Ystyried ymuno â ni ym Medi 2026?
Nid yw Clirio 2026 ar agor eto ond gallwch wneud cais i astudio ym Mhrifysgol Bangor hyd at Ddydd Mawrth, 30 Mehefin.
Beth Yw Clirio?
Mae Clirio yn rhoi cyfle i ymgeiswyr sydd heb gael lle mewn prifysgol wneud cais am le ar gwrs sydd heb lenwi.
Mae'n rhoi cyfle i chi ymuno â Phrifysgol Bangor ym mis Medi – p’un a ydych eisoes wedi gwneud cais drwy UCAS neu’n dechrau arni o’r newydd.
Efallai eich bod wedi newid eich meddwl ynghylch ble rydych am astudio, neu eich bod wedi penderfynu gwneud cais i’r brifysgol ar ôl dyddiad cau UCAS. Beth bynnag yw eich sefyllfa, mae Clirio yn agor y drws i bosibiliadau newydd.
Ym Mangor byddwn yn eich helpu i ddod o hyd i gwrs sy’n cyd-fynd â’ch uchelgeisiau ac yn rhoi’r hyder i chi gamu ymlaen. Dyma eich cyfle i ddod yn rhan o gymuned groesawgar a chlos lle mae pob myfyriwr yn cael cefnogaeth ac mae pob llais yn cael ei werthfawrogi.
Pryd Mae Clirio Yn Dechrau?
Mae Clirio’n dechrau’n swyddogol ar ddydd Iau, 2 Gorffennaf. O’r dyddiad hwn, bydd modd i chi gofrestru eich diddordeb mewn Clirio i gael yr wybodaeth ddiweddaraf, neu gallwch wneud cais am gwrs drwy Clirio.
Pryd Mae Clirio Yn Gorffen?
Bydd Clirio’n dod i ben ar 19 Hydref 2026 – gallwch ychwanegu eich dewis Clirio yn UCAS Hub hyd at y dyddiad hwn.
Pwy All Wneud Cais Drwy Clirio Ym Mhrifysgol Bangor?
- Ymgeiswyr heb gynigion cyfredol: Gall unrhyw un sydd wedi gwneud cais israddedig UCAS ac nad oes ganddynt unrhyw gynigion ar hyn o bryd gan brifysgol wneud cais i Brifysgol Bangor drwy Clirio.
- Ymgeiswyr hwyr: Gall unigolion sydd heb wneud unrhyw geisiadau i brifysgol ar gyfer mis Medi eleni wneud cais i Brifysgol Bangor yn uniongyrchol drwy Clirio.
Pam Gwneud Cais Drwy Clirio?
Efallai eich bod yn ystyried gwneud cais am gwrs drwy Clirio am sawl rheswm:
- Os ar ddiwrnod y canlyniadau na wnaethoch chi gyflawni'r graddau gofynnol ar gyfer eich dewis cadarn neu yswiriant, gallai Clirio ym Mhrifysgol Bangor gynnig eich cyfle nesaf.
- Hyd yn oed os gwnaethoch chi fodloni gofynion eich dewisiadau cychwynnol ond wedi penderfynu nad dyma'r llwybr cywir i chi, gallwch 'ryddhau eich hun i Clirio' drwy UCAS ac archwilio'r opsiynau sydd ar gael ym Mhrifysgol Bangor.
- Os nad ydych wedi gwneud cais i unrhyw brifysgol eto ar gyfer mis Medi eleni, mae Clirio ym Mhrifysgol Bangor yn cynnig llwybr i ddechrau eich astudiaethau yr hydref hwn.
- Gall myfyrwyr aeddfed sy'n dychwelyd i addysg neu'r rheiny sy'n newid gyrfa ganfod bod Clirio ym Mhrifysgol Bangor yn ffordd effeithlon o gyflawni cwrs academaidd mewn amgylchedd cefnogol.
- Os yw amgylchiadau annisgwyl wedi arwain at ystyried mynd i'r brifysgol yn hwyrach yn y cylch ymgeisio, gall Clirio ym Mhrifysgol Bangor gynnig llwybr i addysg uwch.
