MBA Troseddau Chydymffurfiaeth Ariannol

Gwneud Cais

Ceisiadau ar gyfer derbyniad Ebrill 2023 nawr ar agor

Strwythur y Cwrs

Gwybodaeth am y modiwlau, llyfryn y cwrs, ffioedd a llawer mwy…

Dulliau Dysgu

Addysgu ac asesu a sut mae dysgu o bell yn gweithio

MBA Troseddau a Chydymffurfiaeth Ariannol

Ysgol Busnes Bangor yw'r unig sefydliad yn y byd sy'n gallu cynnig MBA Troseddau a Chydymffurfiaeth Ariannol, 'Gradd Meistr mewn Gweinyddu Busnes (Arbenigwr Gwybodaeth Ariannol).' Mae’r cymhwyster newydd arloesol hwn yn eich galluogi i ennill MBA ynghyd â statws proffesiynol Arbenigwr Gwybodaeth Ariannol (FIS).

Dyfernir yr MBA mewn partneriaeth â ManchesterCF, darparwyr hyfforddiant gwybodaeth ariannol fyd-eang, mae'r statws Arbenigwr Gwybodaeth Ariannol (FIS) yn gosod safon newydd ym myd gwybodaeth ariannol.

Cyflwynir yr MBA Troseddau a Chydymffurfiaeth Ariannol (FCCMBA) trwy ddysgu o bell yn rhan-amser a gellir astudio’r cwrs mewn unrhyw leoliad sydd â chysylltiad rhyngrwyd da. Mae'r rhaglen yn pwysleisio meysydd gwrth-wyngalchu arian mewn gwahanol gyd-destunau, gwrth-lygru a chydymffurfio â sancsiynau. Yn seiliedig ar Egwyddorion y Cenhedloedd Unedig ar gyfer Bancio Cynaliadwy, mae'r rhaglen yn canolbwyntio ar gyfyngu ar droseddu a therfysgaeth trwy ddiwydrwydd sefydliadau ariannol.

Mae’r MBA Troseddau a Chydymffurfiaeth Ariannol yn cynnig sgiliau a gwybodaeth lefel uchel o brifysgol a chanolfan ragoriaeth ymchwil a gydnabyddir yn rhyngwladol, ynghyd ag arbenigwyr byd-eang mewn bancio rhyngwladol, gwybodaeth ariannol a chydymffurfiaeth.

Pwy fyddai'n elwa o'r MBA Troseddau a Chydymffurfiaeth Ariannol (FCCMBA)?

Mae’r MBA Troseddau a Chydymffurfiaeth Ariannol wedi ei gynllunio'n benodol at ddibenion gwaith proffesiynol a chaiff ei gyflwyno trwy ddysgu o bell yn rhan-amser.

Nod yr MBA Troseddau a Chydymffurfiaeth Ariannol yw datblygu rhagolygon gyrfa arbenigwyr ym maes rheoleiddio ariannol a gwrth-wyngalchu arian yn ogystal â'r rhai sydd â diddordeb mynd i'r maes hwn. Mae cydymffurfio â rheoliadau ariannol yn faes twf ac mae llawer o swyddi ar gael mewn gwasanaethau ariannol byd-eang. Mae’r rhaglen hon yn edrych ar bryderon parhaus ynglŷn â sut y gellir cyfyngu ar droseddau a therfysgaeth drwy ddiwydrwydd sefydliadau ariannol.

Mae'r profiad dysgu lefel uchel a dwys hwn hefyd yn cyfuno modiwlau MBA cyffredinol mewn adnoddau dynol, economeg reolaethol, dulliau ymchwil a strategaeth gorfforaethol â rhai mwy arbenigol, gan alluogi cyfranogwyr i ymgeisio am swyddi uwch yn y diwydiant.

