Prosiectau
Hanes a Diwylliant
Yr Athro Nathan Abrams Dathlu Hanes Iddewig Gogledd Cymru a Theulu Pollecoff
Mewn partneriaeth â Varcity (datblygwyr Tŷ Pollecoff), Menter Fachwen a’r Project Darganfod, cynhaliwyd dadansoddiad manwl o’r teulu Pollecoff er mwyn codi ymwybyddiaeth o hanes Iddewig yng Nghymru ac i hybu a phwysleisio cyfraniad Iddewon i hanes y gymuned ehangach. Cafwyd arddangosfa yn Niwrnod Cymunedol y Brifysgol ym mis Hydref.
“Rydym wedi dechrau codi ymwybyddiaeth o effaith y teulu Pollecoff ar Fangor a thu hwnt gan arwain at lawer o adborth cadarnhaol” (Yr Athro Nathan Abrams, Athro mewn Ffilm).
Hinsawdd
Dr Marcel Ferrand Project GwaithGwyrdd Myfyrwyr Rhyngwladol
Trefnwyd y project gan y Swyddfa Cefnogi Myfyrwyr Rhyngwladol a daeth â thros 50 o fyfyrwyr, aelodau o’r gymuned leol ac Ymddiriedolaeth Natur Gogledd Cymru ynghyd trwy weithgareddau amgylcheddol yn cynnwys Glanhau Traeth ym Mhen Llŷn a Diwrnod Bywyd Gwyllt Morol ar Ynys Môn.
“Roedd yn gyfle gwych i fyfyrwyr newid eu hamserlen ddyddiol a chychwyn ar anturiaethau cyffrous ym myd natur. Roedd yr un mor gyffrous i staff ac i wirfoddolwyr yr Ymddiriedolaeth, a dreuliodd y diwrnod gyda phobl o bob rhan o’r byd yn dysgu am eu diwylliannau, eu ffyrdd o fyw mewn modd cynaliadwy ac yn adeiladu pontydd cymunedol i ofalu’n am ein planed” (Dr Marcel Clusa Ferrand, Rheolwr Cefnogi Myfyrwyr).
Natalie Chivers Ymarferydd Garddwriaethol Therapiwtig
Galluogodd y Gronfa Gymunedol staff i gomisiynu Ymarferydd Garddwriaethol Therapiwtig a oedd, mewn partneriaeth â Chyfeillion Gardd Fotaneg Treborth, yn gallu cefnogi’r grŵp cymunedol rheolaidd a chroesawu gwirfoddolwyr newydd o gefndiroedd amrywiol. Mae'r cyllid wedi cynyddu capasiti yn aruthrol ac wedi galluogi staff i ymgysylltu â mwy o aelodau o'r gymuned.
“Trwy’r project hwn rydym hefyd wedi gallu croesawu rhai gwirfoddolwyr yn ôl a gafodd drafferthion trwy’r pandemig gyda heriau personol amrywiol. Yn ogystal, mae’r cyllid hwn wedi ein galluogi i ddefnyddio’r project i wneud cais am gefnogaeth bellach, a dyfarnwyd £2200 i ni gan HEFCW i barhau â’n sesiynau dydd Gwener hyd y gellir rhagweld” (Natalie Chivers, Curadur Gardd Fotaneg Treborth).
Iechyd
Dr Louise Prendergast Cynhadledd Gofal Lliniarol a Diwedd Oes
Mewn cydweithrediad â Compassionate Cymru Garedig, Mantell Gwynedd a’r Ysgol Gwyddorau Meddygol ac Iechyd, cynhaliwyd cynhadledd yn Neuadd Reichel i archwilio syniadau a safbwyntiau unigolion sydd â diddordeb mewn materion gofal lliniarol a diwedd oes, ac y mae hynny’n effeithio arnynt.
“Rwy’n gwneud cais am gyllid ar gyfer cymrodoriaeth Ymchwil Iechyd a Gofal Cymru yn dilyn y gweithdy hwn, ac rwy’n gobeithio cynnal digwyddiad ymgysylltu cymunedol arall yn fuan, gan fy mod wedi fy mhlesio’n fawr gan faint o ddiddordeb oedd yn y maes hwn” (Dr Louise Prendergast, Swyddog Ymchwil).
Wendy Roberts Podlediad Gofal Cymdeithasol a Lles
Dan arweiniad Darlithydd mewn Gwaith Cymdeithasol, ariannodd y Gronfa Gymunedol y gwaith o gynhyrchu pedwar podlediad Cymraeg yn rhoi sylw i ofal cymdeithasol a lles yng Nghymru, pwysigrwydd gofal dwyieithog, a sut mae cwrs MA Gwaith Cymdeithasol y Brifysgol o fudd ac yn cefnogi elusennau lleol, cynghorau ac asiantaethau trydydd sector.
