor i'r Rhyl i Wrecsam.

Treuliais lawer o fy amser hefyd yn archwilio cefn gwlad a hanes gwych Gogledd Cymru (gan gynnwys Ynys Môn). Dechreuais ymwneud â rhai o'r cymdeithasau oedd gan Brifysgol Bangor i'w cynnig. Mae gan Brifysgol Bangor gymdeithas ar gyfer bron unrhyw ddiddordeb, ac fe geir cymuned hyfryd yn ei sgil! Fe wnes i ymwneud llawer â llawer o'r cymdeithasau cerddorol ym Mangor yn ogystal â thîm pêl-droed pump bob ochr a grŵp cerdded. Llwyddais i ymuno â chlybiau badminton a sboncen lleol hyd yn oed. Yn y gweithgareddau hyn rydw i wedi gwneud llawer o ffrindiau am oes.

Sesiwn holi ac ateb gyda Sam

Es i mewn i feddygaeth gan ei fod yn ticio'r holl flychau iawn i mi. Roeddwn i bob amser yn mwynhau cael fy herio a datrys posau. Mae meddygaeth yn gwneud yn union hynny. Mae'n yrfa sy'n fy nghadw ar flaenau fy nhraed ac yn fy ysgogi i fod yn datblygu fy ngwybodaeth a'm sgiliau bob amser. Mae meddygaeth hefyd yn yrfa unigryw gan ei fod bob amser yn cyflwyno ffyrdd newydd o wthio'ch hun a llwybrau newydd i archwilio gyda'ch datblygiad personol. Gall fod yn yrfa a all roi mwy a mwy i chi po bellaf y byddwch yn buddsoddi ynddi. Gyrfa o bosibiliadau a chyfeiriadau di-ben-draw.

Wrth astudio ym Mhrifysgol Bangor a Bwrdd Iechyd Prifysgol Betsi Cadwaladr des ar draws goruchwylwyr/staff addysgu gwych ac ymroddedig a oedd wir wedi arwain fy astudiaethau, ac wedi fy helpu i gyflawni popeth rydw i wedi'i gyflawni yn yr ysgol feddygol. Caniataodd Prifysgol Bangor i mi nid yn unig astudio ar y rhaglen C21NW, ond hefyd i addysgu ar gyfer y Brifysgol. Datblygodd fy sgiliau addysgu (rhan allweddol o fod yn feddyg) ac i wir ganiatáu i mi ddechrau fy nhaith i feistroli fy nghrefft. Ym Mhrifysgol Bangor hefyd des ar draws goruchwylwyr ac athrawon a wnaeth fy ysbrydoli i fod y gorau y gallaf fod, o'u moeseg gwaith a'u gwybodaeth, i'w tosturi diwyro. Mae eu hargraffiadau yn dal i fy ysgogi heddiw.

Fe wnaeth Prifysgol Bangor fy helpu i ddatblygu cymaint o sgiliau allweddol i lefel uchel. Mae'n debyg mai'r wers fwyaf gwerthfawr rydw i wedi'i dysgu yw hyder. Hyder i weithio'n annibynnol, hyder i gymryd rhan a'r hyder i wneud camgymeriadau. Mae'n nodwedd rydw i wedi'i defnyddio o'r diwrnod cyntaf fel meddyg, ac mae fy sylfaen o hyder wedi fy ngalluogi i fwrw iddi yn fy ngwaith a chael y gorau o bob dydd fel meddyg. Fel myfyriwr fe wnaeth fy ngalluogi i gael y profiadau roeddwn i eu heisiau a’r addysgu oedd ei angen arnaf, ac fe wnaeth hyn i gyd fy helpu yn fy astudiaethau ac yn fy ymarfer clinigol.

Mae'n anodd dweud ble hoffwn i fod ymhen amser yn fy ngyrfa feddygol, ond gwn na fyddwn i erioed wedi cael y cyfle i fod yn amhendant hyd yn oed oni bai am raglen C21nw. Yn ystod fy amser gyda Bwrdd Iechyd Prifysgol Betsi Cadwaladr cefais gyfleoedd i archwilio amrywiaeth o broffesiynau meddygol, ar y cwricwlwm a thu allan iddo. Roedd cymaint o arbenigwyr a hyfforddeion yn awyddus i adael i mi archwilio eu harbenigedd fel fy mod i’n teimlo i mi lwyddo i brofi llawer iawn o arbenigeddau yn ystod fy amser gyda Bwrdd Iechyd Prifysgol Betsi Cadwaladr.

Byddwn yn ei argymell yn gryf. Roedd Prifysgol Bangor yn sefydliad a roddodd ffrindiau ac atgofion i mi na fyddaf byth yn eu hanghofio. Mae ysgol feddygol yn anodd ni waeth ble rydych chi'n mynd. Bydd gan bob ysgol ei phroblemau (coeliwch chi fi, ni waeth ble rydych chi mae'r porfeydd bob amser yn frasach ar yr ochr arall) ond nid oes gan bob Prifysgol y gymuned a'r cyfleoedd fel Bangor. Mae Prifysgol Bangor yn lle a roddodd gyfleoedd a phrofiadau i mi y byddwn wedi cael trafferth eu cael yn rhywle arall. Mae'n rhan hardd o'r byd gyda chymuned hyfryd o gwmpas y Brifysgol a thu allan iddi.