Ysgoloriaethau, Efrydiaethau a Bwrsariaethau

Mae’n bleser gan Brifysgol Bangor gynnig efrydiaethau ymchwil Ysgol Graddedigion Gwyddorau Cymdeithas Cymru (WGSSS) (ESRC DTP) a ariennir yn llawn, gan ddechrau ym mis Hydref 2024 ym meysydd pwnc y llwybrau canlynol.

1. Dwyieithrwydd/Ieithyddiaeth
2. Seicoleg
3. Gwyddorau Chwaraeon ac Ymarfer
4. Troseddeg a’r Gyfraith
5. Astudiaethau Cymdeithaseg/Gwyddoniaeth a Thechnoleg
6. Gwyddor Data, Iechyd a Lles
7. Addysg
8. Gwaith Cymdeithasol, Gofal Cymdeithasol a Pholisi Cymdeithasol
9. Economeg
10. Rheolaeth a Busnes
11. Cynllunio amgylcheddol

Hyd yr astudiaeth:

Mae hyd yr astudiaeth yn dibynnu ar brofiad ymchwil blaenorol ac anghenion hyfforddi a fydd yn cael eu hasesu trwy gwblhau Dadansoddiad Anghenion Datblygu Cychwynnol ar y cam ymgeisio a Dadansoddiad Anghenion Datblygu Llawn cyn dyfarnu os yn llwyddiannus.

Gall hyd yr astudiaeth amrywio o - 3.5 i 4.5 blwyddyn llawn amser  (neu’r hyn sy’n cyfateb yn rhan amser).

Gall hyn gynnwys:

- rhaglen 1+3.5 – cefnogaeth ar gyfer meistr hyfforddiant ymchwil a PhD, yn enwedig lle nodir hynny gan nodau cydraddoldeb, amrywiaeth a chynhwysiant ac Ehangu Cyfranogiad Ysgol Graddedigion Gwyddorau Cymdeithas Cymru

- yn achos Economeg, rhaglen 2+2.5 – cyllid i dalu am radd meistr estynedig, ac yna rhaglen PhD fyrrach

Lleoliad ymchwil mewn ymarfer: 

Mae'n ofynnol i bob myfyriwr a ariennir gan Ysgol Graddedigion Gwyddorau Cymdeithas Cymru gwblhau lleoliad ymchwil mewn ymarfer a ariennir dros gyfanswm o dri mis. Bydd pob myfyriwr yn cael y cyfle i gwblhau lleoliad mewn sefydliadau academaidd, polisi, busnes neu gymdeithas sifil.

Meini Prawf Mynediad:

I dderbyn cyllid efrydiaeth Ysgol Graddedigion Gwyddorau Cymdeithas Cymru, rhaid bod gennych gymwysterau neu brofiad sy'n cyfateb i radd anrhydedd ar lefel dosbarth cyntaf neu ail ddosbarth uwch, neu radd meistr o sefydliad ymchwil academaidd yn y Deyrnas Unedig. Mae croeso hefyd i fyfyrwyr â chefndir academaidd anhraddodiadol wneud cais.

Dylai ysgolion gynnwys gofynion iaith Saesneg sy'n benodol i'r sefydliad

Cymhwysedd:

Mae ysgoloriaethau ymchwil Ysgol Graddedigion Gwyddorau Cymdeithas Cymru ar gael i fyfyrwyr cartref a myfyrwyr rhyngwladol. Gall hyd at 30% o'n carfan gynnwys myfyrwyr rhyngwladol. Ni chodir y gwahaniaeth mewn ffioedd rhwng y gyfradd Deyrnas Unedig a’r gyfradd ryngwladol ar fyfyrwyr rhyngwladol. Dylai ymgeiswyr fodloni gofynion mynediad UKRI.

Mae Ysgol Graddedigion Gwyddorau Cymdeithas Cymru wedi ymrwymo i gefnogi a hyrwyddo cydraddoldeb ac amrywiaeth ac i greu amgylchedd gwaith cynhwysol i bawb. Rydym yn croesawu ceisiadau gan holl aelodau o’r gymuned fyd-eang, waeth beth fo’u hoedran, anabledd, rhyw, hunaniaeth rhywedd, ailbennu rhywedd, statws priodasol neu bartneriaeth sifil, beichiogrwydd neu famolaeth, hil, crefydd neu gred a chyfeiriadedd rhywiol.

Rydym yn croesawu ceisiadau ar gyfer astudiaethau amser llawn a rhan-amser.