CAMAU I LWYDDO DRWY YMGEISIO AM GWRS CLIRIO
Cyn Diwrnod Y Canlyniadau
Yn union fel y gwnaethoch gyda'ch dewisiadau gwreiddiol, ystyriwch, er enghraifft, gynnwys a strwythur y cwrs, cyfleusterau academaidd, bywyd cymdeithasol, pellter o gartref, cyfleusterau chwaraeon a chostau byw. Efallai y byddwch yn falch o gael cynnig cwrs arall, ond mae angen o hyd i chi ddewis y cwrs iawn yn y brifysgol iawn i chi.
Nid oes yn rhaid i chi fynd am yr un pwnc ag y gwnaethoch gais amdano yn wreiddiol, ond os byddwch yn mynd am rywbeth gwahanol, efallai y bydd y brifysgol yn dal i ddisgwyl i chi fod wedi gwneud pynciau Lefel A penodol. Os yw'r cwrs o’ch dewis yn llawn, edrychwch ar ddewisiadau eraill cysylltiedig, er enghraifft, ar gyfer Meddygaeth, ystyriwch Wyddorau Meddygol neu Wyddorau Biofeddygol.
Gallwch ffonio Llinell Gymorth Prifysgol Bangor ar 0800 085 1818, neu gysylltu dros Sgwrs Fyw neu drwy lenwi Ffurflen Gais Clirio Ar-lein.
Sicrhewch fod eich rhif cais UCAS, eich rhif Clirio, y codau cwrs, eich canlyniadau Lefel A a’r canlyniadau TGAU perthnasol wrth law gan y bydd y staff ar y Llinell Gymorth yn gofyn amdanynt. Bydd angen eich manylion cyswllt a'ch cyfeiriad e-bost arnom hefyd er mwyn anfon eich cynnig Clirio atoch yn ysgrifenedig.
Ar Ddiwrnod Y Canlyniadau
Os yn bosibl, peidiwch â bod ar wyliau nac yn y gwaith, cadwch y diwrnod yn rhydd i gysylltu â phrifysgolion. Mae angen i chi fod ar gael i siarad â thiwtoriaid derbyniadau a gwneud penderfyniadau eich hun – ni all eich rhieni, athrawon a ffrindiau wneud hynny ar eich rhan. Os oes rhaid i chi weithio'r diwrnod hwnnw neu os ydych i ffwrdd yn teithio neu ar wyliau, mae'n werth rhoi awdurdod i riant/gwarcheidwad weld manylion eich cais UCAS fel y gallant siarad ar eich rhan.
Efallai nad ydych wedi cael y graddau neu’r sgôr pwyntiau sydd eu hangen arnoch, ond efallai y bydd y brifysgol sydd gennych fel dewis cadarn neu fel dewis wrth gefn yn penderfynu eich derbyn ar y cwrs. Cysylltwch â nhw gyntaf a pheidiwch â chymryd yn ganiataol fod rhaid i chi ddefnyddio’r drefn Glirio. Os ydynt yn penderfynu peidio â’ch derbyn, neu os nad oes gennych gynigion gan unrhyw sefydliad, rydych yn gymwys i wneud cais am le drwy’r system Glirio.
Mae ymgeiswyr sy'n gwneud ceisiadau ar ôl 30 Mehefin yn cael eu cynnwys yn awtomatig yn y system glirio ac maent hwythau hefyd yn gymwys.
Byddwch yn gwybod eich bod yn y drefn Clirio os ydi eich cais UCAS yn dweud ‘you are in Clearing’ neu ‘Clearing has started’. Os ydych yn y drefn Clirio, rhaid i chi gysylltu â phrifysgolion yn uniongyrchol i holi am y lleoedd sydd ar gael ar eu cyrsiau ac i weld a ydych yn bodloni eu gofynion.
Ar Ôl Diwrnod Y Canlyniadau
Mae Prifysgol Bangor yn trefnu Diwrnodau Agored a digwyddiadau ar gyfer ymgeiswyr Clirio, y dylech eu mynychu er mwyn edrych o gwmpas y Brifysgol a’r ardal, casglu rhagor o wybodaeth am y cwrs, siarad â staff a myfyrwyr, a phenderfynu a fyddwch yn hapus yn astudio yma.
