Fy ngwlad:
Fy ngwlad:

Chwilio

Cau

EUARTHURS Disgrifiadau Prosiect Doethurol

Disgrifiadau Project Doethurol EUARTHURS

 

EDEFYN I: MATEROLIAETH (is-brojectau 1-6)  

 

Project Doethurol 1 Prifysgol Bangor

 

Prif oruchwylwyr: Yr Athro Raluca Radulescu (Prifysgol Bangor) a Dr Aled Llion Jones (Prifysgol Bangor) Cyd-oruchwyliwr: Yr Athro Richard Trachsler (Prifysgol Zürich) Ymgynghorydd: Dr Marjolein Hogenbirk (Prifysgol Amsterdam) a Dr Martine Meuwese (Prifysgol Utrecht)

 

Ymholiadau: Yr Athro Raluca Radulescu (r.radulescu@bangor.ac.uk) 

Proffil ymchwil y prif oruchwyliwr: https://www.bangor.ac.uk/staff/sacl/raluca-radulescu-010323/cy

 

Mae'r project hwn yn canolbwyntio ar ddadansoddi croniclau a phroffwydoliaethau ar ôl Sieffre o Fynwy mewn llawysgrifau aml-destun ym Mhrydain ganoloesol, gan archwilio rhamantau Arthuraidd a'r testunau sy'n cronni o'u hamgylch mewn llawysgrifau amlieithog aml-destun. Mae'r project yn dewis un llawysgrif aml-destun o ranbarthau ffiniol yn Ynysoedd Prydain, ac yn anelu at ddewis y testunau a'u grwpiau thematig o safbwynt amodau cymdeithasol-ddiwylliannol penodol. Ei nod yw ymchwilio i’r defnydd o destunau Arthuraidd lleol ar ffiniau neu gyrion ardaloedd sydd â chysylltiad ieithyddol a’i gilydd. O safbwynt cymharol, bydd y project yn ymchwilio i ffenomenau tebyg mewn llawysgrifau Ffrangeg, yn enwedig mewn perthynas ag addasiadau o broffwydoliaethau. Nodau'r project hwn yw dangos addasiadau aml-genre ac aml-thematig Arthuraidd mewn amgylchiadau hanesyddol a diwylliannol newidiol. 

 

Gofynion:

  • MA mewn llenyddiaeth Saesneg/hanes neu bwnc cysylltiedig (astudiaethau canoloesol)
  • Saesneg Canol (hanfodol)
  • Lladin Canoloesol (dymunol)
  • Hen Ffrangeg (neu barodrwydd i ddysgu trwy hyfforddi o fewn y rhwydwaith)
  • Cymraeg Canol (neu barodrwydd i ddysgu trwy hyfforddi o fewn y rhwydwaith)
  • profiad neu o leiaf hyfforddiant i ddechreuwyr mewn paleograffeg ganoloesol a chodicoleg llawysgrifau ynysol

 

Amgylchedd ymchwil: https://www.bangor.ac.uk/centre-for-arthurian-studies

Academi Ddoethurol Bangor: https://www.bangor.ac.uk/doctoral-academy

I weld y gofynion fisa, ewch i: https://www.bangor.ac.uk/international/support/visa_immigration

 

Project Doethurol 2 Prifysgol Zürich

 

Prif oruchwyliwr: Yr Athro Richard Trachsler Cyd-oruchwylwyr: Yr Athro Raluca Radulescu a Dr Aled Llion Jones (Prifysgol Bangor) Ymgynghorydd: Yr Athro Fabrizio Cigni (Pisa)

 

Ymholiadau: Yr Athro Richard Trachsler (rtrachsler@rom.uzh.ch)

Proffil ymchwil y prif oruchwyliwr: https://www.rose.uzh.ch/de/seminar/personen/trachsler.html

 

Yn fersiwn Lladin Sieffre o Fynwy o'r proffwydoliaethau a briodolir i Fyrddin, defnyddiodd Sieffre draddodiad proffwydoliaeth wleidyddol, gan ddefnyddio trosiadau, yn enwedig trosiadau anifeiliaid, i amgodio neges wleidyddol. Mae'r trosiadau hyn, a oedd fwy neu lai yn ddealladwy, wrth wraidd traddodiad hir ym maes ffuglen, lle cânt eu defnyddio fel arfer i atgyfnerthu cydlyniant seiniau cynefin mewnol a darlunio hollwybodaeth Merlin. 