Asesu:

Atgoffir ymgeiswyr i gyflwyno'r holl ddogfennau perthnasol (trawsgrifiadau, datganiad ategol, ac ati) erbyn y dyddiad cau. Oherwydd nifer y ceisiadau a dderbynnir, ni fydd ceisiadau anghyflawn yn cael eu hystyried.

Gwahoddir ymgeiswyr a roddir ar y rhestr fer am gyfweliad. Fel rhan o'r broses gyfweld, gofynnir i ymgeiswyr roi cyflwyniad byr ac ateb cyfres o gwestiynau gan y panel yn gyson ag ymarfer blaenorol ar y llwybr yn ystod Partneriaeth Hyfforddiant Doethurol Cymru, ac a arweinir gan ymrwymiadau cydraddoldeb, amrywiaeth a chynhwysiant Ysgol Graddedigion Gwyddorau Cymdeithas Cymru.

Gellir cynnal cyfweliadau yn y cnawd, ond dylent hefyd fod ar gael trwy Zoom/Teams i bob myfyriwr sy'n dymuno cymryd rhan yn y ffordd honno.

Gall ymgeiswyr ddisgwyl clywed canlyniad eu cyfweliad fel rheol o fewn 3-4 wythnos.

Sut i wneud cais: 

Dylid derbyn ceisiadau ddim hwyrach na 12/1/24 gan gynnwys yr holl ddogfennau gofynnol.

Dylid cyflwyno pob cais gan ddefnyddio’r dolenni canlynol (defnyddiwch y cyfeiriad e-bost cywir ar gyfer y llwybr a gyflwynir i:

Dwyieithrwydd/Ieithyddiaeth – bilingwgsss@bangor.ac.uk

Seicoleg – psychwgsss@bangor.ac.uk

Gwyddorau Chwaraeon ac Ymarfer – spexwgsss@bangor.ac.uk

Troseddeg a'r Gyfraith – crimwgsss@bangor.ac.uk

Astudiaethau Cymdeithaseg/Gwyddoniaeth a Thechnoleg - socwgsss@bangor.ac.uk

Gwyddor Data, Iechyd a Lles – dshwbwgsss@bangor.ac.uk

Addysg eduwgsss@bangor.ac.uk

Gwaith Cymdeithasol, Gofal Cymdeithasol a Pholisi Cymdeithasol – socialworkwgsss@bangor.ac.uk

Economeg - econwgsss@bangor.ac.uk

Rheolaeth a Busnes businesswgsss@bangor.ac.uk

Cynllunio Amgylcheddol envirowgsss@bangor.ac.uk

Dylech gynnwys y dogfennau canlynol gyda'ch cais:

1) Llythyr eglurhaol (hyd at ddwy dudalen)

Rhaid i'r llythyr eglurhaol gynnwys y pwyntiau bwled canlynol fel is-benawdau:

• Nodi eich rhesymau a’ch cymhelliant dros wneud cais i astudio ym Mhrifysgol Bangor, a’r llwybr perthnasol (gweler y llwybrau uchod).
• Rhowch fanylion am eich dealltwriaeth, a'ch disgwyliadau o wneud astudiaeth ddoethurol.
• Rhowch fanylion am eich diddordebau academaidd yn gyffredinol, ac yn arbennig y rhai sy'n gysylltiedig â'r ymchwil arfaethedig.
• Trwy dynnu ar eich cefndir (yn cynnwys eich profiadau bywyd, taith i/drwy'r brifysgol, profiadau gwaith neu wirfoddoli) rhowch grynodeb o pam eich bod yn barod i wneud PhD yn awr a sut y byddwch yn ffynnu o ganlyniad i gyllid PhD. Gallent gynnwys, er enghraifft, heriau personol rydych wedi’u goresgyn neu lwyddiannau rydych yn falch ohonynt yn eich profiadau gwaith, astudio neu fywyd a sut mae’r rhain yn cyd-fynd â’r sgiliau sydd eu hangen i ffynnu mewn rhaglen PhD. Gallai heriau gynnwys, ond heb fod yn gyfyngedig i, nodweddion gwarchodedig, statws economaidd-gymdeithasol a bod yn ddarpar fyfyriwr cenhedlaeth gyntaf neu sydd â phrofiad o fod mewn gofal.
• Gan adfyfyrio ar eich cefndir a/neu agwedd arfaethedig at astudio PhD a’r cyfleoedd y bydd yn eu cyflwyno, sut byddwch yn cefnogi amrywiaeth a chynhwysiant yn y gymuned PhD

