Graddau Busnes a Rheolaeth Israddedig

Mae ein graddau Busnes a Rheolaeth yn ymarferol, yn flaenllaw, ac wedi eu cynllunio i dy helpu i sefyll allan. Gan gymysgu damcaniaeth ac ymarfer, cei gyfle i roi dy wybodaeth ar waith drwy astudiaethau achos rhyngweithiol a briffiau byw. O fynd i’r afael â heriau busnes i ddatblygu sgiliau arweinyddiaeth a rheoli pobl, mae ein rhaglenni wedi eu cynllunio i dy baratoi i feddwl yn greadigol, datrys problemau’n effeithiol, arwain yn hyderus ac adeiladu dyfodol llawn posibiliadau.

Tyrd i feithrin y sgiliau y mae cyflogwyr yn chwilio amdanynt, o feddwl yn strategol a dangos deallusrwydd emosiynol, i reoli timau'n effeithiol, rhwydweithio a mentergarwch. Bydd ein Clinig Busnes pwrpasol yn darparu amrywiaeth o gyfleoedd i ymgysylltu ag arweinwyr busnes go iawn yn ystod dy astudiaethau trwy ddarlithoedd gwadd, gweithdai a mwy.

Rydym yn canolbwyntio ar ddarparu’r offer i ti lwyddo gan sicrhau bod dy ddysgu'n berthnasol, yn gysylltiedig â'r byd go iawn, ac yn llawn cyfleoedd. Gyda mentora a chefnogaeth i ddatblygu dy syniadau busnes dy hun, Prifysgol Bangor yw'r lle i roi dy ddyfodol ar waith.

Yn fwy na darlithoedd a gwerslyfrau, mae dysgu ym Mhrifysgol Bangor yn mynd y tu hwnt i'r ystafell ddosbarth. Bydd cyfleoedd i gymryd rhan mewn cystadlaethau cenedlaethol megis Her Fusnes IBM a chymryd rhan mewn projectau menter gymdeithasol drwy ein rhaglen Enactus. Cei gyfle i ennill profiad ymarferol a fydd yn meithrin dy hyder, a chael rhyddid i lunio dy ddysgu o amgylch dy uchelgais i’r dyfodol.

Mae gradd Busnes a Rheolaeth o Brifysgol Bangor yn rhoi dealltwriaeth gadarn i ti o sut mae sefydliadau'n gweithredu mewn amgylchedd byd-eang. O arweinyddiaeth a strategaeth i farchnata, adnoddau dynol ac arloesedd, byddi di’n meithrin y sgiliau i addasu, rheoli a meddwl fel entrepreneur. Tyrd i ymuno ag Ysgol Fusnes sy'n canolbwyntio ar y dyfodol ac sydd wedi'i chynllunio i dy helpu i ffynnu mewn unrhyw leoliad busnes.

Perthyn. Mi fyddi di’n teimlo dy fod yn perthyn o'r eiliad y byddi’n cyrraedd. Y ffordd mae pobl yn dy gyfarch. Y croeso cynnes a'r gefnogaeth go iawn y byddi yn ei chael. Mae ein staff yn cymryd yr amser i ddod i dy adnabod ac i adnabod dy ddyheadau, gan gynnig cefnogaeth un-i-un drwy gydol dy siwrnai. Gyda pholisi drws agored a sesiynau galw heibio rheolaidd, mae'n hawdd cysylltu â darlithwyr a chael yr arweiniad sydd ei angen arnat. Mae ein timau cymorth estynedig yma i helpu gyda phopeth, o gyllid a thai, i iechyd a llesiant, gan sicrhau dy fod â phopeth sydd ei angen arnat i ffynnu.