Tua 1270, defnyddiodd y gwaith Ffrengig-Fenisaidd Prophecies de Merlin yr un technegau o drosiadau anifeiliaid i bwyso a mesur y gwrthdaro rhwng y Gelffiaid a'r Gibeliniaid, gan ddefnyddio traddodiad rhamant Ffrainc ac yn llawer llai penodol, rhagfynegiadau Galfridiaidd. O gymharu â'r Prophetia Merlini gwreiddiol, mae'r technegau amgryptio yn eithaf gwahanol, gan fod trosiadau anifeiliaid yn cystadlu â system sy'n cynnwys nodi cymeriadau a lleoedd gyda llythrennau cyntaf, sy'n amrywio'n fawr yn y traddodiad testunol. 

Bydd y project doethurol hwn yn cymharu'r defnydd o broffwydoliaeth Myrddin ym myd gwleidyddol Ffrangeg ei iaith y canol oesoedd ac yn datblygu "gramadeg" ar ei gyfer. Sut cafodd proffwydoliaeth wleidyddol ei hamgodio a'i datgodio? Yn ogystal â phroffwydoliaethau Myrddin yn Lladin, Ffrangeg a Ffrangeg-Eidaleg, a'u cylchrediad ar y Cyfandir, bydd y maes ymchwil weithiau'n cynnwys Ynysoedd Prydain hefyd.

  

Gofynion: 

  • MA mewn Hen Ffrangeg (Iaith neu Lenyddiaeth) neu Ieitheg Romáwns
  • profiad o baleograffeg a chodicoleg ganoloesol
  • Rhuglder yn y Ffrangeg ar lefel uwch (caiff y traethawd ymchwil ei ysgrifennu yn Ffrangeg) a dealltwriaeth dda o Eidaleg

 

Amgylchedd ymchwil: https://www.phil.uzh.ch/en/studies.html

Am ragor o fanylion, ewch i: https://www.uzh.ch/en/studies/application/doctoralstudies.html

Am ofynion fisa gweler: https://www.uzh.ch/en/studies/application/entry.html 

 

 

 

 

Project Doethurol 3 UvA Amsterdam

 

thro Dr I. van Renswoude (UvA/Huygens Institute)/Dr M. Hogenbirk (Prifysgol Amsterdam) Cyd-oruchwyliwr: Dr M. Meuwese (Prifysgol Utrecht) Ymgynghorydd: Yr Athro Richard Trachsler (Prifysgol Zürich)

 

Ymholiadau: Dr Marjolein Hogenbirk (m.hogenbirk@uva.nl)

Proffil ymchwil y prif oruchwyliwr: https://www.uva.nl/en/profile/h/o/m.hogenbirk/m.hogenbirk.html

 

Mae'r project yn canolbwyntio ar ramantau a hanesyddiaeth Arthuraidd o Iseldireg Canol a'r llawysgrifau y mae'r genres hyn wedi goroesi ynddynt. Cynhyrchwyd y llawysgrifau hyn mewn gwahanol ranbarthau o'r Iseldiroedd ac maent yn dyddio o ddiwedd y 13eg ganrif i'r 15fed ganrif. O gymharu â llawer o lawysgrifau Ffrangeg o'r rhanbarth, maent yn edrych yn eithaf dinod. Bydd yr ymgeisydd doethurol yn y project hwn yn astudio'r ffordd y rhoddir arweiniad i ddarllenwyr yn fewnol, er enghraifft trwy strwythur amserol neu gysylltiadau naratif eraill, ond hefyd trwy elfennau para destunol fel cynllun, addurniadau, marciau paragraff ac atalnodi. Caiff data meintiol ar faint, nifer y colofnau, geiriau fesul colofn, y bylchau rhwng llythrennau ac ati eu casglu a'u cymharu â data'r project cyfatebol yn Zurich (Project Doethurol 4). O ddechrau'r 14eg ganrif, datblygodd ddyluniad paradestunol llenyddiaeth frodorol yr Iseldireg, a allai fod yn gysylltiedig â phobl yn dechrau darllen yn  unigol. Er mwyn deall yn well sut roedd cynulleidfaoedd yn yr Iseldiroedd yn ymwneud â thestunau Arthuraidd a sut y gallai'r datblygiad o wrando ar rywun yn darllen i ddarllen yn unigol fod wedi digwydd, bydd y project hwn yn cymharu llawysgrifau Iseldireg Canol yn gyntaf oll â'u cymheiriaid Ffrangeg o'r un rhanbarth (sy'n rhan o'r project cyfatebol) ac â llawysgrifau o draddodiadau cyfagos eraill (llawysgrifau Almaeneg Uchel Canol/Isel).  

