Gallwch gymryd rhan mewn amrywiaeth enfawr o chwaraeon. Mae gan Undeb Myfyrwyr Bangor ystod eang o dimau a chlybiau chwaraeon y gallwch ymuno â nhw, gan gynnwys chwaraeon traddodiadol fel pêl-droed, rygbi a thenis yn ogystal â gweithgareddau mwy anarferol fel quidditch, hoci tanddwr a ffrisbi eithafol.
Mae gennym hefyd gyfleusterau ffitrwydd rhagorol ar y campws, ac wrth gwrs mae ein lleoliad yn golygu y gallwch dreulio amser yn yr awyr agored yn dringo mynyddoedd, padl-fyrddio, caiacio, syrffio a llawer mwy.
Cyfleusterau ar y campws
Canolfan Brailsford
Mae Canolfan Brailsford, canolfan chwaraeon a hamdden y Brifysgol, wedi ei lleoli yng nghanol Ffriddoedd, y prif safle neuaddau.
Mae'r ganolfan yn cynnwys tair campfa llawn offer ar gyfer ymarfer cardiofasgwlaidd a hyfforddi pwysau, neuadd gymnasteg a wal ddringo gyda sawl lefel anhawster. Y tu allan ceir caeau pêl-droed a rygbi, cae synthetig gyda llifoleuadau i chwarae hoci, trac athletau a chyfleusterau amlbwrpas i chwarae tenis, pêl-droed pump-bob-ochr a phêl-rhwyd.
Trac Athletau a Chaeau Chwarae Treborth
Ymhlith y cyfleusterau yn Treborth, mae caeau pêl-droed, rygbi a Phêl-droed Americanaidd a thrac athletau.
Ystafell Ffitrwydd y Santes Fair
Mae ysgafell ffitrwydd ym Mhentref Santes Fair. Mae'r offer modern a gyflenwir gan LifeFitness yn cynnwys melinau troed, traws hyfforddwyr, beiciau, rhwyfwr dŵr ac amrywiaeth o beiriannau gwrthiant i alluogi ymarfer effeithiol.
Mae aelodaeth o'r gampfa yn gynwysedig i fyfyrwyr sy'n byw yn ein neuaddau preswyl.
Cyfleoedd ac Adnoddau Chwaraeon
Gweithgareddau awyr agored
Os oes gennych eisoes ddiddordeb mewn gweithgareddau awyr agored byddwch ar ben eich digon gyda'r amrywiaeth eang o chwaraeon sydd ar gael ar garreg eich drws. Yn Eryri ceir cyfleoedd gwych i ddringo a cherdded mynyddoedd a digonedd o chwaraeon dŵr, yn cynnwys canŵio, syrffio, a hwylio.
Cyfleusterau eraill ym Mangor a'r ardal
Ym Mangor ceir pwll nofio 25 metr gyda byrddau plymio 1m, 3m a 5m. Mae atyniadau poblogaidd eraill yn yr ardal yn cynnwys Zip World Eryri ym Methesda a Blaenau Ffestiniog, canolfan sgïo ac eirafyrddio Llandudno, Canolfan chwaraeon dŵr Surflines yn Llanberis, y Ganolfan Fynydda Genedlaethol yng Nghapel Curig a'r Ganolfan Chwaraeon Dŵr Genedlaethol ym Mhlas Menai ac Adventure Parc Snowdonia, sef parc chwaraeon dŵr a lagŵn syrffio artiffisial, yn nyffryn Conwy .
Ysgoloriaethau Chwaraeon
Rydym yn cefnogi myfyrwyr a dawn arbennig mewn chwaraeon trwy gynnig nifer o Ysgoloriaethau Chwaraeon gwerth hyd at £3,000 y flwyddyn. Bwriad yr Ysgoloriaethau yw cydnabod a chefnogi rhagoriaeth a chyrhaeddiad mewn chwaraeon ac nid yw'r ysgoloriaethau wedi eu cyfyngu i unrhyw gamp neilltuol nac i fyfyrwyr ar unrhyw gyrsiau penodol.