Mae Ysgol Gwyddorau Meddygol ac Iechyd Prifysgol Bangor wedi dal gafael ar achrediad arbennig gan Unicef, y 'Unicef UK Baby Friendly Initiative', yr unig raglen bydwreigiaeth yng Nghymru gyda’r achrediad arbennig yma.
Mae’r Baby Friendly Initiative (BFI) yn cefnogi addysg o gwmpas bwydo babanod ac adeiladu’r berthynas rhwng y fam a’r babi, rhywbeth y mae Sheila Brown, Bydwraig Arweiniol ar gyfer Addysg a’i thîm yn yr Ysgol Gwyddorau Meddygol ac Iechyd yn angerddol yn ei gylch.
Meddai Sheila, “Rwyf wedi bod yn ymwneud â’r ymgyrch BFI ers rhai blynyddoedd, yn gyntaf fel bydwraig ac erbyn hyn fel addysgwr. Rydym yn dysgu myfyrwyr bydwreigiaeth sut i gynnig gofal a chefnogaeth i annog mamau i fwydo o’r fron. Rydym hefyd yn eu haddysgu am fuddion bwydo o’r fron, gan gynnwys llai o salwch adeg plentyndod a llai o salwch yn hwyrach ymlaen mewn bywyd. Mae buddion iechyd i’r fam hefyd.
“Mae llu o dystiolaeth glir sy’n dangos pwysigrwydd llefrith dynol ar gyfer babanod. Mae’n bwysig iawn bod gwybodaeth yn seiliedig ar dystiolaeth a chefnogaeth yn cael eu darparu er mwyn galluogi menywod i fwydo o’r fron. I fabanod sy’n cael eu geni’n fuan, neu sydd mewn gofal arbennig, mae angen i fenywod gael eu cefnogi i dynnu llaeth o’r fron a darparu llefrith ar gyfer eu babanod. Mewn rhai achosion, gall hyn arbed bywydau.”
Rwy’n hynod falch o fedru llongyfarch rhaglen bydwreigiaeth Prifysgol Bangor ar gael ei ail-achredu gyda’r UNICEF Baby Friendly Initiative.
Fel yr unig raglen achrededig yng Nghymru, mae wir yn destun balchder i ni.
Mae ymrwymiad y tîm addysgu o ran sicrhau bod bydwragedd y dyfodol yn cael eu trwytho’n fanwl mewn gofal bwydo babanod yn sylfaen gadarn i’r gefnogaeth bwydo babanod sy’n cael ei gynnig i famau a theuluoedd gan wasanaethau mamolaeth Gogledd Cymru."
Mae gan Brifysgol Bangor raglen bydwreigiaeth uchel ei pharch, sy’n cynnwys cyfleoedd i astudio agweddau o’r rhaglen drwy gyfrwng y Gymraeg, ac mae dros 100 o fyfyrwyr ar y cwrs tair blynedd o hyd ar hyn o bryd.
Pob blwyddyn mae Prifysgol Bangor yn derbyn hyd at 400 cais ar gyfer y 30 i 40 lle ar y rhaglen bydwreigiaeth. Am ragor o wybodaeth am y rhaglen bydwreigiaeth a’r cymwysterau sydd eu hangen i ddechrau ar y rhaglen, cliciwch yma
