Graddau Israddedig Athroniaeth, Moeseg a Chrefydd

Mae astudio Athroniaeth, Moeseg a Chrefydd yn rhoi'r cyfle i ti archwilio rhai o'r cwestiynau mwyaf dwfn y mae bodau dynol erioed wedi'u gofyn. Pam rydym yn bodoli? Beth yw cyfiawnder? Sut ddylen ni fyw? 

Ym Mhrifysgol Bangor, byddi’n ymgysylltu â syniadau o bob math o ddiwylliannau a thraddodiadau, o athronwyr hynafol i ddadleuon cyfoes am hunaniaeth, rhyddid a dyfodol cymdeithas. Mae hon yn radd sy'n dy herio i feddwl yn ddwfn am y byd, a dy le ynddo.

Mae sgiliau meddwl beirniadol, datrys problemau a chyfathrebu yn sgiliau y mae cyflogwyr yn eu gwerthfawrogi ym mhob sector. Drwy ddadansoddi dadleuon, gwerthuso penblethau moesegol, ac ymgysylltu mewn dadl, byddi’n dysgu sut i feddwl yn glir, cwestiynu tybiaethau, a llunio dadleuon perswadiol.

Mae'r sgiliau hyn yn agor drysau i ystod eang o yrfaoedd, gan gynnwys y gyfraith, newyddiaduraeth, addysgu, polisi cyhoeddus, busnes, a mwy. Beth bynnag fo dy lwybr, byddi’n gadael Prifysgol Bangor gyda'r hyder i feddwl yn annibynnol a gwneud penderfyniadau rhesymegol.

Ym Mhrifysgol Bangor, mae athroniaeth yn cysylltu'n agos â materion go iawn sy'n llunio'r byd modern. Drwy gydol dy radd, byddi’n archwilio cwestiynau moesegol ac athronyddol sy'n ymwneud â phynciau megis deallusrwydd artiffisial, cyfiawnder gwleidyddol, cyfrifoldeb amgylcheddol, hawliau dynol, amrywiaeth grefyddol, a gwrthdaro byd-eang.

Fyddi di ddim yn dysgu am ddamcaniaethau haniaethol yn unig. Byddi’n ennill y sgiliau i ddeall ac ymateb i rai o heriau mwyaf y byd sydd ohoni heddiw. Y tu hwnt i'r ystafell ddosbarth, mae ein Caffi Athroniaeth a redir gan fyfyrwyr yn cynnig lle hamddenol i fyfyrwyr a staff ddod ynghyd i drafod syniadau a materion cyfredol.

Yn hytrach nag arholiadau traddodiadol, mae ein gradd Athroniaeth, Moeseg a Chrefydd yn cynnig cyfle i ti weithio ar asesiadau creadigol ac ymarferol, gan ganiatáu i ti gymhwyso syniadau athronyddol mewn ffyrdd ystyrlon a diddorol. Cei gyfle i:

• greu podlediadau sy'n egluro syniadau cymhleth
• dylunio ymgyrchoedd cyfryngau cymdeithasol sy'n hyrwyddo newid cymdeithasol neu foesegol
• ysgrifennu adroddiadau ar ffurf polisi
• cyfrannu at brojectau ar ffurf Melin Drafod sy'n dadansoddi materion cyfoes ac sy’n cynnig atebion

Bydd y profiadau hyn yn dy helpu i ddatblygu sgiliau allweddol mewn cyfathrebu, ymchwil, meddwl beirniadol, gwaith tîm, a’r cyfryngau digidol. Byddi’n graddio gyda dealltwriaeth gref o athroniaeth, moeseg a chrefydd, yn ogystal â phortffolio o waith sy'n dangos dy sgiliau a dy brofiadau – sy'n cael eu gwerthfawrogi'n fawr gan gyflogwyr.

Os oes gen ti ddiddordeb mewn addysgu Athroniaeth, Moeseg a Chrefydd, mae Prifysgol Bangor yn cynnig llwybr pwrpasol i athrawon sydd wedi'i gynllunio i dy helpu i ddatblygu'r wybodaeth, y sgiliau a'r profiad sydd eu hangen ar gyfer yr ystafell ddosbarth. Byddi’n archwilio sut i gynllunio cwricwlwm, yn dysgu am addysgu crefydd, gwerthoedd a moeseg wrth ddyfnhau dy ddealltwriaeth o Athroniaeth, Moeseg a Chrefydd.

Drwy ein partneriaeth â'r Ganolfan Genedlaethol Addysg Grefyddol yng Nghymru, cei gyfleoedd i gymryd rhan mewn projectau, mentrau ymchwil ac interniaethau sy'n gysylltiedig ag addysg grefyddol. Mae'r profiadau hyn yn caniatáu i ti ymgysylltu'n uniongyrchol â datblygiadau yn y maes wrth adeiladu profiad gwerthfawr i ddilyn gyrfa yn y dyfodol ym myd addysg.