Contractwr o Ogledd Cymru wedi’i Benodi ar gyfer Ail Adeilad M-SParc

Gyda phrif adeilad M-SParc bellach ar ei lawn gapasiti, bydd yr adeilad newydd yn cynnwys swyddfeydd, gweithdai a labordai, yn ogystal â mannau hyfforddi, ymgysylltu a digwyddiadau; gan alluogi’r safle i dyfu tra’n parhau i fanteisio ar ragoriaeth ymchwil Prifysgol Bangor ar y safle.

Dywedodd yr Athro Edmund Burke, Is-Ganghellor: “Sefydlwyd Parc Gwyddoniaeth Prifysgol Bangor, M-SParc, fel ysgogwr ar gyfer twf economaidd ac arloesedd hirdymor yng Ngogledd Cymru, gan adeiladu ar gryfderau ymchwil y Brifysgol a chyfleoedd rhanbarthol. O’r cychwyn cyntaf, ein nod oedd ehangu’r safle er mwyn cynyddu ein cefnogaeth i arloesedd mewn gwyddoniaeth a thechnoleg. Gyda’r cyhoeddiadau diweddar ynghylch buddsoddiadau rhanbarthol mawr, nid yw’r angen i dyfu ein cyfleusterau a’n galluoedd erioed wedi bod yn gliriach. Bydd yr ehangu hwn yn ein galluogi i ddatblygu ymhellach ein hymgysylltiad agos â chwmnïau lleol, gan sicrhau bod arloesedd yn dod â budd i’r gymuned ehangach ac yn cefnogi twf rhanbarthol cynaliadwy.”

Mae Uchelgais Gogledd Cymru am ddarparu cyllid cyfatebol ar gyfer y datblygiad drwy ei Cynllun Twf Gogledd Cymru, yn amodol ar gymeradwyaeth yr achos busnes terfynol. Wedi’i hariannu gan Lywodraethau Cymru a’r DU, mae’r Cynllun Twf yn buddsoddi mewn prosiectau ar draws y rhanbarth i alluogi twf economaidd cynaliadwy.

Dywedodd Meghan Davies, Rheolwr Rhaglen Ynni a Sero Net, Uchelgais Gogledd Cymru: “Mae Egni yn brosiect arwyddocaol o fewn rhaglen Ynni Carbon Isel ein Cynllun Twf, sy’n ceisio gosod y rhanbarth fel lleoliad blaenllaw ar gyfer ynni gwyrdd. Rydym yn falch iawn o weld Wynne Construction, gyda’i enw da rhagorol a’i ymrwymiad cryf i gynaliadwyedd, yn cael ei benodi, ac edrychwn ymlaen at ystyried yr achos busnes terfynol yn y dyfodol agos.”

Yn dilyn sefydlu tîm ‘Egni Carbon Isel’ yn 2021, sydd wedi ehangu gweithgarwch yn y sector yn sylweddol, mae M-SParc a Phrifysgol Bangor bellach yn cydweithio’n agos â Wynne Construction i gyflawni’r adeilad newydd. Bydd y cydweithrediad hwn yn cryfhau ecosystem carbon isel y rhanbarth ac yn cefnogi cynnydd parhaus tuag at Sero Net.

Dywedodd Simon Moreton, Masnachol, Wynne Construction: “Mae’r prosiect mawreddog hwn yn nodi ein partneriaeth gyntaf â Phrifysgol Bangor ac yn cynrychioli ychwanegiad sylweddol at ein portffolio cynyddol o brosiectau prifysgol ar draws rhanbarth Gogledd Cymru.

“Rydym wrth ein bodd yn gweithio gyda thîm Prifysgol Bangor a M-SParc i ddarparu cyfleuster cynaliadwy o safon uchel sy’n adlewyrchu dyheadau’r Brifysgol a’r gymuned wyddoniaeth a thechnoleg ehangach. Fel gyda phob un o’n prosiectau, bydd gwerth cymdeithasol wrth galon ein dull gweithredu.

“Byddwn yn buddsoddi yn y gadwyn gyflenwi leol yng Ngogledd Cymru, gan greu cyfleoedd i fusnesau lleol a chyflogaeth, a meithrin ymgysylltiad cymunedol drwy gydol y prosiect.”

Ers ei agor yn 2018, mae M-SParc wedi llwyddo i greu dros 150 o swyddi newydd gwerth uchel ac wedi hwyluso mwy na 150 o interniaethau a lleoliadau diwydiannol, gan ddenu £7 miliwn o fuddsoddiad arloesedd i’r rhanbarth.

Dywedodd Rheolwr Gyfarwyddwr M-SParc, Pryderi ap Rhisiart: “Dan ni bron â bod ar ein llawn gapasiti yn adeilad presennol M-SParc, ac wedi gweld partneriaethau anhygoel, cwmnïau deillio, busnesau newydd a chwmnïau sefydledig yn arloesi ac yn creu swyddi ers agor yn 2018. Gyda’r cyhoeddiad diweddar yn Wylfa, a Gogledd Cymru wedi’i dynodi’n Ardal Twf Deallusrwydd Artiffisial, dyma’r amser perffaith i ymuno â symudiad M-SParc a manteisio’n llawn ar y cyfleoedd hyn.”

Bydd yr adeilad newydd hefyd yn chwarae rhan hanfodol ym menter Porthladd Rhydd Ynys Môn, gan ddarparu cyfleuster modern ar safle Porthladd Rhydd Ynys Môn.

Ychwanegodd Dylan Williams, Prif Weithredwr Cyngor Ynys Môn: “Mae Parc Gwyddoniaeth M-SParc yn hanfodol i ddatblygiad a chyflawni rhaglen arloesi ac ymchwil a dylunio Porthladd Rhydd Ynys Môn wrth symud ymlaen.

“Bydd yr adeilad newydd yn darparu adnodd a chyfleusterau hanfodol pellach sydd eu hangen i gefnogi datblygiad economaidd gydag arloesedd wrth ei wraidd. Yn amlwg, bydd y fenter hon hefyd yn ategu Rhaglen Ynys Ynni bresennol y Cyngor Sir ac yn cefnogi ein huchelgais ar y cyd i greu economi leol fywiog.”

Dywedodd Ysgrifennydd y Cabinet dros yr Economi, Ynni a Chynllunio Llywodraeth Cymru, Rebecca Evans: “Mae M-SParc yn enghraifft o sut y gall buddsoddiad strategol mewn seilwaith ymchwil a datblygu greu swyddi o ansawdd uchel a denu buddsoddiad pellach, tra’n cefnogi ein huchelgeisiau ar gyfer dyfodol gwyrddach a mwy llewyrchus i Ogledd Cymru a thu hwnt.

“Mae ein buddsoddiad, yn ogystal â chyllid gan Cynllun Twf Gogledd Cymru, wedi darparu £2.5m ychwanegol o gyllid cyfatebol, gan gydnabod y rôl y bydd M-SParc yn ei chwarae wrth sicrhau manteision buddsoddiadau sydd ar ddod o Wylfa, Porthladd Rhydd Ynys Môn a’r Ardal Twf AI.”

I ddysgu mwy am yr ecosystem, tenantiaeth ar y safle, a phrosiect Egni, cysylltwch â’r tîm drwy egni@m-sparc.com, neu galwch heibio Caffi Tanio am baned.