2) CV academaidd (hyd at ddwy dudalen)

3) Cynnig ymchwil

Dylai'r cynnig fod hyd at 1000 o eiriau, heb gynnwys cyfeiriadau llyfryddiaethol. Rydym yn awgrymu eich bod yn defnyddio'r pum pennawd canlynol yn eich cynnig ymchwil:

• Teitl, amcanion a phwrpas yr ymchwil;
• Trosolwg byr o’r llenyddiaeth academaidd sy'n berthnasol i'ch maes;
• Cynllun/dulliau arfaethedig;

Efrydiaeth PhD 3 blynedd gyda chyllid llawn
Ysgol Seicoleg a Gwyddor Chwaraeon, Prifysgol Bangor
Dyddiad cau: 31 Mai 2024

Gêm Taflu Bai’n Unllygeidiog: Deall pam rydym yn rhoi’r bai ar eraill am ein camgymeriadau ninnau mewn sefyllfaoedd cydweithredol

Dr. Paul Rauwolf
Dyma wahodd ceisiadau am efrydiaeth PhD 3 blynedd gyda chyllid llawn yn Ysgol Seicoleg a Gwyddor Chwaraeon Prifysgol Bangor. Mae'r efrydiaeth yn talu cost lawn ffioedd dysgu’r myfyriwr PhD, ynghyd â thâl cynhaliaeth (tua £19,237 y flwyddyn am 3 blynedd) yn ogystal â lwfans ymchwil hael. Gall yr efrydiaeth ddechrau unrhyw bryd rhwng mis Hydref 2024 a mis Ionawr 2025, ond 1 Hydref fyddai’r dyddiad dechrau delfrydol.

Y Project:
Ein gallu i gydweithredu â'n gilydd yw un o lwyddiannau esblygiadol a chymdeithasol mwyaf dynolryw. Mae’n caniatáu i grwpiau gyflawni mwy nag y gallent yn unigol. Fodd bynnag, yn aml gall rhyngweithiadau cydweithredol fod yn fregus, a gallant ymddatod yn rhwydd oherwydd camsyniadau. Dengys ymchwil fod unigolion yn cael anhawster neilltuol i gydweithredu ag eraill mewn amgylcheddau ansicr, lle mae'n anodd asesu pwy sydd ar fai am fethu â chydweithredu. Mewn achosion o'r fath, mae unigolion yn dueddol o ailgyfeirio’r bai oddi wrthynt eu hunain. Mae hynny’n broblematig oherwydd ei fod yn andwyo’r posibilrwydd o ryngweithio cydweithredol llwyddiannus. Os bydd unigolion yn beio eraill ar gam am eu hymddygiad anghydweithredol eu hunain, yna bydd pawb dan sylw’n llai tebygol o gydweithredu, ond os yw unigolion yn eu beio eu hunain yn gywir am gamsyniadau, yna gellir newid ymddygiad, a gwella'r canlyniadau i bawb.
Mae'r project yn ceisio deall pryd a pham yr ydym yn beio eraill yn fwy na ni ein hunain hyd yn oed pan fydd yn effeithio’n negyddol arnom ni. Byddwn hefyd yn ceisio dod o hyd i ffyrdd o leihau'r duedd honno, er mwyn helpu’r unigolion wella eu canlyniadau mewn amgylcheddau cymdeithasol ansicr.

I wneud hynny, byddwn yn defnyddio gemau ymddygiadol, economaidd, cydweithredol i werthuso sut mae unigolion yn priodoli bai pan fo ansicrwydd. Caiff ein dyluniadau arbrofol eu llywio gan fodelau damcaniaethol gemau o ymddygiad cydweithredol (felly, mae rhywfaint o wybodaeth am ddamcaniaeth gêm yn ddymunol). Bydd y project yn cynnwys llunio arbrofion ar-lein ac yn y cnawd gyda Qualtrics (felly, bydd rhywfaint o wybodaeth o Javascript a HTML yn ddefnyddiol). Os oes gan yr ymgeisydd ddiddordeb, mae lle hefyd i lunio modelau ar sail asiantau i ddeall yn well sut mae beio eraill yn unllygeidiog yn effeithio ar gydweithredu mewn rhwydweithiau cymdeithasol.

Goruchwyliaeth:
Os byddwch yn llwyddiannus, cewch eich goruchwylio gan Dr. Paul Rauwolf, Darlithydd yn Adran Seicoleg Prifysgol Bangor. Derbyniodd Dr. Rauwolf radd PhD mewn Cyfrifiadureg o Brifysgol Caerfaddon. Bu wedyn yn gweithio fel ymchwilydd ôl-ddoethurol yn Sefydliad Mathemateg Prifysgol Rhydychen. Cwblhaodd ei waith ôl-ddoethurol mewn Seicoleg ym Mhrifysgol Bangor.

