Mae proses ymgeisio UCAS ar gyfer mynediad 2027 bellach ar agor yn swyddogol, ac fe elli gyflwyno dy gais, gan gynnwys dy ddatganiad personol.
Mae UCAS wedi cyflwyno rhai newidiadau i'r fformat ar gyfer mynediad 2026 ymlaen. Yn lle un traethawd hir, mae’n ofynnol nawr i ateb tri cwestiwn penodol. Mae hyn yn ei gwneud yn haws canolbwyntio ar yr hyn sy’n bwysig .
Bydd angen ysgrifennu o leiaf 350 nod (50 i 70 gair) ar gyfer pob cwestiwn, ac mae gen ti uchafswm o 4,000 nod (700 i 800 gair) ar draws y tri.
Mae’r cwestiynau wedi’u cynllunio i dy helpu i ddweud wrthym yn union beth sydd angen i ni ei wybod:
- Pam wyt ti eisiau astudio’r cwrs? Dweda wrthym beth sy’n dy gyffroi amdano.
- Sut mae dy gymwysterau a dy astudiaethau wedi dy baratoi? Cofia ddangos sut mae dy waith presennol wedi dy osod ar y llwybr cywir.
- Beth arall wyt ti wedi’i wneud y tu allan i addysg, a pham fod y profiadau hyn yn bwysig? Meddylia am hobïau, gwaith neu wirfoddoli - unrhyw beth sy’n dangos dy sgiliau a dy angerdd.
Cofia, dim ond un datganiad personol sydd angen ei ysgrifennu, waeth faint o brifysgolion yr wyt yn gwneud cais iddynt.
Dyddiadau Pwysig
Gyda cheisiadau bellach ar agor, mae’r dyddiadau hyn yn hanfodol:
- 15 Hydref 2026 (6:00 PM amser y DU): Dyma’r dyddiad cau cynnar ar gyfer ceisiadau i’r rhan fwyaf o gyrsiau mewn Meddygaeth, Deintyddiaeth, a Gwyddor/Meddygaeth Milfeddygol.
- 13 Ionawr 2027 (6:00 PM amser y DU): Dyma'r dyddiad cau ar gyfer ystyriaeth gyfartal ar y rhan fwyaf o gyrsiau israddedig. Bydd ceisiadau a gyflwynir erbyn y dyddiad hwn yn cael eu hystyried ochr yn ochr â phob cais arall.
Felly, er bod y dyddiad cau ar gyfer llawer o gyrsiau ychydig fisoedd i ffwrdd, mae’n ddoeth gweithio ar y datganiad personol nawr er mwyn osgoi panig munud olaf.
Cwestiynau Cyffredin ac Awgrymiadau i Ymgeiswyr
Mae’r Datganiad Personol yn gyfle i werthu dy hun, dy ddiddordebau, talentau a llwyddiannau. Os na gei di wahoddiad am gyfweliad, bydd y tiwtoriaid personol (y bobl sy’n penderfynu pwy sy’n cael lle ar y cwrs) yn dibynnu ar dy ddatganiad i wneud eu penderfyniad.
Mae pob datganiad personol yn cael ei ddarllen!
Rwyt yn cystadlu yn erbyn llawer o ymgeiswyr eraill felly mae angen gwerthu dy hun. Mae'n bwysig bod yn ofalus wrth ystyried yr hyn rwyt eisiau ddweud a sut i'w ddweud.
Y ffordd hawsaf o ddechrau yw peidio â phoeni am ysgrifennu'r ateb perffaith ar unwaith. Yn lle hynny, ewch ati i ysgrifennu rhai nodiadau ynglŷn â pham eich bod â diddordeb yn y pwnc, profiadau yr ydych wedi'u mwynhau a beth sydd wedi'ch ysbrydoli. Ar ôl i chi lunio eich syniadau, mae'n llawer haws penderfynu pa bwyntiau sy'n cyd-fynd orau â phob cwestiwn.
Ystyriwch beth wnaeth eich denu at y cwrs yn y lle cyntaf. Gallai fod yn rhywbeth y buoch yn ei astudio yn yr ysgol neu'r coleg, llyfr yr ydych wedi’i ddarllen, profiad gwaith neu hyd yn oed bwnc yr ydych wedi'i archwilio yn eich amser eich hun. Cyn i chi ddechrau ysgrifennu, gallai ail-ddarllen gwybodaeth a phrosbectws y cwrs fod yn ddefnyddiol i’ch atgoffa'ch hun beth sydd o ddiddordeb mwyaf i chi am y pwnc. Gan amlaf, eich diddordeb yn y pwnc yw'r peth pwysicaf i'w gyfleu.
Peidiwch â phoeni. Nid yw prifysgolion yn disgwyl rhestr hir o wobrau na chyflawniadau. Fel arfer, mae'n well siarad am yr ychydig brofiadau sydd wedi golygu rhywbeth i chi ac egluro'r hyn yr ydych wedi’i ddysgu oddi wrthynt. Gallai hyn gynnwys gwaith rhan amser, gwirfoddoli, hobïau neu gyfrifoldebau y tu allan i'r ysgol.