 

Gofynion: 

  • MA Iaith a Diwylliant yr Iseldireg neu Astudiaethau Canoloesol (neu gyfatebol, fel Hanes Llyfrau) gydag arbenigedd amlwg mewn llenyddiaeth Iseldireg Canol (Arthuraidd)
  • Gallu darllen Iseldireg Canol; dealltwriaeth sylfaenol o Hen Ffrangeg ac, yn ddelfrydol, Almaeneg Uwch Canol
  • Profiad o weithio gyda llawysgrifau canoloesol
  • Ysgrifennir y traethawd doethurol yn Saesneg
  • Bydd y project hwn yn cymryd hyd at bedair blynedd (rheoliadau UvA): PhD - Amsterdam School for Heritage, Memory and Material Culture (AHM) - University of Amsterdam

 

Yr Amgylchedd ymchwil Amsterdam School for Heritage, Memory and Material Culture (AHM) - University of Amsterdam

 

 Project Doethurol 4 Prifysgol Zürich

 

Prif oruchwyliwr: Yr Athro Richard Trachsler (Prifysgol Zürich) cyd-oruchwyliwr: Dr M. Hogenbirk (Prifysgol Amsterdam); Ymgynghorwyr: Dr M. Meuwese (Prifysgol Utrecht) Yr Athro Lino Leonardi (Scuola Normale Superiore di Pisa)

 

Ymholiadau: Yr Athro Richard Trachsler (rtrachsler@rom.uzh.ch)

Proffil ymchwil y prif oruchwyliwr: https://www.rose.uzh.ch/de/seminar/personen/trachsler.html

 

Mae'r project hwn yn canolbwyntio ar ramantau Arthuraidd Hen Ffrangeg a hanesyddiaeth mewn llawysgrifau a gynhyrchwyd yn Fflandrys a gogledd Ffrainc o ddiwedd y 13eg ganrif i'r 15fed ganrif. Rydym am gasglu data cadarn ar gynllun llawysgrifau, megis maint, nifer y colofnau, geiriau fesul colofn, y bylchau rhwng priflythrennau, ac ati, a fydd wedyn yn cael eu cymharu â data'r project cyfatebol. Bydd yr ymgeisydd doethurol yn y project hwn yn astudio'r ffordd y rhoddir arweiniad i ddarllenwyr trwy ddefnyddio elfennau paradestunol megis addurniadau, marciau paragraff ac atalnodi ond hefyd yn fewnol trwy strwythur amserol neu gysylltiadau naratif eraill, er enghraifft. Rydym yn gobeithio casglu gwybodaeth am ddatblygiad darllen unigol. Er mwyn deall yn well sut roedd cynulleidfaoedd yn y Fflandrys yn ymwneud â thestunau Arthuraidd a sut y gallai'r datblygiad o wrando ar rywun yn darllen i ddarllen yn unigol fod wedi digwydd yn llenyddiaeth Hen Ffrangeg, bydd y project hwn yn cymharu llawysgrifau Hen Ffrangeg yn gyntaf oll â'u cymheiriaid Iseldireg o'r un rhanbarth a rhanbarthau eraill (sy'n rhan o'r project cyfatebol) ac â llawysgrifau o draddodiadau cyfagos eraill (llawysgrifau Eidaleg).  

 

Bydd y project hwn yn defnyddio meddalwedd trawsgrifio â chymorth peiriant fel Transcribus neu eScriptorium. 

 

Gofynion

  • Gradd MA Iaith neu Lenyddiaeth Ffrangeg gydag arbenigedd amlwg mewn Hen Ffrangeg neu Ffrangeg Canol
  • Profiad o weithio gyda llawysgrifau canoloesol
  • Gallu darllen Ffrangeg Canol; dealltwriaeth sylfaenol o Hen Ffrangeg ac, yn ddelfrydol, dealltwriaeth sylfaenol o Isledireg Canol ac Eidaleg Canoloesol
  • Ysgrifennir y traethawd doethurol yn Ffrangeg

 

Amgylchedd ymchwil: https://www.phil.uzh.ch/en/studies.html

Am ragor o fanylion, ewch i: https://www.uzh.ch/en/studies/application/doctoralstudies.html

Am ofynion fisa gweler: https://www.uzh.ch/en/studies/application/entry.html

 

 

Project Doethurol 5 Scuola Normale Superiore di Pisa  

 