“Mae’r podlediad wedi cynnig cyfle i ni greu a chryfhau cysylltiadau gydag asiantaethau partner, ac mae wedi cynnig cyfle nid yn unig i ni godi proffil y gwahanol asiantaethau, ond hefyd amlygu a thrafod rhai o’r heriau cymdeithasol yr ydym yn eu hwynebu mewn cymdeithas heddiw” (Wendy Roberts, Darlithydd mewn Gwaith Cymdeithasol)
Sgiliau
Ben Roberts Gweithdy adeiladu cyfrifiadur
Trefnodd a chynhaliodd tîm M-SParc #ArYLon Pwllheli weithdy diwrnod llawn ar gyfer 10 o fyfyrwyr TGAU lleol mewn cydweithrediad â North Wales Recycle I.T. ym mis Medi. Rhoddwyd cyfle i'r myfyrwyr ddatgymalu ac ailadeiladu cyfrifiadur personol a'u gwobrwyo drwy adael iddynt fynd â'r cyfrifiadur adref ar ddiwedd y dydd.
“Does gen i ddim cyfrifiadur gartref, mae hyn wir yn mynd i fy helpu gyda fy ngwaith ysgol” (myfyriwr lleol)
“Yr hyn a’m trawodd fwyaf oedd pa mor ddiwyd yr oedd y bobl ifanc yn gweithio drwy’r dydd, yn gwrando ac yn dysgu, ac yn cymryd y cyfle o ddifrif” (Ben Roberts, Swyddog Project Digidol a Rheolwr Ar y Lôn)
Chwaraeon
Dr Julian Owen Risg Anafiadau mewn Rygbi Merched Ieuenctid ar Lawr Gwlad
Fel rhan o’r project ymchwil a ariannwyd gan Rygbi’r Byd i archwilio risg anafiadau, ymgysylltodd staff yr Ysgol Seicoleg a Gwyddor Chwaraeon â thua 300 o chwaraewyr rygbi benywaidd ar draws naw canolfan merched Undeb Rygbi Cymru yng ngogledd Cymru a chomisiynu ffilm ddwyieithog i ddal ysbryd rygbi ieuenctid merched yn y rhanbarth. Y project dilynol sy’n deillio o’r cydweithio hwn fydd project Monitro Anafiadau mewn Rygbi Ieuenctid Merched Cymru (WISGYR) a ariennir gan Rygbi’r Byd. =
“Mae’r mewnwelediadau a gafwyd o’r ymgysylltu hwn yn cynnwys pwysigrwydd dulliau unigol o ddatblygu cysylltiadau â chanolfannau a phwysigrwydd ymgysylltu parhaus trwy ein project ymchwil” (Dr Julian Owen, Darlithydd mewn Gwyddorau Chwaraeon ac Ymarfer).
Chris Roberts Project Rhyddid Pêl-droed 2023
Gan adeiladu ar y bartneriaeth rhwng Prifysgol Bangor a Dreigiau gogledd Cymru, ac fel rhan o Wythnos Ffoaduriaid 2023, croesawodd y tîm 35 o ddinasyddion wedi’u dadleoli o ardal Manceinion ym mis Mehefin, a hwyluso diwrnod o bêl-droed ar Faes Pêl-droed 4G y Brifysgol. Cyfle i rannu profiadau diwylliannol, hyfrydwch Gogledd Cymru i gyd trwy gyfrwng y pêl-droed; cafodd pawb ddiwrnod gwych!
“Roedd y natur yn anhygoel, môr un ochr, caeau gwyrdd yr ochr arall gyda defaid a gwartheg. Roedd y brifysgol, y lletygarwch a’r meysydd pêl-droed yn gofiadwy a dysgais lawer am Brifysgol Bangor, ei diwylliant, ei hiaith a’i hanes. Mi wnes i ei fwynhau, a newidiodd fy hwyliau. Roeddwn i angen mynd ar daith fer” (Mahin - ymwelydd)
“Roedd digwyddiad dydd Gwener yn gyfle gwych i rannu addysg ac ymwybyddiaeth ddiwylliannol a chreu gofod ar gyfer trafod cyfleoedd addysgiadol a chyflogaeth. Roedd yn brofiad iachusol i lawer a ddaeth o hyd i gyfeillgarwch a phartneriaethau newydd” (Chris Roberts, Peiriannydd, Gwasanaethau Campws)
Sar Furlong & Cerys Gadd Gemau'r Ynysoedd 2023
Cefnogodd y Gronfa Gymunedol ddau aelod o staff y Gwasanaethau Proffesiynol pan aethant i Guernsey ym mis Gorffennaf a chynrychioli Ynys Môn yng Ngemau Rhyngwladol Pêl-droed Merched 2023 NatWest. Rhoddodd Cymdeithas Bêl-droed Cymru glod i’r tîm am chwarae yng nghit swyddogol Cymru a denodd y digwyddiad lawer o sylw ar y cyfryngau cymdeithasol.
“Diolch am helpu i wneud hyn yn bosibl” (Cerys Gadd, Gweinyddu Myfyrwyr).