Cwestiwn da i'w ofyn i chi'ch hun yw, "Beth mae hyn yn ei ddweud wrth rywun amdanaf i?" Os yw profiad wedi eich helpu i ddatblygu sgil, dysgu rhywbeth newydd neu gryfhau eich diddordeb yn y pwnc, mae'n debyg ei fod yn werth ei grybwyll.
Nac oes. Fel arfer, bydd eich datganiad personol yn cael ei ddarllen gan sawl prifysgol, felly mae'n well canolbwyntio ar y pwnc rydych yn gwneud cais amdano yn hytrach nag ar sefydliad penodol. Esboniwch beth sy'n eich denu at y cwrs ac o ble y mae eich diddordeb yn y maes wedi dod. Roedd hyn yn gallu deillio o'ch astudiaethau, eich profiadau, eich hobïau neu'ch diddordebau personol.
Na. Mae'n bwysig ei fod yn swnio fel chi. Ceisiwch ysgrifennu'n glir ac yn naturiol yn hytrach na defnyddio geiriau cymhleth heb reswm. Amrywiwch strwythur eich brawddegau; ceisiwch beidio â dechrau pob brawddeg gyda 'Rwyf'. Mae tiwtoriaid derbyniadau eisiau clywed eich llais chi, nid fersiwn o sut y dylai ymgeisydd prifysgol swnio yn eich barn chi.
Darllenwch eich datganiad yn uchel. Os yw brawddeg yn teimlo'n lletchwith i'w dweud, mae'n debyg y bydd yn teimlo'n lletchwith i'w darllen. Gall hefyd fod yn ddefnyddiol i’w adael am ychydig ddyddiau cyn dod yn ôl ato a gofyn i rywun rydych yn ymddiried ynddo ei ddarllen. Mae safbwynt newydd yn aml yn helpu.
Mae hynny'n gwbl normal. Ychydig iawn o bobl sy'n ysgrifennu atebion cryf ar eu hymgais gyntaf. Mae'r drafft cyntaf yn ymwneud â nodi eich syniadau ar bapur. Gallwch ei wella, ei ail-drefnu a'i fireinio gynifer o weithiau ag sydd angen.
Cofiwch nad oes y fath beth â datganiad personol perffaith. Mae gan bob ymgeisydd brofiadau, diddordebau ac uchelgeisiau gwahanol. Canolbwyntiwch ar ddangos eich brwdfrydedd dros y pwnc a rhoi ymdeimlad gwirioneddol i brifysgolion o bwy ydych chi. Dyna fydd yn helpu eich cais i sefyll allan.
Awgrymiadau i Rieni
Gallwch dal fod yn gefn mawr wrth ysgrifennu'r datganiad personol. Dyma sut gallwch eu helpu:
- Sgwrsio: Trafodwch yr hyn maen nhw eisiau ei ddweud. Gall hyn eu helpu i drefnu eu meddyliau a phenderfynu beth i’w roi fel atebion.
- Darllen drafftiau: Mae llygad ffres bob amser yn ddefnyddiol. Gallwch helpu i weld camgymeriadau teipio a gramadeg, ond cofiwch beidio â golygu gormod. Nid eich datganiad chi yw hwn!
- Annog ymchwil: Atgoffwch hwy i edrych ar wefan UCAS. Mae llwyth o adnoddau gwych yno, gan gynnwys adeiladwr datganiad yn eu cyfrif UCAS Hub.
- Cadw llygad ar ddyddiadau cau: Dyma’r rhan bwysicaf ar hyn o bryd.
Awgrymiadau i Rhieni Rhyngwladol
Os nad Saesneg yw eich iaith gyntaf, dyma rai ffyrdd y gallwch barhau i gynnig cefnogaeth:
- Chwiliwch am fforymau ar-lein: Edrychwch am fforymau addysg yn eich gwlad cartref. Gallant ddarparu gwybodaeth a mewnwelediadau defnyddiol am broses ymgeisio UCAS.
- Defnyddiwch offer ar-lein: Mae gwefannau gwirio gramadeg a sillafu yn ffordd wych o gael ychydig o gymorth ychwanegol gyda'r iaith.
- Gofynnwch am help: Gwiriwch a oes ffrindiau neu athrawon sy'n siarad Saesneg ac sy'n gyfarwydd â system UCAS yn gallu darllen eu datganiad a chynnig adborth.
- Ymchwiliwch gyda'ch gilydd: Cymerwch amser i ddysgu mwy am system prifysgolion y DU, gofynion cyrsiau, a'r hyn y mae prifysgolion y DU yn chwilio amdano mewn ymgeiswyr.
Meddwl defnyddio Deallusrwydd Artiffisial i ysgrifennu dy ddatganiad personol?
Mae'n bosib meddwl fod defnyddio Deallusrwydd Artiffisial yn ffordd gyflym o wneud y gwaith, ond nid yw'n syniad da. Mae angen i dy ddatganiad personol fod yn unigryw i ti, rhywbeth sy’n adlewyrchu dy brofiadau, dy nodau a’th bersonoliaeth. Gall UCAS weld darnau mawr wedi ei ysgrifennu gan Ddeallusrwydd Artiffisial fel llên-ladrad, a gallai hyn effeithio ar benderfyniad y brifysgol. Felly cymer dy amser i ysgrifennu'r datganiad personol dy hun, mae dy lais di’n bwysig.