Yn fras, mae Dr. Rauwolf yn ceisio deall yn well a gwella sut mae unigolion yn gwneud penderfyniadau mewn amgylcheddau cymdeithasol ansicr. Mae ganddo ddiddordeb neilltuol mewn seicoleg amgylcheddol a gwella ymddygiadau cynaliadwy/cydweithredol mewn amgylcheddau cymdeithasol, cymhleth. O ystyried cefndir amrywiol Dr. Rauwolf mewn cyfrifiadureg, mathemateg, a seicoleg, mae ei labordy yn defnyddio cyfuniad o seicoleg arbrofol, economeg ymddygiadol, dysgu peirianyddol, a modelu cyfrifiannol i ddeall yn well y rhagfarnau sydd wrth wneud penderfyniadau cymdeithasol.

Y Gofynion:
Y gofynion hanfodol:
•    Gradd israddedig dosbarth cyntaf neu ail ddosbarth uwch mewn seicoleg, economeg, cyfrifiadureg neu bwnc cyffelyb.
•    Moeseg waith gref a brwdfrydedd gwirioneddol dros wneud penderfyniadau cymdeithasol.
•    Gallu gweithio'n annibynnol ac ar y cyd ag eraill.
•    Gallu cyfathrebu'n effeithiol, a thystiolaeth o sgiliau ysgrifennu gwyddonol da.
•    Parodrwydd i ddysgu technegau ystadegol yn R.

Nodweddion dymunol:
•    Cymhwyster lefel Meistr mewn seicoleg, niwrowyddoniaeth neu bwnc cyffelyb.
•    Profiad o ddylunio a chynnal arbrofion dynol, naill ai yn y labordy neu ar-lein.
•    Gwybodaeth am theori gêm, theori penderfyniadau neu economeg ymddygiadol.
•    Profiad o ddadansoddi data arbrofol, yn enwedig profiad o ddefnyddio meddalwedd R neu declyn ystadegol tebyg.  
•    Sgiliau rhaglennu. Oherwydd y caiff llawer o'r projectau eu hysgrifennu ar gyfer cyfranogwyr ar-lein, byddai gwybodaeth am Qualtrics, HTML neu JavaScript yn fuddiol.  
•    Gwybodaeth neu brofiad o gronfeydd cyfranogwyr ar-lein fel Prolific.
•    Peth gwybodaeth am fodelu cyfrifiannol a dadansoddeg ragfynegol, megis modelau trawsddilysu neu fodelau seiliedig ar asiant esblygiadol.

Yr Amgylchedd Ymchwil:
Ar hyn o bryd mae labordy Dr. Rauwolf yn cynnwys 2 fyfyriwr PhD arall a nifer o fyfyrwyr project MSc a BSc. Mae'r labordy bob amser yn cynnal nifer o brojectau ar yr un pryd ac yn cyfarfod yn rheolaidd i gydweithio a thrafod y gwahanol brojectau. Mae gan y labordy arbenigedd mewn economeg ymddygiadol, rhaglennu, a thechnegau ystadegol uwch. Byddwch yn ymuno â grŵp cydweithredol sy'n helpu pawb ennill y sgiliau sydd eu hangen i lwyddo.

Mae’r Ysgol Seicoleg a Gwyddor Chwaraeon yn dod â dwy o adrannau gorau Prifysgol Bangor ynghyd: Seicoleg, a Gwyddorau Chwaraeon ac Ymarfer. Mae ein hymchwil, sydd gyda’r gorau yn y byd, yn rhychwantu niwrowyddoniaeth wybyddol, ymyriadau clinigol, llesiant seicolegol, perfformiad elît, gweithgarwch corfforol, iechyd a ffisioleg ddynol gymhwysol, ac mae effaith sylweddol yn y byd go iawn. Rydym yn falch hefyd o'r rhagoriaeth sydd gennym mewn addysgu a dysgu ac mae cydnabyddiaeth i hynny’n genedlaethol ac yn fyd-eang. Mae'r Ysgol yn cynnig amgylchedd ymchwil rhagorol i ymchwilwyr ôl-radd, ac mae cymuned fawr o fyfyrwyr PhD a staff sy’n brysur gydag ymchwil, cyfarfodydd labordy rheolaidd, seminarau, a siaradwyr gwadd, a digwyddiadau sy’n anelu at ddatblygiad proffesiynol ehangach. Mae cyfleusterau helaeth ar gyfer astudiaethau ymddygiadol, ffisiolegol a niwrowyddonol.