Nodau Addysg yr MBA Troseddau a Chydymffurfiaeth Ariannol

Datblygu dealltwriaeth fanwl o achosion a dulliau o frwydro yn erbyn troseddau ariannol a chamweddau cysylltiedig yn y sector ariannol.
Meithrin dealltwriaeth fanwl o'r fframwaith rheolaethol, proffesiynol, moesegol, cyfreithiol a rheoleiddiol y mae sefydliadau gwasanaethau ariannol yn gweithredu ynddo, gan ganolbwyntio'n benodol ar liniaru gwyngalchu arian a throseddau ariannol eraill.
Gwella sgiliau dysgu gydol oes a datblygu sgiliau deallusol ac astudio trosglwyddadwy. Mae'r nodweddion hyn yn addas iawn i yrfa ym maes bancio a chyllid, ac eto nid yw’n cyfyngu graddedigion i'r dewisiadau gyrfa hynny.
Ymgorffori dealltwriaeth fanwl o faterion yn ymwneud â chynaliadwyedd a chydymffurfiaeth yn narpariaeth gwasanaethau ariannol.

Amdanom ni

Ynglŷn â Phrifysgol Bangor

Sefydlwyd Prifysgol Bangor ym 1884, ac mae’n cyfuno rhagoriaeth academaidd draddodiadol ag ymchwil ac adnoddau blaengar. Bangor oedd un o'r prifysgolion cyntaf yn y Deyrnas Unedig i gynnig graddau mewn bancio a'r gyntaf i gynnig MBA bancio. Mae diddordeb Bangor mewn bancio yn mynd yn ôl i ddyddiau’r banciwr enwog, George Rae, a waddolodd gyfres o ddarlithoedd cyhoeddus mewn bancio i Fangor ym 1902 a ddenodd rai o feddylwyr ac ymarferwyr mwyaf blaenllaw’r oes.
Cydnabu Fframwaith Rhagoriaeth Ymchwil 2022 fod 85% o ymchwil Prifysgol Bangor naill ai gyda’r gorau yn y byd neu'n cael ei gydnabod yn rhyngwladol. Mae Prifysgol Bangor hefyd ymhlith y 10 gorau yn y Deyrnas Unedig am ansawdd addysgu a phrofiad myfyrwyr ym maes cyfrifeg a chyllid (Tabl Cynghrair 2022 The Times a’r Sunday Times 2022)

Gwybodaeth am Ysgol Busnes Bangor

Mae Ysgol Busnes Bangor yn un o’r ysgolion gorau yn Ewrop am astudiaethau ariannol a bancio ac mae'n cynnig amrywiaeth lawn o ddisgyblaethau o lefel israddedig i lefel doethuriaeth.
Mae Ysgol Busnes Bangor ymhlith y 10% gorau yn y byd o ran sefydliadau ac economegwyr ym maes bancio a hi yw’r gorau o blith holl brifysgolion y Deyrnas Unedig (RePEc, Awst 2021).
Ynghyd â’n rhagoriaeth ymchwil a’n hymrwymiad i addysgu o ansawdd uchel, mae aelodau staff yn cyfuno eu gyrfaoedd ymchwil gyda’u hymroddiad i gyflwyno cynnwys perthnasol a chyfredol.
Caiff myfyrwyr eu denu gan ein henw da am ansawdd uchel ac arbenigedd, yn benodol ym maes bancio a gwasanaethau ariannol, a Bangor yw un o’r prif ddarparwyr yn Ewrop. Caiff papurau ac erthyglau gan aelodau staff ymchwil eu cyhoeddi’n rheolaidd mewn cyfnodolion amlwg a chyhoeddir llyfrau ganddynt sy’n denu cynulleidfa fyd-eang.
Yn ystod y blynyddoedd diwethaf mae aelodau staff Ysgol Busnes Bangor wedi gwneud gwaith ymgynghorol ar lefel uchel, yn cynnwys astudiaethau polisi o bwys i lawer o sefydliadau blaenllaw, fel y Comisiwn Ewropeaidd, Banc y Byd a Thrysorlys y Deyrnas Unedig.

Ynglŷn â ManchesterCF

Mae ManchesterCF yn darparu rhaglenni hyfforddiant gwybodaeth ariannol ar-lein i sefydliadau ariannol, unedau gwybodaeth ariannol ac asiantaethau gorfodi'r gyfraith ledled y byd.

Mae ein harbenigedd yn deillio o brofiad cadarn mewn bancio rhyngwladol, gwybodaeth ariannol a chydymffurfiaeth.