Prif oruchwyliwr: Yr Athro Fabrizio Cigni Cyd-oruchwyliwr: Yr Athro Raluca Radulescu (Prifysgol Bangor) Ymgynghorydd: Dr Martine Meuwese (Prifysgol Utrecht)

 

Ymholiadau: Yr Athro Fabrizio Cigni (fabrizio.cigni@unipi.it)

Proffil ymchwil y prif oruchwyliwr: https://www.fileli.unipi.it/dipartimento/persone/?p=fabrizio-cigni

 

Mae'r project hwn yn cynnwys cwmpas cronolegol a daearyddol helaeth, gyda phwyslais ar y 13eg a'r 15fed ganrif. Mae'r ymchwil yn canolbwyntio ar ledaeniad chwedl Tristan - mewn amrywiol ganghennau llenyddol, yn farddoniaeth a rhyddiaith - o fewn penrhyn yr Eidal. Rhoddir pwyslais arbennig ar gyd-destunau cymunedol a llysaidd yr Eidal. Trwy archwilio ffynonellau testunol cynradd ochr yn ochr â'r dreftadaeth ffigurol, nod y project yw ail-greu rhwydwaith diwylliannol. Trwy fethodoleg ryngddisgyblaethol - gan integreiddio dadansoddiad ieithyddol gydag ymchwiliad hanesyddol celf - bydd yr astudiaeth yn ceisio egluro sianeli trosglwyddo themâu Tristanaidd wrth iddynt fudo o'r byd Eingl-Ffrengig i'r Eidal ganoloesol. Mae elfen ganolog yr ymchwil hwn yn ymdrin â'r llawysgrifau. Mae cynhyrchu copïau Arthuraidd yn rhan o lenyddiaeth "Ffrengig-Eidalaidd". Er bod datblygiadau sylweddol wedi digwydd yn y maes hwn dros y degawdau diwethaf, mae ysgolheictod ieithyddol ac eiconograffig diweddar yn golygu bod gofyn am archwiliad mwy dwfn o lawysgrifau sydd wedi eu hanwybyddu hyd yma. Mae hyn yn cynnwys datgelu cysylltiadau cudd, fel y rhai o fewn y grŵp Pisa-Genoa. Ar ben hynny, mae gofyn am ymchwiliad trylwyr i dystiolaeth artistig. Er y gall ymddangos nad oes cysylltiad â'r gair ysgrifenedig, mae gan gelf ganoloesol gysylltiad annatod â'r testunau yn yr iaith wreiddiol ac yn iaith frodorol yr Eidal (mae enghreifftiau'n cynnwys cwiltiau Tristan); fodd bynnag, mae gwrthrychau a phaentiadau eraill sy'n darlunio pynciau sifalrig yn disgwyl am ddadansoddiad ysgolheigaidd cynhwysfawr.

 

Gofynion

  • MA mewn pwnc sy'n gysylltiedig â Hen Ffrangeg neu Hen Eidaleg neu ieitheg ganoloesol a enillwyd dim cynharach na chwe blynedd cyn dyddiad cau'r alwad.
  • Bydd profiad o astudio llawysgrifau canoloesol yn fantais.
  • Ynghyd â'r llythyr cymhelliant, gwerthfawrogir rhaglen ymchwil benodol, lle mae'r ymgeisydd yn nodi pwnc penodol o fewn y project yn seiliedig ar ei ddiddordebau a'i sgiliau, ac yn disgrifio sut mae'n bwriadu gwneud yr ymchwil yn ystod y ddoethuriaeth.
  • Caiff y traethawd ymchwil ei ysgrifennu yn Eidaleg neu yn Ffrangeg; rhaid gallu ysgrifennu Eidaleg.
  • Bydd y cwrs doethurol yn y Scuola Normale Superiore yn dechrau ar 1 Tachwedd 2026.
  • Bydd y cwrs doethurol yn y Scuola Normale Superiore yn cynnwys pedwaredd flwyddyn ar ôl y tair blynedd a ariennir gan raglen MSCA-DN. Mae'r ysgoloriaeth yn cyfateb i € 18,848.00 gros, gan gynnwys lwfans llety. Mae'r swm hwn yn cynyddu 50% i gyfnodau tramor yn gwneud gweithgareddau ymchwil; yn ogystal â hynny, mae gan bob myfyriwr hawl i gyllideb i weithgaredd ymchwil yn yr Eidal a thramor sy'n cyfateb i ddim llai na 10% o gyfanswm blynyddol y grant.

