Sefydlwyd Ysgoloriaeth Anne Brooke i gefnogi myfyrwyr israddedig sydd am astudio’r Gymraeg fel pwnc (iaith gyntaf neu ail iaith) mewn prifysgol yng Nghymru.
Cafodd Darcey ei haddysg gynnar yn Llundain cyn symud gyda’i theulu i Gaerffili a dechrau mynychu Ysgol Gyfun Gymraeg Cwm Rhymni.
Mae Darcey wedi ennill yr ysgoloriaeth i astudio’r Gymraeg ym Mhrifysgol Bangor. Dywedodd Darcey:“Rwyf wedi rhoi fy mryd ar astudio Cymraeg yn y brifysgol ers symud i Gymru yn ferch fach, felly mae derbyn yr ysgoloriaeth hon yn anrhydedd.
“Cefais fagwraeth gynnar ar aelwyd ddwyieithog yn Llundain a mynychu meithrinfa lle’r oedd dros ddeg ar hugain o ieithoedd i'w clywed. Ar ôl symud i Gymru, buan iawn y cefais fy siomi wrth sylweddoli fy mod yn y lleiafrif gan fod fy nghyfoedion yn yr ardal yn dewis troi at y Saesneg. Gwnaeth hyn gryfhau fy angerdd tuag at y Gymraeg a fy nyheuad i’w hastudio a’i wneud yn ganolog i fy mywyd a’m gyrfa.”
Mae Ysgoloriaeth Anne Brooke er cof am yr awdures Americanaidd a ddysgodd Gymraeg ac a ymgartrefodd yn y Rhondda. Cyhoeddodd nifer o lyfrau plant Cymraeg i gefnogi rhieni di-Gymraeg i ddarllen gyda’u plant, gan gynnwys y cyfresi poblogaidd Plant y Goedwig, Mabon a Mabli a Storïau’r Sosban Fawr.
Sefydlwyd yr ysgoloriaeth gan y Coleg ar ôl derbyn rhodd hael gan nai Anne Brooke, Peyton Robertson. Dywedodd Peyton:
“Congratulations to Darcey for being the first recipient of the Anne Brooke scholarship! I know my Aunt would be very pleased to see her lifelong effort to preserve the Welsh language carried forward through Darcey's sincere interest in studying and using Welsh as part of her career growth and development."
Ychwanegodd Darcey, “Mae stori Anne yn ysbrydoledig, ac fel un sy’n dod o’r un ardal yng Nghymru, rwy’n gobeithio y gallaf innau wneud fy rhan i ysgogi pobl ifanc i ddefnyddio eu Cymraeg a pharhau â’u haddysg cyfrwng Cymraeg ar ôl gadael yr ysgol.”
Dywedodd Dr Ioan Matthews, Prif Weithredwr y Coleg Cymraeg
“Hoffwn longyfarch Darcey ar ennill Ysgoloriaeth Anne Brooke a dymunwn pob llwyddiant iddi yn astudio’r Gymraeg ym Mhrifysgol Bangor. Mae ei hangerdd a’i hymrwymiad i’r Gymraeg yn amlwg, ac rwy’n siŵr y bydd yn manteisio ar bob cyfle gwerthfawr y bydd astudio’r Gymraeg yn eu cynnig iddi yn y brifysgol a thu hwnt, ac yn ei gyrfa yn y dyfodol.
“Hoffwn hefyd ddiolch i deulu’r diweddar Anne Brooke, Peyton, Brooke ac Elizabeth Robertson, am y rhodd hael sydd wedi caniatáu i ni sefydlu a chynnig yr ysgoloriaeth hon a fydd yn cefnogi’r genhedlaeth nesaf o fyfyrwyr sydd am astudio’r Gymraeg fel pwnc - iaith gyntaf neu ail iaith.
“Mae’n braf gweld gwaddol Anne Brooke yn parhau drwy'r ysgoloriaeth hon ac yn cyfrannu at ein huchelgais i weld rhagor o ddysgwyr yn dewis astudio drwy gyfrwng y Gymraeg a datblygu eu sgiliau Cymraeg. ”
Mae’r ysgoloriaeth werth £1,000 y flwyddyn am hyd at 3 blynedd (cyfanswm o £3,000) a bydd yn cael ei dyfarnu’n flynyddol.
Bydd ceisiadau ar gyfer blwyddyn academaidd 2027 - 2028 yn cael eu dyfarnu o blith y ceisiadau am Brif Ysgoloriaeth y Coleg. Bydd angen cwblhau'r ffurflen gais yn adran Prif Ysgoloriaeth ar wefan y Coleg cyn 20 Ionawr 2027.