Os byddwch yn gwneud cais drwy Clirio ar gyfer cwrs sydd wedi’i leoli ar ein campws ym Mangor, rydym yn sicrhau llety i ymgeiswyr Clirio cyn belled â’ch bod yn dewis Bangor drwy UCAS erbyn Dydd Iau, 27 Awst, ac yn archebu eich lle yn neuaddau erbyn Dydd Llun, 31 Awst.
Pan fyddwch wedi derbyn ein cynnig Clirio, byddwn yn anfon e-bost atoch o fewn 24–48 awr yn eich gwahodd i wneud cais am lety. Bydd yr e-bost yn egluro’r camau nesaf ac yn rhoi mynediad i’n system ymgeisio ar-lein.
Gwylio - Profiad Dafydd o'r Drefn Clirio
Dod o hyd i'r cwrs i chi Cyrsiau
Edrychwch drwy ein cyrsiau israddedig am wybodaeth fanwl ar gyrsiau unigol fel eich bod yn barod os byddwch yn ffeindio eich hun yn y system Glirio ar ddiwrnod canlyniadau.
PAM DEWIS PRIFYSGOL BANGOR?
Yn ogystal â’r addysgu rhagorol a’r adnoddau ardderchog, mae yna lawer o bethau eraill sy’n cyfrannu at wneud y profiad o astudio yma yn un unigryw. Mae awyrgylch gyfeillgar i'r ddinas a chewch gymdeithasu trwy gyfrwng y Gymraeg. Yn ogystal â hynny, mae amgylchedd naturiol ein hardal gyfagos yn arbennig!
Sicrwydd o Lety i Ymgeiswyr Clirio
Mae ein llety wedi eu gosod fel y 1af yng Nghymru a'r 12fed yn y DU gan University Compare (2026). Os ydych yn ymgeisio drwy Clirio am gwrs sydd wedi ei lleoli ar ein campws ym Mangor, rydym yn sicrhau y cewch chi ystafell yn ein neuaddau preswyl cyn belled a'ch bod chi'n dewis Prifysgol Bangor ar UCAS erbyn Dydd Iau, 27 Awst ac yn archebu eich ystafell erbyn Dydd Llun, 31 Awst. Mae ein Llety i fyfyrwyr yn fodern ac yn gyfforddus ac mae aelodaeth am ddim o'r Gampfa wedi ei gynnwys yn y pris.
Lleoliad ysbrydoledig i fyw a dysgu
Mae'r Brifysgol yn cynnig amgylchedd hamddenol i fyfyrwyr gymdeithasu, dysgu a gwneud ffrindiau oes. Mae ein lleoliad, y golygfeydd a'r ardal gyfagos hefyd ymhlith y rhesymau pam mae llawer o'n myfyrwyr yn dewis dod i Fangor.
Rydym yn 3ydd yng Nghymru am Fywyd Cymdeithasol gan University Compare (2026), ac yn falch o gynnig cymuned fyfyrwyr bywiog a chroesawgar.
Gofalu a chefnogi ein myfyrwyr
Ym Mangor, rydym yn rhoi pwyslais mawr ar ofalu am ein myfyrwyr a’u cefnogi. O'r munud y byddwch yn cyrraedd, byddwch yn cael cymaint o help a chefnogaeth ag sydd eu hangen arnoch chi.
Dewis eang o Glybiau a Chymdeithasau
Mae Clybiau a Chymdeithasau Undeb y Myfyrwyr, sydd wedi cael eu gwobrwyo ymysg y gorau yn y DU tros y blynyddoedd, yn gyfle gwych i ddod i adnabod eraill. Felly, p'un a yw'n rywbeth rydych yn ymddiddori ynddo erioed neu'n chwaraeon neu weithgareddau rydych wedi bod eisiau rhoi cynnig arnynt erioed, mae yna ddigon i'ch cadw'n brysur yn eich amser hamdden.