 

Amgylchedd ymchwil: https://www.sns.it/en 

Rhaglen ddoethurol: https://www.sns.it/en/romance-and-italian-philology-digital-turn; https://froid.sns.it

 

 

Project Doethurol 5 Scuola Normale Superiore di Pisa  

 

Prif oruchwyliwr: Yr Athro Lino Leonardi Cyd-oruchwyliwr: Yr Athro Richard Trachsler (Prifysgol Zürich) Ymgynghorydd: Sofía Lodén (Prifysgol Stockholm)

 

Ymholiadau: Yr Athro Lino Leonardi (lino.leonardi@sns.it)

Proffil ymchwil y prif oruchwyliwr: https://www.sns.it/en/persona/lino-leonardi 

 

Mae'r project yn canolbwyntio ar drosglwyddo llenyddiaeth Arthuraidd yn Hen Ffrangeg rhwng Ffrainc a'r Eidal yn y 13eg-15fed ganrif. Yn dibynnu ar sgiliau a diddordebau'r ymgeisydd, bydd y project yn canolbwyntio ar un o'r agweddau canlynol:

Archwilio trosglwyddiad nofelau rhyddiaith cylch Lancelot-Grail ar ffurf llawysgrifau, gan ganolbwyntio ar un rhan o'r cylch (Mort Artu yn ddelfrydol). Nod yr ymchwil fydd ymchwilio i rai llawysgrifau sy'n arbennig o ddiddorol o safbwynt testunol ac ieithegol, ac archwilio'r posibilrwydd o'u dosbarthu o fewn fframwaith cyffredinol traddodiad testunol. 

Map o bresenoldeb delweddaeth Arthuraidd mewn llenyddiaeth Eidalaidd ganoloesol. O'r cerddi Sisilaidd cyntaf yn llys Frederick II i stori Paolo a Francesca yn Inferno Dante, mae themâu a chymeriadau o lenyddiaeth Arthuraidd yn Ffrangeg wedi bwydo dychymyg barddoniaeth Eidaleg. Bydd adolygiad newydd o'r rhwydwaith thematig hwn yn taflu goleuni ar bresenoldeb testunau Arthuraidd ar benrhyn yr Eidal a'u derbyniad yn y gwahanol gylchoedd diwylliannol a welodd enedigaeth llenyddiaeth gynnar yr Eidal.

 

Gofynion

  • MA mewn pwnc sy'n gysylltiedig â Hen Ffrangeg neu Hen Eidaleg neu ieitheg ganoloesol a enillwyd dim cynharach na chwe blynedd cyn dyddiad cau'r alwad.
  • Bydd profiad o astudio llawysgrifau canoloesol yn fantais.
  • Ynghyd â'r llythyr cymhelliant, gwerthfawrogir rhaglen ymchwil benodol, lle mae'r ymgeisydd yn nodi pwnc penodol o fewn y project yn seiliedig ar ei ddiddordebau a'i sgiliau, ac yn disgrifio sut mae'n bwriadu gwneud yr ymchwil yn ystod y ddoethuriaeth.
  • Caiff y traethawd ymchwil ei ysgrifennu yn Eidaleg neu yn Ffrangeg; rhaid gallu ysgrifennu Eidaleg.
  • Bydd y cwrs doethurol yn y Scuola Normale Superiore yn dechrau ar 1 Tachwedd 2026.
  • Bydd y cwrs doethurol yn y Scuola Normale Superiore yn cynnwys pedwaredd flwyddyn ar ôl y tair blynedd a ariennir gan raglen MSCA-DN. Mae'r ysgoloriaeth yn cyfateb i € 18,848.00 gros, gan gynnwys lwfans llety. Mae'r swm hwn yn cynyddu 50% i gyfnodau tramor i wneud gweithgareddau ymchwil; yn ogystal â hynny, mae gan bob myfyriwr hawl i gyllideb i weithgaredd ymchwil yn yr Eidal a thramor sy'n cyfateb i ddim llai na 10% o gyfanswm blynyddol y grant.

