Cyngor ar gyfer y Diwrnod Canlyniadau a Chlirio 2024

Os yw eich lle yn y brifysgol yn dibynnu ar fodloni gofynion eich cynnig amodol, gellwch wirio statws eich cais UCAS i weld beth yn union yw’r sefyllfa o 8.00am ymlaen ar Ddiwrnod Canlyniadau Lefel A (Dydd Iau, 18 Awst). Os ydych wedi cael eich derbyn am le, bydd statws eich cais yn dangos eich bod wedi cael eich derbyn yn gadarn - bydd yn nodi os yw'r lle ym mhrifysgol eich dewis cadarn neu eich dewis yswiriant yn ogystal â dangos ar ba gwrs rydych wedi cael eich derbyn.

Peidiwch â chynhyrfu! Os na chawsoch y graddau roeddech yn gobeithio eu cael ac na wnaethoch lwyddo i gael lle yn eich Dewis Cadarn na’ch Dewis Yswiriant, peidiwch â phoeni - byddwch yn cael eich gosod yn awtomatig yn y system Glirio. Bydd statws eich cais yn dangos eich bod yn y system Glirio ac yn rhoi rhif Clirio i chi. Yna byddwch yn gallu dechrau chwilio am le trwy’r system Glirio. Bydd gwefan UCAS yn dangos pa gyrsiau sydd â lleoedd Clirio ar gael a dylech gysylltu â'r brifysgol/prifysgolion dan sylw i drafod eich opsiynau. Peidiwch â dewis prifysgol fel eich dewis Clirio cyn siarad â'r brifysgol yn gyntaf.

Unwaith y byddwch yn y system Glirio, dylech gysylltu â phrifysgolion i drafod eich opsiynau. Bydd y chwiliad cyrsiau ar wefan UCAS yn dangos i chi pa gyrsiau sydd yn cynnig lleoedd Clirio, a bydd y rhan fwyaf o brifysgolion yn cynnig gwybodaeth am gyrsiau sydd ar gael trwy’r system Glirio ar eu gwefannau. Efallai y byddwch yn dymuno ystyried cyrsiau sy'n wahanol i'r rhai y gwnaethoch gais amdanynt yn wreiddiol, ac efallai y bydd angen i chi ystyried prifysgolion gwahanol i'r rhai yr oeddech wedi'u gosod yn wreiddiol ar eich rhestr fer.

Pan fyddwch yn cysylltu â phrifysgol unigol, gwnewch yn siŵr bod gennych y wybodaeth berthnasol wrth law, gan gynnwys eich rhif adnabod UCAS personol, y rhif Clirio, cyfeiriad e-bost a rhif(au) ffôn cyswllt. Gofynnir i chi hefyd am eich canlyniadau Lefel A, neu gymwysterau cyfwerth fel BTEC, yn ogystal ag unrhyw ganlyniadau TGAU perthnasol. 

Os bydd prifysgol yn cynnig lle i chi drwy'r system Glirio, gallwch dderbyn y cynnig hwnnw drwy ddewis y brifysgol honno fel eich Dewis Clirio. Gellwch gysylltu â chymaint o brifysgolion ag y dymunwch i holi am leoedd ar gyrsiau, ond dim ond un cynnig Clirio y gellwch ei dderbyn. 

Felly, os bydd mwy nag un prifysgol yn rhoi cynnig Clirio i chi dros y ffôn/trwy e-bost, bydd angen i chi ystyried pa un yw'r opsiwn gorau i chi. Peidiwch â rhuthro eich penderfyniad - edrychwch ar wefan y brifysgol, neu ffoniwch yn ôl am sgwrs ddilynol os ydych wedi anghofio gofyn am gyfle i ymweld, y trefniadau llety ar gyfer ymgeiswyr Clirio, etc. 
 

Unwaith y byddwch wedi penderfynu pa gynnig Clirio yr hoffech ei dderbyn, ewch i'r adran 'Eich dewisiadau' yn eich cais UCAS a chlicio 'Ychwanegu dewis Clirio'. Dim ond ar ôl ichi siarad â’r brifysgol ac iddynt eich sicrhau eu bod yn gallu cynnig lle Clirio i chi ar y cwrs dan sylw y dylech ychwanegu enw’r brifysgol fel eich dewis Clirio. 

Pan fyddwch wedi penderfynu pa gwrs a phrifysgol yr hoffech eu dewis drwy'r system Glirio, yna cliciwch 'Ychwanegu dewis Clirio'. Yna bydd angen ichi ychwanegu manylion y cwrs (gwnewch yn siŵr bod gennych y teitl a’r cod cwrs cywir) yn ogystal ag enw’r Brifysgol a’r cod UCAS. 

Cofiwch, dim ond un dewis Clirio y gellwch ei ychwanegu ar y tro ac mae ychwanegu cwrs a phrifysgol benodol yn golygu eich bod yn bendant yn derbyn y cynnig Clirio hwnnw. Felly, os bydd y brifysgol wedi hynny yn cadarnhau'r lle, bydd yn ymddangos wedyn fel derbyniad ar eich tudalen 'dewisiadau' yn eich cais UCAS.

Ond, os na fydd y brifysgol yn cadarnhau'r lle Clirio hwnnw, byddwch yn gallu ychwanegu dewis Clirio arall. 

Os dewiswch Brifysgol Bangor trwy'r system Glirio, dyma beth fydd yn digwydd nesaf:

• Ar ôl ichi ychwanegu Bangor fel eich dewis Clirio, bydd ein tîm derbyniadau yn cynnal gwiriadau. Felly peidiwch â phoeni os na fydd diweddariad yn ymddangos ar system UCAS ar unwaith - mae'n adeg brysur o'r flwyddyn felly mae'r broses yn cymryd ychydig o amser. Bydd eich lle Clirio gyda ni wedi ei neilltuo ar eich cyfer, a bydd ein tîm Derbyniadau yn cadarnhau eich dewis Clirio cyn gynted ag y bo modd. 
• Unwaith y bydd eich lle ym Mangor wedi'i gadarnhau, bydd yn ymddangos fel derbyniad ar dudalen 'Eich dewisiadau' yn eich cais UCAS, a byddwn hefyd yn anfon e-bost atoch i roi gwybod i chi.
• Tua 24-48 awr yn dilyn hynny, byddwn yn anfon e-bost atoch gyda chyswllt i'n system archebu llety er mwyn ichi allu dewis ystafell mewn neuadd breswyl. Rydym yn gwarantu ystafell yn un o’r neuaddau preswyl i bawb sy'n derbyn lle drwy'r system Glirio ac sy'n gwneud cais am lety cyn y dyddiad cau.