Bu israddedigion o Brifysgol Bangor yn gweithio mewn partneriaeth ag awdur A Dog Lover's Dream, a oedd yn cydweithio gydag Aur Clogau ar ymgyrch i hyrwyddo gemwaith i berchnogion anifeiliaid anwes ar achlysuron tymhorol.
Mae Natalie Pritchard yn awdur cyfres o lyfrau a cherddi a bu'n cydweithio â chwmni Clogau am y tro cyntaf ar gyfer gemwaith arbennig i Ddydd Sant Ffolant a oedd yn cynnwys breichled swyndlysau, tag cŵn ac un o'i llyfrau, A Dog Lover's Dream.
Mae'r ymgyrchoedd wedi bod yn allweddol yn helpu Natalie i gael y flwyddyn orau hyd yma ers iddi lansio'r cwmni dair blynedd yn ôl.
Rhoddwyd Natalie mewn cysylltiad ag Alix Charnley o dîm cyflogadwyedd y brifysgol i gael cymorth gyda hyrwyddo'r cynnyrch cyntaf ar gyfer Dydd Sant Ffolant, a bu'n gweithio gyda myfyrwyr i greu fideo.
Diolch i'r project gwerthwyd y stoc cyntaf o 200 ar y penwythnos cyntaf, gyda 250 arall yn cael eu gwerthu wedi hynny. Roedd y fenter ar y cyd mor boblogaidd fel bod Prifysgol Bangor, A Dog Lover's Dream a Chlogau wedi gweithio gyda'i gilydd ar fideos at y dyfodol.
Dywedodd Natalie, o A Dog Lover's Dream: “Roedd y fideos hyrwyddo a gynhyrchwyd gan y myfyrwyr yn wych! Roedd y gefnogaeth gan Brifysgol Bangor yn werthfawr iawn a byddwn yn argymell yr adnodd hwn i berchnogion busnes eraill.
“Roedd y myfyrwyr yn broffesiynol iawn ac roedd ganddyn nhw syniadau gwych. Roeddent yn greadigol a threfnus iawn ac roedd eu craffter busnes yn ardderchog hefyd.
“Yn sgil casgliad poblogaidd Sant Ffolant, gwnaethom fwy na dyblu'r stoc oedd ar gael at ymgyrch y Nadolig i 1,000 - a gwerthwyd y cwbl bron yn syth.”
Fel rhan o'r cydweithio, rhoddwyd £6,000 i'r Ymddiriedolaeth Cŵn. Mae'r tri phartner yn bwriadu cynnal ymgyrchoedd yn y dyfodol hefyd.
Meddai Hannah Grimston, a raddiodd mewn Astudiaethau Creadigol ac a fu'n gweithio ar y delweddau gweledol: “Roedd y project cyfan yn gymaint o hwyl. Ar ôl cwblhau fy ngradd Meistr, rwy'n gwybod y gallaf ei ddefnyddio fel pwynt cyswllt i gael profiad. Bydd cael y deunydd yn barod yn fy mhortffolio yn ddechrau da wrth wneud cais am swyddi creu cynnwys.”
Dywedodd Byron Dean, a raddiodd mewn Astudiaethau'r Cyfryngau gyda Theatr a Pherfformio: “Bu'n brofiad defnyddiol iawn ac enillais sgiliau ymarferol na fyddai gennyf fel arall. Roedd gweithio gyda'r cleient yn ymarferol iawn a mwynheais ddefnyddio'r offer ffilmio. Mae'n bendant wedi fy helpu ar fy nhaith i fod yn fideograffydd llawrydd."
Gall Prifysgol Bangor weithio gyda busnesau o bob maint ac mewn amrywiaeth o sectorau oherwydd bod y cyrsiau a gynigir mor eang. Mae'r bartneriaeth yn darparu profiadau go iawn i'r myfyrwyr a gall hybu llwyddiant y sefydliadau.
Dywedodd Alix Charnley, rheolwr recriwtio a phrofiad gwaith graddedigion Prifysgol Bangor: “Bu'r projectau'n llwyddiannus oherwydd i'r cyflogwyr gael profiad pwrpasol at eu hanghenion busnes.
“Mae canfod y myfyrwyr iawn sydd eisiau dysgu sgiliau newydd neu ddatblygu'r meddylfryd cywir mewn sector penodol yn hanfodol.
“Mae'n helpu'r cydweithio, yn caniatáu arloesi ac yn rhoi profiad gwerthfawr i bawb sy’n gysylltiedig.
“Mae'r brifysgol yn blaenoriaethu profiad gwaith i'r holl fyfyrwyr i'w cefnogi i baratoi ar gyfer gwaith ar lefel graddedigion, datblygu ymwybyddiaeth fusnes ac ychwanegu gwerth at eu profiad cyffredinol fel myfyrwyr yma ym Mangor."
I weld A Love Note, un o'r fideos a grëwyd gan A Dog Lover's Dream a Phrifysgol Bangor, cliciwch YMA
A Dog Lover's Dream