Plant a Phobl Ifanc
Nia Young & Dr Beth Edwards Presenoldeb ar y Stryd Fawr i Blant a Phobl Ifanc yng Nghanol Dinas Bangor
Nod ymarfer cwmpasu a oedd yn cynnwys ymgynghoriadau cymunedol, holiaduron ac Uwchgynhadledd Ieuenctid ar Iechyd Meddwl a Lles a gynhaliwyd yn y Brifysgol ym mis Tachwedd, oedd archwilio anghenion Plant a Phobl Ifanc yn yr ardal leol. Arweiniwyd y project gan gydweithwyr yn yr Ysgol Addysg a’r Gwasanaeth Gyrfaoedd a Chyflogadwyedd a chyfrannodd dros 100 o bobl ifanc at wahanol ddigwyddiadau ymgysylltu yn ystod y project.
“Mae’r gwaith o gysylltu â Phrifysgol y Plant eisoes ar y gweill a gobeithiwn barhau â’r gweithgareddau hyn er mwyn cael tystiolaeth bellach i gefnogi cyllid ychwanegol i’r project." (Dr Beth Edwards, Cydlynydd Datblygu Addysg Fenter)
Dr Ruth Elliott Adeiladu ar y cydweithio gyda Llenyddiaeth Cymru a Llais Dyslecsia
Dan arweiniad yr Ysgol Gwyddorau Dynol ac Ymddygiadol, helpodd y Gronfa Gymunedol i ariannu project a oedd yn adeiladu ar y cydweithio presennol gyda Llenyddiaeth Cymru a Llais Dyslecsia, a chasglu profiadau plant ac oedolion sy’n byw gyda dyslecsia yn y gymuned ehangach, yn enwedig yn y Gymraeg.
“Rydym yn aros am gadarnhad o gyllid pellach a fydd yn ein galluogi i weithio gyda disgyblion ysgol ag anawsterau niwroamrywiol a llythrennedd trwy gyfrwng y celfyddydau (Dr Ruth Elliott, Tiwtor Sgiliau Astudio Arbenigol)”.
Projectau sydd i'w cwblhau yn 2024
- Arweinir gan Dr Emily Holmes (Ysgol Feddygol Gogledd Cymru):Digwyddiad ymgysylltu â rhanddeiliaid i hyrwyddo, cynllunio a gweithredu Teithio Llesol yng ngogledd Cymru ar y cyd â Chonsortiwm Ymchwil Teithio Llesol Cymru.
- Arweinir gan Dr Rob Elias (Y Ganolfan Biogyfansoddion) Datblygu fideo hyrwyddo byr a chynnal digwyddiad ar y cyd â mudiad Hwylio Treftadaeth y Fenai sydd ar hyn o bryd yn cynnig cyfle i aelodau o'r gymuned leol â chyflyrau iechyd penodol fordwyo'r Fenai ar eu fflyd o gychod.
- Arweinir gan yr Athro Zoe Skoulding (Ysgol Iaith, Diwylliant a’r Celfyddydau): Ar y cyd â Llenyddiaeth Cymru, bydd cyllid yn caniatáu i grwpiau o fyfyrwyr chweched dosbarth lleol gymryd rhan mewn cyfres o ddosbarthiadau meistr Llenyddiaeth Saesneg a chreadigol a’u cyflwyno i ffyrdd y gall ysgrifennu creadigol gefnogi lles personol ac amgylcheddol.
- Arweinir gan yr Athro Raluca Radulescu (Ysgol Iaith, Diwylliant a’r Celfyddydau): Ar y cyd â Gwynedd Greadigol, storïwr lleol ac Artist Cain i wella mwynhad ac ansawdd bywyd trwy ymgysylltu diwylliannol i Grŵp Dementia lleol.
- Arweinir gan yr Athro John Parkinson (Ysgol Seicoleg a Gwyddor Chwaraeon): Ar y cyd â Pharc Cenedlaethol Eryri, bydd cyllid yn cefnogi plant ysgol lleol i ddatblygu caeau ar gyfer cynigion gweithredu ar y newid yn yr hinsawdd ac ymgyrch hyrwyddo i baratoi at Uwchgynhadledd Ieuenctid (COPA 1) i’w chynnal ar Yr Wyddfa yn ddiweddarach eleni.
- Arweinir gan Donna Dixon (Ysgol Addysg): Cyllid i ddatblygu a chynhyrchu ffilm fer a fydd yn amlygu’r heriau a’r cyfleoedd yn y dirwedd ddigidol a fydd yn ymddangos am y tro cyntaf yn Eisteddfod Genedlaethol yr Urdd 2024 a’r Uwchgynhadledd Ieuenctid yn Pontio’n ddiweddarach eleni.
- Arweinir gan yr Athro Stephen Doughty (Ysgol Feddygol Gogledd Cymru): Cyfres o ddigwyddiadau i randdeiliaid cymunedol i'w cynnal ledled y rhanbarth ar y cyd â Bwrdd Iechyd Prifysgol Betsi Cadwaladr. Bydd cyllid yn ymgysylltu â Chleifion, Fferyllwyr Ysbytai a'r Gymuned ac Ymarferwyr Gofal Cychwynnol i gyfrannu at ddatblygu darpariaeth Fferylliaeth newydd ym Mhrifysgol Bangor.