Mae Bangor yn golygu busnes yn y Ffair Yrfaoedd flynyddol

Mewn marchnad swyddi sy'n gynyddol gystadleuol, nid yw hi byth yn rhy gynnar i fyfyrwyr ddechrau meddwl am eu hopsiynau gyrfa.

Mae mynd i'r brifysgol bellach ynghylch mwy na darlithoedd a thraethodau: mae hefyd ynglŷn â pharatoi at fyd cyflogaeth, ac mae rhwydweithio, profiad gwaith a CV cryf i gyd yn elfennau allweddol yn arfogaeth unrhyw fyfyriwr sy'n chwilio am swydd.

Yn Ysgol Busnes Bangor, mae'r Ffair Yrfaoedd a Chyflogadwyedd flynyddol yn cynnig cyfle anhepgor i ddatblygu'r cymwyseddau hyn ac achub y blaen ar chwilio am swydd ar ôl graddio.

Cafodd y ffair ei chynnal yng Nghanolfan Rheolaeth Prifysgol Bangor ar 12 Hydref, a chafodd myfyrwyr o bob lefel astudio gyfle i gwrdd â recriwtwyr rhanbarthol a chenedlaethol yn cynrychioli ystod eang o lwybrau gyrfa, yn cynnwys cyfrifyddiaeth, y gwasanaeth sifil, recriwtio a marchnata - llawer ohonynt â chynlluniau i raddedigion, interniaethau a swyddi gwag i'w hyrwyddo.

Wrth esbonio pwysigrwydd digwyddiadau o'r fath, dywedodd Clare Brass, Cydlynydd Cyflogadwyedd ym Mhrifysgol Bangor: "Mae Ffeiriau Gyrfaoedd yn cynnig cyfleoedd amhrisiadwy i fyfyrwyr ddysgu am lwybrau ac opsiynau gyrfa, cysylltu â chyflogwyr a recriwtwyr a chael gwybodaeth hollbwysig am ofynion sefydliadau a thechnegau recriwtio.

"Mae cael yr holl arbenigedd hwn dan un to yn ysbrydoliaeth, a gall hefyd fod yn wir hwb i hyder myfyrwyr pan ddaw at geisiadau am swyddi a chamu i'r byd proffesiynol".

Er mwyn ceisio ychwanegu mwy o werth i'r ffair swyddi draddodiadol, roedd digwyddiad Ysgol Busnes Bangor hefyd yn cynnig clinig CV, sesiynau trafod arbenigol a phanel cwestiwn ac ateb gyda chyn fyfyrwyr, gan gynnig cipolwg gwerthfawr i'r garfan bresennol ar siwrneiau graddedigion o'r ystafell ddosbarth i'r ystafell fwrdd.

Efallai mai’r nodwedd fwyaf cyffrous oedd y Gêm Recriwtio, lle ymgymerodd myfyrwyr a gyrhaeddodd y rhestr fer â heriau tebyg i'r Apprentice am gyfle i ennill interniaeth neu leoliad gwaith cyflogedig gydag un o dri busnes:  75point3, Dafydd Hardy a Zip World.Panel alumni - Ch-Dd: Ross Starkie, Oana Lazar, Mr David James (cadair y sesiwn), Tan Bich Ngoc (trwy Skype), Fiona Anderson, Dr Edward JonesPanel alumni - Ch-Dd: Ross Starkie, Oana Lazar, Mr David James (cadair y sesiwn), Tan Bich Ngoc (trwy Skype), Fiona Anderson, Dr Edward Jones

"Fel sefydliad a gaiff ei lywio gan ymchwil, mae ein rhaglenni yn tynnu ar ddadansoddiad praff ac arbenigol o faterion o bwys a dadleuon perthnasol", dywedodd yr Athro Jonathan Williams, Pennaeth Ysgol Busnes Bangor. "Mae hyn - ynghyd â'n cydweithio â phartneriaid busnes lleol, cenedlaethol a byd-eang ar ddigwyddiadau megis y Ffair Yrfaoedd - yn rhoi mantais gystadleuol i'n myfyrwyr a fydd yn gwella eu cyflogadwyedd."

Mae Ysgol Busnes Bangor yn dymuno diolch i bawb a gymerodd ran:

  • 75point3
  • ACCA
  • Bloomberg
  • Gwasanaeth Gyrfaoedd a Chyflogaeth, Prifysgol Bangor / Careers and Employability, Bangor University
  • CCI Legal
  • Chartered Banker Institute
  • CIMA
  • CIM
  • Coleg Cymraeg Cenedlaethol
  • Cyngor Gwynedd Council
  • Dafydd Hardy
  • Hays
  • Mandarin Consulting
  • Mills & Co
  • Bwrdd Uchelgais Economaidd Gogledd Cymru / North Wales Economic Ambitions Board
  • Yr Awyrlu Brenhinol / RAF
  • RSM
  • Santander
  • Ysgol Addysg, Prifysgol Bangor / School of Education, Bangor University
  • Williams Denton
  • Zip World
  • Alumni: Fiona Anderson, Dr Edward Jones, Oana Lazar, Tan Bich Ngoc, Ross Starkie

Dyddiad cyhoeddi: 4 Tachwedd 2016