Caiff ein hymchwil ei ddiffinio gan bedwar sefydliad ymchwil, a bydd croeso i’r myfyriwr PhD ymuno â nhw: Sefydliad Ffisioleg Ddynol Gymhwysol (IAHP; dolen), Sefydliad Seicoleg Perfformiad Elît (IPEP; dolen), Sefydliad Niwrowyddoniaeth Wybyddol (CNI), dolen), Sefydliad Ymchwil Llesiant (IWR; dolen).

Saif Prifysgol Bangor yn nhirwedd ysblennydd gogledd Cymru.  Mae Bangor yn ddinas brifysgol gyfeillgar a fforddiadwy, a saif ar lannau Môr Iwerddon a Pharc Cenedlaethol Eryr’n gefnlen iddii. Mae mynyddoedd, llynnoedd, afonydd a thraethau hardd wrth law a chysylltiadau cludiant da â rhai o ddinasoedd mwyaf y Deyrnas Unedig, gan gynnwys Manceinion a Llundain.

Y gofynion preswylio: Anelir yr efrydiaeth yn bennaf at fyfyrwyr y Deyrnas Unedig. Fodd bynnag, dylai’r rhai sydd â diddordeb, ond sy'n dod o'r tu allan i'r Deyrnas Unedig, gysylltu â Dr Sapir i drafod amodau ariannu myfyrwyr rhyngwladol.
Gwybodaeth gyffredinol: Mae'r efrydiaeth am dair blynedd, yn amodol ar werthusiad cadarnhaol gan Bwyllgor Adolygu ar ddiwedd blwyddyn gyntaf yr astudiaethau.  Mae disgwyl i Ymchwilwyr Ôl-radd gyfrannu at addysgu yn yr Ysgol. Mae'r Ysgol yn cynnig hyfforddiant rhagorol mewn addysgu ac mae llawer o fyfyrwyr yn cyflawni cymwysterau’r Academi Addysg Uwch wrth gwblhau eu doethuriaeth. Ewch i wefan Ysgol Ddoethurol Bangor am wybodaeth, gan gynnwys y Rheoliadau, ynghylch rhaglenni ymchwil ôl-radd Prifysgol Bangor.

Gwybodaeth bellach:Dylid cyfeirio cwestiynau anffurfiol am yr efrydiaeth a gofyn am fwy o arweiniad os ydych am baratoi cynnig manylach at: p.rauwolf@bangor.ac.uk.

Sut mae gwneud cais:

Rhaid cyflwyno pob cais trwy ein system ymgeisio ar-lein: https://apps.bangor.ac.uk/applicant/
Rhaid i’r cais gynnwys y dogfennau canlynol:
1.    Llythyr eglurhaol: Eich cymhelliant dros wneud cais am yr ysgoloriaeth ymchwil, eich dyheadau y tu hwnt i wneud doethuriaeth, ac unrhyw resymau pam rydych yn teimlo eich bod yn arbennig o addas i'r project.
2.    Cyfeiriadau: Mae angen dau eirda academaidd i gefnogi pob cais. Rhaid i’r ymgeiswyr gysylltu â chanolwyr drostynt eu hunain a chynnwys y geirdaon gyda'u ceisiadau.
3.    Curriculum Vitae: Ni ddylai fod yn hirach na dwy dudalen. Lle bo'n briodol, dylech gynnwys tystiolaeth o Gymhwysedd mewn Saesneg (prawf IELTS gyda marc o 7.0 fel isafswm).
4.    Cynnig Ymchwil: 3-4 tudalen yn disgrifio cynllun arbrawf. Bydd hynny’n cynnwys disgrifiad clir o’r cwestiynau ymchwil, damcaniaethau, y dull o gasglu a dadansoddi data, ac amserlen arfaethedig ar gyfer pob elfen o’r ymchwil a’r ysgrifennu. Cyn dechrau ar y cynnig ymchwil, rhaid i'r ymgeisydd gysylltu â Dr. Rauwolf (p.rauwolf@bangor.ac.uk) am fanylion ar beth i'w ysgrifennu i’r cynnig ymchwil.
Ymholiadau cyffredinol: Am gyngor cyffredinol ynglŷn â sut mae gwneud cais a chymhwystra, ewch i wefan Ysgol Ddoethurol Bangor