 

Amgylchedd ymchwil: https://www.sns.it/en 

Rhaglen ddoethurol: https://www.sns.it/en/romance-and-italian-philology-digital-turn; https://froid.sns.it

 

 

 

EDEFYN II: CYFRYNGOLDEB (is-brojectau 7-11) 

  

Project Doethurol 7 University of Iceland

 

Prif oruchwyliwr: Yr Athro Sif Ríkharðsdóttir (University of Iceland) Cyd-oruchwyliwr: Yr Athro Sébastien Douchet (Prifysgol Clermont Auvergne) Ymgynghorwyr: Dr Martha Baldon (Prifysgol St Andrews) a'r Athro Fanny Moghaddassi (University of Strasbourg)

 

Ymholiadau: Yr Athro Sif Ríkharðsdóttir (sifr@hi.is)

Proffil ymchwil y prif oruchwyliwr: https://sif.hi.is 

 

Bydd gan y project doethurol hwn bwyslais damcaniaethol cryf yn seiliedig ar astudiaethau rhywedd ac emosiwn. Y bwriad yw cwestiynu'r croestoriadau rhwng cyfluniadau rhywedd a sgriptiau emosiynol mewn llenyddiaeth Arthuraidd-Tristanaidd yn fras gyda golwg ar sut y gwnaeth croestoriadau o'r fath ffurfweddu hunaniaethau rhywedd ac, yn wir, fodelu ymddygiad i’w cymunedau o ddarllenwyr dilynol, yn y cyfnod canoloesol ac ar ôl y cyfnod canoloesol. Bwriad y project yw ystyried yn gyntaf gyfluniadau emosiynau rhywedd fel y'u darlunnir yn Tristan gan Thomas (Eingl-Ffrangeg) ac yn ail addasu ac ail-gyflunio emosiynau rhyweddol o'r fath i Hen Norseg a/neu Saesneg Canol, a thraddodiadau iaith eraill os yn berthnasol. 

 

Gofynion:

  • Cefndir mewn llenyddiaeth gymharol, astudiaethau canoloesol, neu lenyddiaeth yn unrhyw un o'r ieithoedd perthnasol (iaith Sgandinafaidd, Ffrangeg, Saesneg, Almaeneg, Eidaleg) sy'n cynnwys gwybodaeth am lenyddiaeth ganoloesol
  • Sgiliau iaith sylfaenol mewn Ffrangeg a Hen Norseg a/neu Saesneg Canol a pharodrwydd i wella'r sgiliau hynny os oes angen
  • Mae unrhyw sgiliau iaith eraill sy'n berthnasol i'r traddodiad Tristanaidd yn ddewisol ond yn ddymunol.
  • Diddordeb mewn astudiaethau cymharol ac emosiwn

 

Amgylchedd ymchwil: https://english.hi.is/about-ui/schools-and-faculties/school-hunities/faculty-icelandic-and-comparative-culture-studies

Am ragor o wybodaeth gweler: https://english.hi.is/study/doctoral-studies/doctoral-studies-school-hunities 

 

 

Project Doethurol 8 University of Iceland

 

Prif oruchwyliwr: Yr Athro Sif Ríkharðsdóttir (University of Iceland) Cyd-oruchwyliwr: Yr Athro Raluca Radulescu (Prifysgol Bangor) Ymgynghorydd: Sofía Lodén (Prifysgol Stockholm)

 

Ymholiadau: Yr Athro Sif Ríkharðsdóttir (sifr@hi.is)

Proffil ymchwil y prif oruchwyliwr: https://sif.hi.is

 

Bydd y project doethuriaeth hwn yn croestorri dau brif edefyn y project, gan gynnwys llenyddiaeth ac arteffactau Arthuraidd. Prif bwyslais y project yw emosiynau Arthuraidd a'u trosglwyddiad, eu datblygiad ac etifeddiaeth codau ac arferion emosiynol o'r fath mewn llenyddiaeth a gwrthrychau diwylliannol, gan gynnwys delweddaeth weledol neu wrthrychau canoloesol. Disgwylir i'r myfyriwr drafod trosglwyddiadau a datblygiadau o'r fath o ramantau Chrétien de Troyes a motiffau cysylltiedig mewn modd cymharol ar draws cyfuniad o ieithoedd dethol o blith y rhai a gynigir gan dîm y project, gan gynnwys trosglwyddo deunydd. Bydd y fectorau a'r cyfuniadau trosglwyddo penodol yn dibynnu ar yr ymgeisydd doethurol ac ar y tîm, ond gallent gynnwys Saesneg Canol, Hen Norseg ac ieithoedd Sgandinafaidd eraill, Almaeneg Uwch Canol ac Eidaleg ynghyd ag unrhyw arteffactau cysylltiedig. Bydd y myfyriwr yn cael hyfforddiant yn Amgueddfa Genedlaethol Gwlad yr Iâ.

