Os wyt ti’n ystyried astudio trwy gyfrwng y Gymraeg a byw mewn cymuned wirioneddol ddwyieithog, Prifysgol Bangor yw’r lle i chdi. Mae dewis astudio drwy’r Gymraeg yn gam positif sy’n siapio dy brofiad academaidd, dy ragolygon gyrfa, a dy dwf personol. Os wyt ti'n siaradwr rhugl neu'n ddysgwr, mae'r Diwrnod Agored yn gyfle perffaith i ddod i wybod beth all astudio trwy gyfrwng y Gymraeg ei olygu i chdi.
PAM ASTUDIO DRWY'R GYMRAEG?
Mae astudio trwy gyfrwng y Gymraeg yn cynnig profiad dysgu mwy personol. Mae dosbarthiadau llai yn golygu mwy o gyfleoedd i gyfrannu a chysylltu â darlithwyr a chyd-fyfyrwyr. Mae hefyd yn rhoi sylfaen ardderchog i dy yrfa - mae galw mawr am weithwyr dwyieithog ledled Cymru, ac mae astudio trwy gyfrwng y Gymraeg yn dy baratoi i gamu ymlaen i'r byd gwaith gyda hyder.
Cefnogaeth Ariannol Am Astudio Drwy'r Gymraeg
- £1,000 Prif Ysgoloriaeth Coleg Cymraeg Cenedlaethol – ar gyfer myfyrwyr sy'n astudio 80 credyd y flwyddyn trwy gyfrwng y Gymraeg. (rhaid sefyll arholiad mynediad Bangor).
- £500 Ysgoloriaeth Cymhelliant y Coleg Cymraeg Cenedlaethol – ar gyfer y rhai sy'n astudio 40 credyd y flwyddyn.
- £250 Bwrsari Cymraeg – hefyd ar gyfer 40 credyd y flwyddyn a gellir ei gyfuno gyda'r uchod.
BETH I'W DDISGWYL YN Y DIWRNOD AGORED
Mae'r Diwrnod Agored wedi'i gynllunio i roi blas go iawn o sut beth yw astudio trwy gyfrwng y Gymraeg yma. Dyma beth sydd ar gael.
Sesiwn Croeso i’r Cymry
Tyrd draw am goffi, cacen a sgwrs yn Siambr y Cyngor (Prif Adeilad) rhwng 1.15–2.00pm i glywed am astudio trwy gyfrwng y Gymraeg a chyfarfod staff a myfyrwyr.
Taith o Neuadd JMJ
Ar ôl y Sesiwn Groeso, bydd taith wedi ei thywys o Neuadd JMJ, y neuadd breswyl benodol i siaradwyr Cymraeg.
Stondin yn y Neuadd Arddangos
Bydd staff o Ganolfan Bedwyr a'r Coleg Cymraeg Cenedlaethol ar gael trwy'r dydd i ateb dy gwestiynau.
Sgwrsio Gyda Myfyrwyr
Bydd llysgenhadon myfyrwyr wrth law i rannu eu profiadau ac ateb dy gwestiynau.
Cefnogaeth i Fyfyrwyr
Mae Prifysgol Bangor yn falch o gynnig mwy o fodiwlau a chyrsiau trwy gyfrwng y Gymraeg nag unrhyw brifysgol arall yng Nghymru ac mae'n cael ei chydnabod am ei gwasanaethau dwyieithog a'i chefnogaeth i fyfyrwyr.
Mae Canolfan Bedwyr yn cynnig cymorth gyda gwaith ysgrifennu academaidd, cyflwyniadau, a pharatoi ar gyfer Tystysgrif Sgiliau Iaith Coleg Cymraeg Cenedlaethol.
O gyngor ariannol i gwnsela, mae'r holl wasanaethau myfyrwyr ar gael yn Gymraeg.
Cei ymuno â gweithgareddau Undeb Myfyrwyr Cymraeg Bangor (UMCB), a chymryd rhan mewn corau, clybiau chwaraeon, cymdeithasau llenyddol, a mwy.
Mae cyrsiau iaith Gymraeg am ddim ar gael i'r rhai sydd eisiau dysgu neu wella eu sgiliau.
Lleisiau Myfyrwyr
Wyt ti eisiau clywed gan y rhai sydd wedi astudio drwy'r Gymraeg? Mae'r gyfres 'Bangor Be Wedyn?' yn cynnwys sgyrsiau gyda chyn-fyfyrwyr am eu profiadau nhw o astudio trwy gyfrwng y Gymraeg a sut mae hynny wedi agor drysau yn eu gyrfaoedd. Mae eu straeon yn ysbrydoli ac yn ffordd wych o ddeall effaith go iawn addysg trwy gyfrwng y Gymraeg.