Mae Prifysgol Bangor yn falch o gael cyn-fyfyrwyr ym mhob cwr o'r byd sy'n parhau i gymryd diddordeb yn eu alma mater ar ôl gadael y Brifysgol.
I lawer, mae Prifysgol Bangor wedi gwneud gwahaniaeth sylweddol i'w bywydau proffesiynol a phersonol ac mae ganddynt ddyhead i ddod â Bangoriaid eraill ynghyd a meithrin ewyllys da tuag at y Brifysgol. Mae'r alumni sy'n gwirfoddoli fel arfer yn gyn-fyfyrwyr sydd wedi cadw mewn cysylltiad gyda ni ac sy'n rhannu diddordeb yn nhwf proffil y Brifysgol fel sefydliad o safon fyd-eang, ac mae'r Swyddfa Datblygu a Chysylltiadau Alumni (DARO) yma i gynnig cefnogaeth i'r gwirfoddolwyr hynny sy'n dymuno rhoi rhywbeth yn ôl i Fangor.
Mae digwyddiadau a gweithgareddau a drefnir gan wirfoddolwyr yn fodd o feithrin perthynas fyw gyda llawer mwy o alumni na fyddai'n bosibl fel arall drwy weithgareddau dan arweiniad DARO yn unig. Gofynnir i wirfoddolwyr fod yn llysgenhadon ac yn gyfathrebwyr brwdfrydig dros genhadaeth a gweledigaeth Bangor ac mae amryw o ffyrdd y gall alumni helpu i gefnogi Prifysgol Bangor. Mae cyn-fyfyrwyr sy'n gwirfoddoli wedi helpu'r Brifysgol drwy weithgareddau megis:
- trefnu a chynorthwyo mewn aduniadau a digwyddiadau
- cefnogi myfyrwyr trwy roi sgyrsiau am yrfaoedd, rhoi cyngor ar CVs / ceisiadau swydd etc.
- helpu’r Brifysgol i ail-gysylltu ag alumni eraill
- darparu proffiliau alumni
- cefnogi ymchwil yn y Brifysgol drwy gysylltiadau busnes
- sefydlu grwpiau alumni newydd yn eu hardal
- cynorthwyo gyda gweithgareddau recriwtio myfyrwyr (ffeiriau gyrfaoedd etc.)
Y Bwrdd Ymgynghorol Alumni a'r Bwrdd Datblygu yw'r ddau fudiad gwirfoddoli sy'n gysylltiedig â Swyddfa Datblygu a Chysylltiadau Alumni Bangor.