Cronfa Bangor yn cefnogi cyfres Awduron Gwadd Y Llechan: Meithrin talent greadigol
Bu Cronfa Bangor yn cefnogi’r Ysgol Iaith, Diwylliant a’r Celfyddydau i gyflwyno cyfres o ddarlleniadau a gweithdai llenyddol Awduron Gwadd Y Llechan. Roedd awduron creadigol newydd y brifysgol yn frwdfrydig iawn am y gyfres a oedd yn cynnig cymysgedd deinamig o fformatau a dulliau creadigol. Ar draws y rhaglen, cafodd myfyrwyr y cyfle i ymgysylltu â grŵp amrywiol o awduron clodwiw, pob un yn dod â llais a safbwynt unigryw i'r gyfres.
Rhoddodd Bardd Cenedlaethol Cymru, Hanan Issa, sydd wedi derbyn gradd er anrhydedd yn ddiweddar, ddarlleniad ar-lein lle trafododd ei barddoniaeth gyda myfyrwyr, gan roi syniad o gyd-destunau proffesiynol ysgrifennu ar gomisiwn fel rhan o swyddogaeth gyhoeddus heriol.
Rhannodd y bardd o Fanceinion, Tom Jenks, ei gerddi delweddu data drwy berfformiad amlgyfrwng difyr a doniol. Ag yntau’n adnabyddus am gyhoeddi gyda gweisg bychain, ac am ail-greu cerddi fel gwrthrychau, cynhaliodd hefyd weithdy gyda myfyrwyr ar fodiwl Ysgrifennu Arbrofol Zoë Skoulding, gan eu hannog i feddwl mewn ffyrdd newydd am gyflwyniad a chylchrediad eu gwaith.
Dan arweiniad Dr Fiona Cameron, sy’n Ddarlithydd mewn Ysgrifennu Creadigol, trafododd Lucie McKnight-Hardy y stori fer fel cyfrwng ar gyfer ysgrifennu llenyddiaeth arswyd, gan ysbrydoli sawl myfyriwr blwyddyn olaf i ysgrifennu straeon dychryn ar gyfer y modiwl Short Sharp Shocks, a rannwyd yn yr Arddangosfa Greadigol ychydig cyn graddio.
Uchafbwynt y gyfres oedd ymweliad SJ Kim, y mae ei gwaith ffeithiol greadigol treiddgar yn archwilio hunaniaethau trawsddiwylliannol cyfoes.
Mewn trafodaeth gydag Alys Conran, sy’n Uwch Ddarlithydd mewn Ysgrifennu Creadigol, siaradodd y nofelydd Megan Barker am y broses o ysgrifennu a'r gorgyffwrdd rhwng y nofel a ffurfiau celfyddydol eraill.
Dywedodd Zoë Skoulding, sy’n Athro Barddoniaeth ac Ysgrifennu Creadigol:
Rydym yn ddiolchgar i'r awduron am eu parodrwydd i rannu profiadau a safbwyntiau gyda'n myfyrwyr, ac mewn rhai achosion hyd yn oed am gadw mewn cysylltiad â myfyrwyr ar ôl y digwyddiad, ac am eu hannog i deimlo'n rhan o gymuned lenyddol ehangach. Rydym hefyd yn hynod ddiolchgar i'r cyn-fyfyrwyr y mae eu cyfraniadau hael wedi gwneud y digwyddiadau hyn yn bosibl trwy Gronfa Bangor.
The Bangor Fund
Mae Cronfa Bangor yn cael ei hariannu gan gyfraniadau gan gyn-fyfyrwyr ac yn cael ei gweinyddu gan y Swyddfa Datblygu a Chysylltiadau Cyn-fyfyrwyr.
