Llwyddiant dwbl i ysgolion gogledd Cymru sy'n gweithio gyda'r Gwyddorau Meddygol yng Ngwobrau Cenedlaethol STEM Cymru EESW

Mae timau o ddwy ysgol yng ngogledd Cymru sy'n gweithio gyda'r Ysgol Gwyddorau Meddygol wedi ennill gwobrau cenedlaethol wrth gymryd rhan ym Mhroject EESW STEM Cymru. Mae'r digwyddiad blynyddol hwn yn cael ei gynnal i annog myfyrwyr Blwyddyn 12 i ystyried gyrfa STEM trwy roi profiad cadarnhaol iddynt weithio gyda gwyddonwyr a pheirianwyr proffesiynol.

Gofynnwyd i ni weithio gyda dau dîm, un o Ysgol Alun yn Yr Wyddgrug a'r llall o Ysgol David Hughes ym Mhorthaethwy, a gosod briff project yn ymwneud â phroblem wirioneddol iddynt ymchwilio iddi a chynhyrchu adroddiad terfynol. Mae cynnyrch mewn bagiau wedi'u golchi ymlaen llaw yn ddewis poblogaidd i gogyddion amatur prysur, ond mae'r ddelwedd o ddail salad ffres yn cael eu glanhau mewn dŵr ffynnon glân gloyw’n llifo ymhell o realiti baddonau diwydiannol sy'n cynnwys hydoddiant clorin. Senario a allai fod yn beryglus yw un lle mae E. coli sy'n gallu gwrthsefyll gwrthfiotigau’n preswylio ymhlith fflora perfeddol iach unigolyn gan gynyddu'r risg o sepsis sy'n peryglu bywyd. Gosodwyd her i'r timau ymchwilio i raddfa bosibl y broblem hon gan ddefnyddio technegau microbiolegol cyffredin.

Dros sawl mis ac o dan arweiniad eu mentor, Helena Robinson, Swyddog Ymchwil yn yr Ysgol Gwyddorau Meddygol, fe wnaethant ddylunio eu dull ymchwilio a chynnal arbrofion yn yr ysgol ac mewn cydweithrediad â Helena. Yn anffodus, dim ond Ysgol David Hughes a lwyddodd i ymweld â'n labordai cyn i'r pandemig gyrraedd, ond llwyddodd y ddau dîm i gwblhau eu projectau a chyflwyno adroddiadau ysgrifenedig i banel o aseswyr. Bu timau o bob rhan o Gymru yn cystadlu am ystod o wobrau ac roeddem yn falch iawn bod Cyfarwyddiaeth Addysg Llywodraeth Cymru wedi dyfarnu'r tîm o Ysgol Alun yn enillwyr y wobr Defnydd Gorau o Wyddoniaeth, ac mai Stephen Cowley o Ysgol David Hughes a gyhoeddwyd yn enillydd Gwobr Myfyriwr y Flwyddyn 2020 EESW.

Dywedodd Dr Gwyndaf Roberts, Darlithydd mewn Bioleg Celloedd yn yr Ysgol Gwyddorau Meddygol, Prifysgol Bangor:
“Mae pawb yn yr Ysgol Gwyddorau Meddygol ym Mhrifysgol Bangor wrth eu boddau o glywed am Wobr Myfyriwr y Flwyddyn 2020 EESW / STEM Cymru. Trwy gydweithrediad agos ein gwyddonwyr ymchwil a'n darlithwyr, cymerodd Stephen ran mewn project a roddodd flas o sut beth yw bod yn ficrobiolegydd proffesiynol sy'n mynd i'r afael ag ymchwiliad iechyd cyhoeddus realistig."

Hoffem longyfarch holl aelodau timau Ysgol Alun ac Ysgol David Hughes am ddau broject a gwblhawyd i safon uchel iawn. Nid oes gennym unrhyw amheuaeth bod gan bob un ohonynt ddyfodol disglair mewn gwyddoniaeth. Roedd ein cyfranogiad yn y project hwn yn bosibl diolch i'r cydweithrediad agos rhwng ein gwyddonwyr ymchwil a'n darlithwyr, ac rydym yn ddiolchgar i STEM Cymru am y cyfle i roi blas i'r bobl ifanc hyn o sut beth yw bod yn ficrobiolegydd proffesiynol sy'n mynd i’r afael ag ymchwiliad iechyd cyhoeddus realistig.

Dyddiad cyhoeddi: 8 Ionawr 2021