Arweinydd: Guto Pryderi Puw
Cyfeilydd: Harry Sullivan
Y bwriad gwreiddiol oedd cynnal y cyngerdd hwn ym niwedd Mawrth 2020, ond bu raid ei ohirio yn sgil dyfodiad y pandemig. Pleser felly yw medru aildrefnu’r digwyddiad a chyflwyno darnau corawl amrywiol dan y thema ‘Golau a Thywyllwch’.
Ceir croestoriad eang o gyfansoddwyr yn y rhaglen, sy’n cynnwys ‘Hwyrgan’ adnabyddus Rheinberger a rhan-ganau bywiog o gyfnod cynharaf gyrfa Delius. Yng nghyfansoddiad llonydd Saint-Saëns mae testun y ddwy bennill mewn gwrthgyferbyniad i’w gilydd, gyda’r gyntaf yn ymdrin â thywyllwch a’r ail gydag adwaith y bardd i olau.
Ceir noson serenog yn gefndir i osodiad byr Samuel Barber tra bod y lleuad yn ganolbwynt i ddarnau fwy ymestynol Einion Dafydd a Katherine Betteridge. Golau artiffisial ar feddrod Eifftaidd yw’r ysbrydoliaeth tu ôl i ddarn Guto Pryderi Puw. Gorffennir y rhaglen gyda gosodiadau cynnar Delius, fel caiff y gynulleidfa ei thywys ar siwrnai synhwyrus o’r ‘tywyllwch i’r golau’.
Rhaglen Lawn:
Josef Rheinberger: ‘Abendlied’ o’r Drei Geistliche Gesänge Op.69
Camille Saint-Saëns: Calme des nuits (‘Llonyddwch y Nos’)
Katherine Betteridge: The Ones Who Live Beneath (ail berffformiad)
Samuel Barber: ‘Sure On This Shining Night’ o’r Pedair Cân Op.13
Einion Dafydd: Awr Cwsg
Guto Pryderi Puw: ‘Should Lanterns Shine’ o’r Tair Cerdd Dylan Thomas
Frederick Delius: detholiad o’r Chwe Rhan-Gân Gynnar
(dim egwyl)
Bywgraffiadau
Yn grŵp bach oddeutu ugain o gantorion brwdfrydig, y Côr Siambr dan arweiniad Guto Pryderi Puw yw un o ensemblau lleisiol mwyaf hyblyg Prifysgol Bangor. Mae’r Côr yn perfformio croestoriad eang o gerddoriaeth o’r oesoedd canol hyd at y presennol, gan gynnal cyngherddau yn rheolaidd ym Mangor ac mewn lleoliadau eraill ar draws Ogledd Cymru. Yn Nhachwedd 2017 perfformiodd y Côr (dan arweiniad Stephen Rees) yn ystod y cyngerdd Ordinary Men yn Eglwys y Plwyf, Biwmares ac fel rhan o’r cyngerdd Dychwelyd yn Pontio yn ystod Gŵyl Gerdd Bangor yn 2020. Perfformiwyd hefyd gyda’r baswr amryddawn Jeffrey Williams a’r pianydd Iwan Llewelyn Jones fel rhan o Gyngerdd Nadolig yn Eglwys Santes Fair, Conwy yn Rhagfyr 2022.
Graddiodd Guto Pryderi Puw mewn Cerddoriaeth o Brifysgol Bangor yn 1993 a thrwy Ysgoloriaeth Parry Williams derbyniodd ei Ddoethuriaeth yn 2002. Fe’i penodwyd yn Ddarlithydd Cerdd yn y Brifysgol yn 2006 gan arbenigo mewn Cyfansoddi a Cherddoriaeth Gyfoes gan ei ddyrchafu’n Bennaeth Cyfansoddi yn 2015. Bu’n weithgar yn hyrwyddo cerddoriaeth newydd yng ngogledd Cymru drwy ei gysylltiad fel Cyfarwyddwr Artistig Gŵyl Gerdd Bangor, yr hwn y bu’n un o’i sefydlwyr yn 2000.
Fel cyfansoddwr daeth Puw i lygaid y cyhoedd am y tro cyntaf wedi iddo ennill Tlws y Cerddor yn yr Eisteddfod Genedlaethol yn 1995 ac 1997. Yn 2006 fe’i penodwyd yn Gyfansoddwr Preswyl cyntaf gyda Cherddorfa Genedlaethol Gymreig y BBC gyda’i Concerto ar gyfer Obo yn ennill ‘Gwobr y Gwrandawyr’ yng Ngwobrau Cyfansoddwr Prydeinig yn 2007 tra perfformiwyd ‘…onyt agoraf y drws…’ yn ystod y Proms yn yr un flwyddyn. Rhyddhawyd detholiad o’i gyfansoddiadau cerddorfaol ar y CD Reservoirs ar label Signum Records yn 2014.
Bu’n un o sefydlwyr Côr Cyntaf i’r Felin yn 2003 gan eu harwain hyd 2015. Yn 2007 cafodd ei benodi’n Arweinydd a Chyfarwyddwr Artistig Côr Siambr Prifysgol Bangor.