Uchafbwyntiau “Darlithoedd Engage” 2023

Yn y seminar gyntaf, 4 Hydref, 2023, bu’r Athro Jonathan Roberts yn trafod delweddu treftadaeth. Eglurodd ei waith ar harneisio Ffotogrametreg i Greu Modelau Delweddu Amgen o Dreftadaeth. Siaradodd Jonathan ynglŷn â delweddu treftadol. Canolbwyntiodd ar nifer o gwestiynau ymchwil gan gynnwys sut mae recordio modelau treftadol mewn 3D, creu modelau 3D o’r safle a delweddu’r data er mwyn i’r cyhoedd ac ymchwilwyr fedru deall a dehongli’r wybodaeth.

Yn yr ail seminar ar 11 Hydref, bu Rob Shepherd yn siarad ynglŷn â Data a Rhyngrwyd y Pethau (IoT). Graddiodd Rob Shepherd o adran gyfrifiadura Prifysgol Bangor. Ers 2009 mae’n rhedeg DataCymru Cyf, asiantaeth bwrpasol sy’n datblygu systemau cyfrifiadurol, ac yn ddiweddar EvoMetric Ltd, cwmni datrysiadau masnachol i Ryngrwyd y Pethau. Disgrifiodd hynt a helynt y cwmnïau hynny ym maes monitro o bell a Rhyngrwyd y Pethau – gan gynnwys monitro amgylcheddau gwyllt ac anghysbell, a’r tywydd ar gopa’r Wyddfa, yn ogystal â masnach, diwydiant, amaeth a hyd yn oed celfyddyd!

Ddydd Mercher 25 Hydref bu Dr. Michael Rushton yn siarad ynghylch ynni niwclear. Swynodd ei sgwrs "Inner and outer space: nuclear batteries and space reactors" y gwrandawyr trwy egluro sut mae gorsafoedd ynni niwclear yn cyflenwi trydan sylweddol i'r grid cenedlaethol, a sut y gallwn wneud y dechnoleg yn fwy hyblyg o lawer i wasanaethu ffynonellau pŵer symudol hirdymor ac anghenion, chwiliedyddion y gofod a hyd yn oed canolfannau ar y lleuad.

Ddydd Mercher, 18 Hydref, am hanner dydd, traddododd Dr Cristiano Palego ddarlith arbennig sef "Tracking the Buzz:  Yn y ddarlith honno cyflwynodd Cristiano Palego rai o ddatblygiadau a heriau diweddaraf y maes, a’r rheini’n seiliedig ar waith nifer o ymchwilwyr a fu’n archwilio gwahanol ddulliau o dracio pryfed peillio. Bu’n adolygu rhai o ddatblygiadau diweddar maes telemetreg gyda thagiau a hebddynt ar bryfed peillio. Bu’n canolbwyntio ar dair agwedd: dyluniad y trosglwyddydd neu'r synhwyrydd, dyluniad y derbynnydd neu'r synhwyrydd, ac integreiddio'r system â thechnegau canlyniadau a dosbarthu ymddygiadol gyda Deallusrwydd Artiffisial. 

Ddydd Mercher, 8 Tachwedd, bu Glory Ogbonda, myfyriwr PhD newydd ar raglen ddoethurol AIMLAC (Dysgu Peirianyddol gyda Deallusrwydd Artiffisial a Chyfrifiadura Uwch) yn darlithio ynghylch "A journey from studying to publication – publishing project work”. Eglurodd Glory ei brofiadau o astudio ar y cwrs MSc mewn cyfrifiadureg a gwneud gwaith project. Disgrifiodd sut yr ymestynnodd dri phroject a’u cyflwyno yn y gynhadledd Graffeg Gyfrifiadurol a Chyfrifiadura Gweledol.

Ar 15 Tachwedd bu Dr John Story yn siarad ynghylch "FabLAB, The Why, The How and The What". Ysgrifennodd “Fel cyfrifiadura gynt, mae ffabrigo digidol ar daith o’r hynod arbenigol i’r hollbresennol. Mae’r fabLAB yn adnodd sy’n gadael i bobl wneud ‘bron’ unrhyw beth mewn un lle.” Bu Rob yn ystyried hanes Rhwydwaith FabLab, y cymhellion y tu ôl iddo, y sefyllfa bresennol a’r cynlluniau at y dyfodol sy’n codi o’r sylfaenwyr yn MIT (Massachusetts Institute of Technology).

Ar 22 Tachwedd, traddododd Dr Roger Giddings ddarlith ynghylch "DSP-based Technologies for Future Communications Networks". Defnyddir Prosesu Signalau Digidol (DSP) yn helaeth yn y byd modern yn gefn i nifer o dechnolegau datblygedig yr ydym bellach yn eu cymryd yn ganiataol, megis adnabod lleferydd, realiti estynedig, sganio meddygol/delweddu a systemau radar. Mae DSP hefyd yn un o dechnolegau galluogi allweddol y systemau cyfathrebu sefydlog a diwifr modern. Mae eich ffôn clyfar er enghraifft yn gwbl ddibynnol ar algorithmau DSP cyflym iawn am ei weithrediad eithriadol a'i gysylltedd â’r rhwydwaith. Mae Canolfan DSP Prifysgol Bangor a sefydlwyd yn 2019 yn ganolfan ymchwil sy’n trin miliynau o bunnoedd. Dywedodd Roger “Ein gweledigaeth yw dod yn arweinydd byd eang mewn technolegau cyfathrebu digidol DSP i rwydweithiau 5G a 6G yn y dyfodol. Rydym yn dwyn arbenigwyr ynghyd mewn rhwydweithiau ffibr optegol, rhwydweithiau diwifr optegol, rhwydweithiau RF/Microdon a DSP, i gynnal ymchwil uwch sy’n seiliedig ar DSP i gyflawni atebion hyblyg a deinamig ar lefelau is-systemau, systemau a rhwydweithiau i gyflawni gofynion esblygol rhwydweithiau’r dyfodol.

Yn y sgwrs olaf ond un, ar 29 Tachwedd, siaradodd Dr Peter Butcher ynghylch The Making of Wizualization:  Siaradodd Pete am drochi gan ddefnyddio arddangosiadau a osodir ar y pen a rhoddodd arddangosiad o'i system delweddu trochol.

Yn olaf, ddydd Mercher, 6 Rhagfyr 2023, siaradodd yr Athro Nathan Abrams ynghylch “Technoleg mewn ffilm.” Ennynodd ddiddordeb y gynulleidfa trwy sôn am dechnoleg mewn ffilmiau, a sut caiff technoleg ei defnyddio i greu ffilmiau. Bu’r enghreifftiau, y clipiau fideo ac ehangder yr wybodaeth am ffilmiau’n gweddu i gyfres seminarau engage 2023.