 

Gofynion:

  • Cefndir mewn llenyddiaeth gymharol, astudiaethau canoloesol, neu radd mewn llenyddiaeth (iaith Sgandinafaidd, Saesneg neu Almaeneg) sy'n cynnwys gwybodaeth am lenyddiaeth ganoloesol
  • Mae cefndir mewn archaeoleg, hanes celf, neu astudiaethau amgueddfa yn ddewisol
  • Rhoddir blaenoriaeth i ymgeiswyr a all ddangos sgiliau iaith Hen Norseg
  • Mae sgiliau mewn ieithoedd eraill sy'n gysylltiedig â throsglwyddo gweithiau Chrétien de Troys yn ddymunol.

 

Amgylchedd ymchwil: https://english.hi.is/about-ui/schools-and-faculties/school-hunities/faculty-icelandic-and-comparative-culture-studies

Am ragor o wybodaeth gweler: https://english.hi.is/study/doctoral-studies/doctoral-studies-school-hunities

 

 

Project Doethurol 9 Prifysgol Bangor

 

Prif oruchwyliwr: Yr Athro Raluca Radulescu (Prifysgol Bangor) Ymgynghorydd: Yr Athro Sébastien Douchet (Prifysgol Clermont Auvergne) Ymgynghorwyr: Yr Athro Lino Leonardi (Scuola Normale Superiore di Pisa); yr Athro Fanny Moghaddassi (University of Strasbourg) 

 

Ymholiadau: Yr Athro Raluca Radulescu (r.radulescu@bangor.ac.uk) 

Proffil ymchwil y prif oruchwyliwr: https://www.bangor.ac.uk/staff/sacl/raluca-radulescu-010323/cy 

 

Mae'r project hwn yn canolbwyntio ar y rhyngweithiadau rhwng ac o blith testunau Arthuraidd a thestunau eraill mewn llawysgrifau aml-destun yn Ynysoedd Prydain o safbwynt sgriptiau emosiynol ym mhob testun mewn detholiad, ac ar draws testunau mewn detholiad, gan eu cymharu â phrosesau y gellir eu dehongli mewn llawysgrifau tebyg o'r Cyfandir, yn enwedig yn Ffrainc a'r Eidal, a gan gymharu'r casgliadau hynny â'r defnydd modern o 'e-ddarllenwyr', a'r grym y tu ôl i gasgliadau modern o'r testunau canoloesol hyn sy'n cael eu gyrru gan ddarllenwyr, lle maent ar gael. Mae'n defnyddio hanes emosiynau o safbwynt niwroseicoleg wedi ei gymhwyso i ddealltwriaeth o'r testun canoloesol. 

 

Gofynion 

  • MA mewn llenyddiaeth Saesneg/hanes neu bwnc cysylltiedig (astudiaethau canoloesol)
  • Saesneg Canol (hanfodol),
  • Lladin Canoloesol (dymunol);
  • Hen Ffrangeg (neu barodrwydd i ddysgu trwy hyfforddi o fewn y rhwydwaith)
  • profiad neu o leiaf hyfforddiant dechreuwyr mewn paleograffeg ganoloesol a chodigoleg llawysgrifau ynysol
  • Profiad (neu ddiddordeb) mewn dulliau damcaniaethol, yn enwedig hanes emosiynau

 

Amgylchedd ymchwil: https://www.bangor.ac.uk/centre-for-arthurian-studies

Academi Ddoethurol Bangor: https://www.bangor.ac.uk/doctoral-academy

I weld y gofynion fisa, ewch i: https://www.bangor.ac.uk/international/support/visa_immigration

 

 

Project Doethurol 10 Prifysgol Clermont Auvergne

 

Prif oruchwyliwr: Yr Athro Sébastien Douchet (Prifysgol Clermont Auvergne) Ymgynghorwyr: Yr Athro Raluca Radulescu (Prifysgol Bangor) Ymgynghorydd: Yr Athro Sofía Lodén (Prifysgol Stockholm). 

