Pleser canu: Corws y Brifysgol yn dod â buddion iechyd meddwl

Wrth i Brifysgol Bangor ddathlu 100 mlynedd o gerddoriaeth eleni, mae aelodau presennol y Corws, rhyw 50 o aelodau, wedi bod yn rhannu’r budd y maent yn ei gael o ddod at ei gilydd i ganu yn rheolaidd.

Mae Prifysgol Bangor yn dathlu 100 mlynedd o gerddoriaeth eleni, ac wrth i Gerddorfa Symffoni a Chorws Prifysgol Bangor baratoi ar gyfer eu cyngerdd nesaf ar ddydd Sul 27 Tachwedd, mae aelodau presennol y Corws, rhyw 50 o aelodau, wedi bod yn rhannu’r budd y maent yn ei gael o ddod at ei gilydd i ganu yn rheolaidd.

Mae’r Corws yn rhyngwladol ei natur, gyda’r myfyrwyr a’r aelodau lleol yn dod o bob rhan o’r byd – mae’r aelodaeth bresennol yn cynrychioli Cymru, Lloegr, yr Alban, Iwerddon, Gwlad Pwyl, y Seychelles, Trinidad, yr Almaen, Ffrainc, UDA, Japan, Gwlad Groeg a'r Eidal.

Gydag aelodau o bob oed ac o gefndiroedd gwahanol, mae’n gorws cynhwysol a’r llawenydd pur o ganu a chreu cerddoriaeth sy’n ganolog i bopeth.

Ond yn ôl yr aelodau mae dod ynghyd i ganu yn dod â llawer o fanteision eraill: gwneud ffrindiau, seibiant oddi wrth astudio a hefyd y cyfle i ganu gyda'r gerddorfa, sydd yn ei dro yn dod â buddion iechyd meddwl go iawn.

Grŵp o bobl o wahanol oedrannau yn gwenu — Rhai aelodau o Gorws Prifysgol Bangor

Yn ystod un ymarfer dwedodd un aelod o’r gerddorfa yn dawel, “Fe wnes i golli fy ngŵr yn annisgwyl y llynedd. Ro’n i'n meddwl na fyddwn i byth yn teimlo fel canu eto. Ond roedd gen i ffrindiau yma, ac fe wnes i barhau i ddod. Mae wir wedi fy helpu i ddod trwy’r brofedigaeth.”

Mae’r corws ar hyn o bryd yn brysur yn ymarfer bob nos Fercher ar gyfer eu cyngerdd nesaf gyda cherddorfa symffoni Prifysgol Bangor a chôr lleol Cantorion Menai yn Neuadd Prichard-Jones ar 27 Tachwedd, lle byddant yn canu gweithiau cyfansoddwyr a chanddynt gysylltiad agos â Bangor mewn rhyw ffordd neu’i gilydd.

Mae’r rhaglen yn cynnwys gwaith gan Gyfarwyddwr Cerdd cyntaf y Brifysgol yn 1912, E T Davies, Dilys Elwyn Edwards, John Hywel, Caradog Roberts a William Mathias, a bydd yn cyngerdd yn cael ei arwain gan Gyfarwyddwr Cerdd presennol y brifysgol, Gwyn L Williams a’r Arweinydd Chris Atherton, a’r unawdwyr fydd y soprano Sioned Terry, y tenor Robyn Lyn Evans a’r bariton Jeffrey Williams.

Mae rhywbeth go arbennig am gynllunio rhaglen i gyngerdd yn defnyddio dim ond gweithiau cerddorol gan gyfansoddwyr Bangor. Mae gan y Brifysgol restr faith o gyfansoddwyr uchel eu parch sydd wedi gweithio yn yr Adran Gerdd – ac mae’r traddodiad hwnnw’n parhau. Yr hyn y mae’r adran Cerddoriaeth ym Mangor yn llwyddo i’w wneud yn dda iawn yw ymgysylltu â'i chymuned. Mae'r gerddorfa a'r côr wedi'u gwreiddio'n ddwfn yn y ddinas a’r cyffiniau. Mae’n cynnwys myfyrwyr a staff, ond hefyd cerddorion o Landudno, Bae Colwyn a Wrecsam. Yn wir, mae Cantorion Menai o Fôn yn ymuno â’r corws y tro hwn, sy’n pwysleisio’r cysylltiad cryf fu gan Brifysgol Bangor erioed ag Ynys Môn, a hefyd Côr y Gadeirlan sydd wedi datblygu perthynas gref â’r Adran Gerddoriaeth. Mae’r ymarferion a’r cyngherddau yn hynod fywiog oherwydd yr amrywiaeth fawr o gerddorion sy'n rhan o'r ensemblau yma.

grŵp o bobl yn ymarfer mewn neuadd — Corws Prifysgol Bangor yn ymarfer yn Neuadd Prichard-Jones

Ceir rhagor o fanylion a thocynnau ar wefan Pontio: https://www.pontio.co.uk/online/article/22BUSOChorusNov

Os oes gennych ddiddordeb mewn ymuno â chorws y brifysgol, cysylltwch trwy’r dudalen hon