Cymuned Ddwyieithog ym Mangor

Mae dwyieithrwydd yn rhan naturiol o fywyd ym Mhrifysgol Bangor. Nid yw hyn yn fawr syndod gan ystyried fod Bangor wedi ei lleoli yn y sir gyda’r % uchaf o siaradwyr Cymraeg. Yn wir mae gan tua 70% o’n staff sgiliau yn y Gymraeg. Mae modd felly i chi dderbyn cefnogaeth drwy gyfrwng y Gymraeg ym mhob agwedd o’ch bywyd fel myfyriwr yma, gan gynnwys adran Gwasanaethau Myfyrwyr.

Yn academaidd, fe sylwch fod y darlithoedd a grwpiau seminar cyfrwng Cymraeg yn dueddol o fod yn llai o ran maint sy’n golygu fod y myfyrwyr yn dueddol o deimlo’n fwy cyfforddus ynddynt. O ganlyniad felly, mae mwy o gyfle i’r myfyrwyr hynny holi cwestiynau i’w darlithwyr a derbyn ychydig mwy o gefnogaeth.

Ceir cymuned Gymraeg gref ymysg ein myfyrwyr tu hwnt i’r darlithoedd hefyd, yn enwedig drwy weithgareddau UMCB sef Undeb Myfyrwyr Cymraeg Bangor.

Hyderwn felly y byddai unrhyw fyfyriwr sy’n siaradwr Cymraeg, waeth pa mor rhugl, yn teimlo’n gartrefol iawn ym Mhrifysgol Bangor ac mai dyma’r lle gorau ar eich cyfer i gael defnyddio a datblygu eich sgiliau iaith Gymraeg.

Cymerwch olwg yma ar yr holl fanteision sydd o astudio drwy gyfrwng y Gymraeg a'r gefnogaeth sydd ar gael i'ch cynorthwyo i wneud hynny, yn ogystal â chylwed gan ein myfyrwyr a darlithwyr.