 

Ymholiadau: Yr Athro Sébastien Douchet (sebastien.douchet@uca.fr) 

Proffil ymchwil y prif oruchwyliwr: https://celis.uca.fr/le-celis/membres/membres-permanents/sebastien-douchet  

 

Bydd y project doethurol hwn yn astudio derbyniad ac ailgyfluniad ysgolheigaidd Ewropeaidd chwedlau Arthuraidd a Thristanaidd o ddiwedd yr 17eg ganrif hyd ddechrau'r 19eg ganrif. Gan ganolbwyntio ar Loegr a Ffrainc, bydd yn archwilio sut y cafodd y dreftadaeth ganoloesol ei hail-greu trwy drosglwyddo deunydd a deallusrwydd. Bydd y traethawd ymchwil yn olrhain hanes deallusol canoloesoldeb trwy dair prif golofn: darllen hanes (dadansoddi llyfrgelloedd, llawysgrifau anodedig a llyfrau cynnar), rhwydweithiau ysgolheigaidd (ail-greu dadleuon a gohebiaeth ddeallusol ynglŷn â tharddiad chwedlau), ieithyddiaeth a golygu (astudiaeth gymharol o sut y lluniodd arferion golygyddol ganfyddiadau modern o fythau). Mae'r project yn pontio hanes llyfrau a hanes deallusol ac yn cymhwyso modelau rhyngddisgyblaethol i gysylltu micro-ddadansoddiad â thueddiadau byd-eang. Yn arbennig, mae'n mynd i'r afael â rhagfarnau rhywedd wrth drosglwyddo syniadau. Bydd ymgeiswyr yn cynnal ymchwil drawswladol gan ddefnyddio corpws o lawysgrifau, drafftiau ysgolheigaidd, a chatalogau llyfrgelloedd i ddatgelu pwysigrwydd cymdeithasol a gwleidyddol derbyniad canoloesol yn Ewrop fodern.

 

Gofynion 

  • Cefndir cryf mewn llenyddiaeth gymharol, astudiaethau theatr, neu hanes diwylliannol.
  • Y gallu i weithio gyda ffynonellau archifol a deunyddiau amlieithog.
  • Diddordeb mewn astudiaethau derbyniad a fframweithiau ymchwil rhyngddisgyblaethol.
  • Ysgrifennir y traethawd ymchwil yn Ffrangeg

 

Yr Amgylchedd ymchwil 

  

Project Doethurol 11 Prifysgol Clermont Auvergne

 

Prif oruchwyliwr: Yr Athro Sébastien Douchet (Prifysgol Clermont Auvergne) Cyd-oruchwyliwr: Yr Athro Fabrizio Cigni (Pisa) Ymgynghorydd: Yr Athro Sofía Lodén (Prifysgol Stockholm) 

 

Ymholiadau: Yr Athro Sébastien Douchet (sebastien.douchet@uca.fr) 

Proffil ymchwil y prif oruchwyliwr: https://celis.uca.fr/le-celis/membres/membres-permanents/sebastien-douchet  

 

Bydd y project doethurol hwn yn ymchwilio i dderbyniad creadigol chwedlau Arthuraidd a Thristanaidd ar lwyfan Ewrop o'r 17eg ganrif i'r 19eg ganrif. Trwy ganolbwyntio ar y cyfnod cyn-Rhamantaidd sydd heb ei ymchwilio'n ddigonol, bydd yn olrhain datblygiad canoloesoldeb ar draws Ffrainc, Lloegr a'r Eidal. Bydd yr ymchwil yn defnyddio fframwaith tair rhan, rhyngddisgyblaethol: cynhyrchu testunol: Dadansoddiad cymharol o ddramâu a libretos opera ar draws haenau cymdeithasol; crefft llwyfan: ymchwiliad i ddylunio cynhyrchiad a chyfarwyddo llwyfan trwy archifau theatrig; derbyniad: astudiaeth o sylwebaeth gyhoeddus a beirniadol i asesu effaith ddiwylliannol. Un newyddbeth allweddol yw integreiddio dadansoddiad sy'n sensitif i rywedd i archwilio sut y dylanwadodd ragfarnau ar drosglwyddiad y chwedlau. Mae'r astudiaeth hon yn defnyddio ffynonellau archifol amrywiol i daflu goleuni ar y newidiadau ideolegol a arweiniodd at adfywiad 'canoloesol' enfawr y 19eg ganrif.

 

Gofynion 

  • Cefndir cadarn mewn llenyddiaeth gymharol, astudiaethau theatr, neu hanes diwylliannol.
  • Y gallu i weithio gyda ffynonellau archifol a deunyddiau amlieithog.
  • Diddordeb mewn astudiaethau derbyniad a fframweithiau ymchwil rhyngddisgyblaethol.
  • Rhuglder yn y Ffrangeg ar lefel uwch (caiff y traethawd ymchwil ei ysgrifennu yn Ffrangeg) a dealltwriaeth dda o Saesneg ac Eidaleg

 

Yr Amgylchedd ymchwil